Әни һәм мин - спорт сөюче гаилә.
методическая разработка (физкультура) по теме

                Әни һәм мин – спорт сөюче гаилә.

     Хәерле  көн,  хөрмәтле  әниләр,  балалар! Без  бүген  “Әни  һәм  мин – спорт  сөюче  гаилә”  дигән  бәйрәмгә  җыелдык.  Шушы  уңайдан  Сезгә  барыгызга  да  гаиләләрегездә  бәхетле  тормыш  телибез,  сәламәт  булыгыз,  тату  һәм  пар  канатлы  булып  яшәгез!  Иманлы,  әдәпле, игелекле  балалар  үстерүдә  сезгә  сабырлык  телибез!  

                   Ана – баланың  иң  якын  киңәшчесе,  хәленә  керүче,  кайгы - шатлыгын  үз  йөрәге  аша  үткәрүче  кеше  ул.  Әни  безнең  таянычыбыз,  ярдәмчебез.  Ул  булганга  безгә  яшәве  рәхәт,  күңелле.  Шуңа  күрә  әти- әниләр  тигез,  тату  булып,  гаиләдәге  һәр  кеше  сәламәт  булсын  дигән  теләк  белән  бәйрәмебезне  башлап  җибәрәбез.

      (Бәйрәмне  дәвам  итәләр  1 малай  һәм  1 кыз)

         Кыз:     Нигә  бүген  бакчабызда

                      Бик  күңелле,  бик  ямьле?

       Малай:  Чөнки  бүген  кунакка

                      Безгә  әниләр  килде.

       Кыз:       Әни  янымда  булганда  

                      Бернәрсәдән  курыкмыйм  мин.

       Малай:  Яшәсен  безнең  әниләр

                      Сәламәт  һәм  яшь  булып.

       Бергә:    Кызларының,  улларының,

                      Кадерлеләре  булып.

                   Хәзер  иң  кадерлеләребез - әниләребез  турында  шигырьләр  тыңлыйк.

                     Исәнмесез,  кадерле  әниләр!

                     Менә  Сез  дә  килеп  җиткәнсез,

                     Безнең  бакчабызның  шау  тормышын

                     Күреп  китик  әле  дигәнсез.

                      Яңгыр  түгел , кар  да  түгел,

                      Яфраклар  ява  җиргә

                      Бүген,  бүген,  бүген,  бүген,

                      Әниләрнең  бәйрәме!

                      Ничек  түләп  бетерербез

                      Гомер  биргән  өчен  безгә

                      Балам  диеп,  янып- көеп,

                      Яшәгәнгә  рәхмәт  Сезгә.

                      Гомер  буе  язсын  иде  безгә

                      Әти - әни  диеп  дәшәргә

                      Кайгы  күрми, бәхет – шатлык  белән,

                      Бергә - бергә  озак  яшәргә.

                      Сезгә  булган  чиксез  хөрмәтебез

                      Урын  алсын  йөрәк  түрендә

                      Шатлык – куанычлар,  зур  бәхетләр,

                      Юлдаш  булсын  гомер – гомергә.

                      Ата – анадан  башка

                      Бар  нәрсә  дә  табыла

                      Һәр   бала  ата – анага

                      Изге  итеп  табына.

                      Авырсаң  янда  тора  ул,

                      Төне  буе  керфек  какмый

                      Үз  саулыгын  да  кызганмый

                      Ул  безне   саклый – саклый.

                      Рәхмәт  яусын  безнең  әнкәйләргә

                      Аларгадыр  бөтен  авырлык

                      Әнкәйләргә  якты  йолдызлардан

                       Йә  кояштан  һәйкәл  салырлык!

                       Бу  кичәбез  гөрләп  үтсен

                       Истә  калсын  гомергә

                       Бәйрәмнәрсез  яшәп  булмый

                       Җирнең  якты  йөзендә.

                       Дөньяда  иң  уңган  әни –

                       Минем  әнием!

                       Дөньяда  иң  матур  әни –

                       Минем  әнием!

