Внеклассное мероприятие "Минь кельгома журналоньке - Якстерь тяштенясь"
план-конспект на тему

Ила «Минь кельгома журналоньке – Якстерь тяштнясь»

«Якстерь тяштеняти»

Эрь, мезе, ялгат?

Маладсь шись.

Сась «Якстерь тештенять» илац.

Кунара васенцеда лиссь

Шивалдонь каннема кинц лангс.

Вдь лама киза ни етась,

Ет «Якстерь тяштеняньке» шачсь.

Эсь кистонза сон ашезь пота,

Мольсь смузень няезь пинкнень пачк.

И няйсак – тячивок киц валда,

И валонц ичкозе кульсазь.

Аф аньцек шабатненди ялга,-

Сонь сире атятне лувсазь.

Лувсазь и мзолфснон аф кяшихть:

- Мусь «Тяштенясс» эсь виде кинц.

- Тон ватта, ватта! – азкста тяшнихть

Эсь еньцост уноконьке минь!

                                          Анатолий Тяпаев.

Тячи, ялгат, минь етафттама ила, конань лемдеськ «Якстерь тяштеня» идень журналти. Монь  койсон, тя журналть сембе содасазь, лувондсазь, кельгсазь и фалу пяк учендсазь. Тя журналсь пяк пара, пяк интереснай. Эряви азомс, сон пяк лезды тейнек уроконь анокламста, а стане жа эрямс. Аньцек мезе эздонза аф луват: ефкст, легендат, стихт, пеетькст, прянь синнемкат. И тячи минь азондсаськ тейнть, кода и мзярда сон эвондась и кодама ки етась, кит работасть и работайхть лангсонза.

Учтама эсот лажатф мяльса,

Мес морнят морсят, кода цефкс,

Мес корхнят мархтонк идень кяльса,

И содат лама цебярь ефкс.

Ки лангонь тяштекс тейнек арак,

Катк валдце тейнек сай и сай,

Лезтт етамс сери пантт и карафт,

Катк смузце седизонк сувай.

1932 кизонь январьста Саранскяйса васенцеда лиссь мокшень кяльса-валса «Якстерь тяштеня» идень журналсь. Лисендсь эрь ковня. Нилеце номерда меле лемоц полафтсь, арась «Якстерь галстук». Шарьхкодеви, сонь шамаликоц ульсь аф тячиеннеть лаца. Печатлакшневсь тюжя кагод лангс, эсонза кржаль рисункада, фотографияда. Но иттненди сонь эрь самац сякокс ульсь оцю праздникокс.

Журналсь, коза сатсь виец-эрьгац, сембе ломаненьконь мархта строясь шачема масторсонк од эряф, лездсь касфтомс шабатнень родинань кельгикс, тевонь содайкс. Васенце редакторкс ульсь мокшень содаф журналистсь Никита Степанович Шотин. Од  тятихнень етксотольхть Илья Девин, Василий Каргин, Григорий Ельмеев, Василий Виард, Федор Дурнов, Андрей Чекашкин, Александр Малькин, Михаил Сайгин и ламотне лиятне.

Кие  содасы, конашка серес кеподель «Якстерь тяштенясь», кда афоль ушеда Великай Отечественнай войнась. Зиянць сувась эрь кудти, пяшкодезе ризфта кажнайть седиенц. 1941-це кизоня сязевсь журналоньконьге эряфоц.

Оду «Якстерь тяштенясь» васедсь лувиензон мархта аньцек 1964-це кизоня. «Мокша» журналть потмоса кармась лисендема иттненди книганя. А штоба лувомац улель сяда пара, 1972-це  кизоть песта книганясь ушедсь печатлавома башка. 1988-це кизонь январьста «Якстерь тяштенясь» лийкстась «Мокшеть» паця алда и арась башка журналкс. Редакторонь тевть кармась вятемонза Мордовияннь заслуженнай