                      Әни,  әни!  Сездән  башка  тагын

                      Кем  бар  шулай  бала  бәгырьле

                      Кояш  җиргә  берәү  булган  кебек

                      Сез  дә  безгә  шулай  кадерле.

                     Әйе,  гаиләдә  бала  бәхетле  булсын  өчен  әни  кирәк.  Әни  булганда  дөньялар  ямьле , ашлар  тәмле.  Ләкин  һәр  гаиләнең  башлыгы  да  бар  бит  әле.  Ул  безнең -  әтиләребез.  Ул  гаиләнең  икенче  терәге,  таянычы.  Без  аларны  да  бик  яратабыз.  

                    Ләкин  бәхетле  булу  өчен  тагын  бер  нәрсә  җитми  бит  әле.  Нәрсә  икән  соң  ул?

                   -Дөрес , сәламәтлек. Сәламәтлек – кешенең  иң  зур  байлыгы.  Аны  бернинди  акчага  да  сатып  алып  булмый.  Сәламәт  кеше  генә  үзенең  теләгәннәренә  ирешә  ала, тормыштан  канәгатьлек  ала.  Һәр  кеше  үзенең  сәламәтлеге  турында  кайгыртырга  һәм  аны  һәрдаим  ныгытып  торырга  тиеш.  Көчле,  җитез  булу  өчен  даими  рәвештә  хәрәкәтле  уеннар, төрле  физик  күнегүләр,  физик  эш,  физкультура  белән  шөгыльләнергә  һәм  чыныгырга  кирәк.

                     Быелгы  2009 ел – спорт  һәм  сәламәт  яшәү  

рәвеше  елы  булды.  Ел  буена  ничек  итеп   спорт  белән  шөгыльләнүебез  турында  балалар хәзер  сөйләп  бирерләр.

                       “ Спорт  елы “ дигәч  быел,

                             Дәррәү  чаңгыга  бастык

                             Группа  белән  тауга  барып

                             Чана  да  шуып  кайттык.

                              Хәрәкәттә -  бәрәкәт,  дип

                              Әйткәннәр  бит  халыкта

                              Бәхет  исән – сау  булуда

                              Бәхет  түгел  байлыкта.

                              Сәламәт  булыйм  дисәң

                              Әйбәт  ашарга  кирәк

                               Спорт  белән  шөгыльләнеп

                               Дөрес  яшәргә   кирәк.

                               Сәламәтлек  елы  дип,

                               Игълан  иттеләр  елны,

                               Соң  ул  бер  быел  гына

                               Кирәк  микәнни  инде?

                               Ялгышмагыз , дусларым !

                               Сәламәтлек  гомерлек,

                               Спорт  белән  шөгыльләнү,

                               Кечкенәдән  чыныгу,

                               Көн  дә  иртән  йөгерү,

                               Кышын  чаңгыда  шуу,

                               Җәен  суларда  йөзү

                               Кирәк  һәммәбезгә  дә.

  - Сәламәт  бул,  ди,  әбием

Бераз  гына  төчкерсәм.

                            - Спорт  белән  шөгыльлән , - ди,

Бераз  гына  йөткерсәм.

Һәр  кешегә  киңәшем:

Спортны  яратырга,

Быелгы  спорт  елын

Сәламәт  уздырырга!

Спорт  белән  дус  булу

Кешене  чыныктыра

Ул  күңелне  күтәрә

Дусларны  да  арттыра.

Сәламәт  булыйк,  дуслар,

Сәламәт  булу  кирәк

Спорт  ул  һәр  кешегә

Исәнлек  өчен  кирәк.

Сәламәтлек  ярты  байлык

Диләр  безгә  өлкәннәр

Сәламәтлек  кирәклеген

Без  дә  яхшы  беләбез.

Көн  дә  иртән  торып

Физзарядка  ясыйбыз ,

Салкын  суда  юынабыз ,

Киенәбез , ашыйбыз,

Чисталыкны  яратабыз ,

Пөхтәлекне  сөябез.

Сәламәтлек -  иң  зур  байлык ,

Кирәк  кадерен  белергә

Өйдә  генә  утырмыйча

Саф  һавада  йөрергә.

Сез  дә  сәламәт  булыгыз,

Тату  итеп  яшәгез.

Сәламәтлек – зур  байлык  ул ,

Кадерләрен  белегез .

                        “ Спорт  турында  җыр “  - җыр.

                    Ә  хәзер  барыгызны  да  ярышларда , уеннарда  катнашырга  чакырабыз:

                               Ярышларны  башлыйбыз

                               Әниләр  дә,  балалар  да ,

                               Күңел  ачыйк  бергәләп

                               Йөгерик , сикерик ,

                               Спорт  белән  шөгыльләник.

                    Конкурсларда  катнашачак  әниләрне  командалары  белән  тезелергә  чакырам.  Аларны  каршы  алыйк!  

                   Уеннарга  бәя  бирү  өчен  жюри  составын  сайлап  китик.

                   Сүзне  әниләргә  бирик.  Әниләр  үзләре  белән  кыскача  гына  таныштырып  китсеннәр.

                   Ә  хәзер  барыбыз  да  бер  уен  уйнап  алырбыз.  Уен  “Тычкан  тозагы”  дип  атала.  ( Әниләр  җитәкләшеп , түгәрәк  ясап басалар.  Алар – тозак . Балалар  түгәрәк  тышында – “тычканнар”.  Музыка  уйнаганда  әниләр  кулларын  күтәреп  торалар,  ә  балалар  алар  арасыннан  түгәрәккә  кереп – чыгып  уйныйлар.  Музыка  туктауга  әниләр  кулларын  төшереп  “тозакны  ябалар” , “тычканнарны”  тотарга  тырышалар. Тотылган  “тычканнар”  түгәрәккә  басалар.  Уен  3  җиңүче  бала  калганчы  уйнала.  Аннан  әниләр  белән  балалар  рольләрен  алышалар.

                   Менә  инде  әниләребезнең  җитезлекләрен  сынап  карарга  да  вакыт  җитте.  

                1 конкурс:  “ Ягез - әле , әниләр! “

                   Ике  командадагы  әниләрне  дә  ярышка  чакырабыз.  Командалар  аерым – аерым  волейбол  уенын  уйныйлар.  Кайсы  команда  тупны  төшермичә  озаграк  уйный  - шул  командага  очко  куела.

                2 конкурс: “ Табышмак – сораулар “

                   Карыйк  әле,  ничек  безнең  әниләр , балаларны  тиз  аңлый  икән?  Хәзер  балалар  алга  чыгып  командаларга  чиратлап  кем  яки  нәрсә  дә  булса  турында  сөйләрләр.  Командалар  игътибар  белән  тыңлый,  нәрсә  турында  сөйләгәнне  аңлаган  әни,  кулын  күтәреп  туктарга  куша  һәм  җавапны  әйтә.  Җавап  дөрес  булмаса , бала  сөйләүне  дәвам  итә.  Дөрес  җавап  биргән  командага  очко  куела.  

                              Сораулар:

1.Ул -  балаларны  ярата,  ягымлы,  нинди  тәмле  әйбер телисең – ул  аны  да  сатып  алып  бирә;Ул -  кайгыртучан,  беркайчан  да ачуланмый. Аның яраткан  кешесе  дә  бар ; Ул – бабай.  Кем   ул?                                                                                        ( Әби )

2. Ул – зур  да,  бәләкәй  дә  була  ала . Фотога  төшкәндә  дә - ул  кирәк.  Ниндидер  кызык  әйберләр , анекдотлар  сөйләгәндә  ул  барлыкка  килә  дә,  аннан  юкка  чыга.  Нәрсә  ул?                                 (Елмаю )

3.Ул – көчле,  ул  ашарга  да  пешерә  белә,  машина,  мотоцикл  йөртә  белә,  ул -  беркемнән  дә курыкмый,  беркайчан  да  еламый.  Ул  - кайгыртучан,  аның  улы  яки  кызы  бар,  ул  әнине  ярата. ( Әти )

4.Ул -  кайчагында  була ,  ә  кайчакта  булмый  да.  Әни  тәмле  әйбер  сатып  алганда, ул  шунда  ук  барлыкка  килә.  Кунаклар  килгәндә , биегәндә  дә ,   уйнарга  кушмаганда ,  эш  эшләгәндә  дә - ул  була.  Ул - күңелле  дә,  күңелсез дә  була,  әйбәт  тә,  начар  да  була.  Нәрсә  ул? ( Кәеф ) 

                     Ә  без  яхшы  кәеф  белән  ярышларны  дәвам  итәбез.

3 конкурс: “ Үз  командаңның  кәефен   асап   күрсәт “

                   Һәр  команда  бергәләп  шарга  үз  командаларының  кәефен  төшерәләр.

                  Әниләр  эшләгәндә  балалар  белән  уен  уйнап  алабыз.

        Балалар  белән  уен: “Мозаика”.

( Әниләрне  котлап  киселгән  открыткадан  мозаика  төзү )

                    4 конкурс: “ Оста  куллы  әниләр “

Һәр  командадан  3 әни  үзенең  кызына  матур  итеп  чәч  ясый.

Әниләр  әзерләнгәндә  балалар  белән  уен  уйнап алабыз.

       Балалар  белән  уен: “Гаиләдә  кем  нәрсә  эшли?”

(Балаларны  3  төркемгә  бүлеп  3  төрле  флажок  таратып  чыгу)

1. төркем:  Әниләр.
2. төркем:  Әтиләр.
3. төркем:  Балалар.

Өйдә  эшләнә  торган  төрле  эшләр  әйтелә.  Бу  эшне  кем  эшли  шул  төркемдәге  балалар  торып  басып  флагларны  өскә күтәрәләр һәм  утыралар.

                              Эшләр:

1). Өйдә  ашарга  кем  пешерә?

2). Кем  үтүк  ремонтлый?

3). Кем  бакчада  бәрәңге  чүпли?

4). Кем  табак –савыт  юа?

5). Кем  гөлләр  үстерә?

6). Кем  кер  юа?

7). Кем  уенчыклар  җыя?

8). Кем  чүкеч  һәм  кадак  белән  эшли?

9). Кем  оекбаш  бәйли?

10). Кем  җир  казый? Һ.б.

                4 конкурс: “Җитез  команда”

    (Командалар  арасында  ярыш – эстафеталар  оештыру)

1 эстафета: Идәндә  4  обруч  ята,  1уенчы  обручлар  эченә  кеглилар  куеп  чыга,  2уенчы  кеглиларны  җыеп  кайта.

2 эстафета: Кечкенә  тупны  ияк  белән  кыстырып  билгеләнгән  араны  йөгереп  кайту.

3 эстафета: 1 уенчы  башына  косынка , алдына  алъяпкыч  бәйләп  билгеләнгән  араны  йөгереп  кайта  һәм  алъяпкыч  белән  косынканы  салып  2  уенчыга  бирә . Уен  шулай  дәвам  итә. 

                  5 конкурс: “Оста  биючеләр”

             Командадагы  һәр  әни  үзенең  баласы  белән  парлашып  икәүләп  газета  өстендә  бииләр. Көй  туктаган  саен  газетаны  икегә  бөклиләр.  Иң  бәләкәй  газета  өстендә  бии  алган  гаиләләр  ачыклана.  Кайсы  командада

 6 конкурс: “Комплиментлар  ярышы”

                Һәр  команданың  әнисе  үз  баласы  белән  кара –каршы  баса.  Командалар  чиратлашып  бер – берсенә туп  бирешеп  матур,  ягымлы  сүзләр  әйтәләр. (әни  үзенең  баласына)

                        “Җырлыйк  әле” – җыр.

(Соңыннан сүз жюри составына бирелә, җиңүче команда билгеләнә, истәлек бүләкләре тапшыру).

                                                Садртдинова Ф.И. – Актаныш районы

                                             Актаныш гомуми белем бирүче                                          

                                      “Алтынчәч” балалар бакчасы

                                             физкультура инструкторы.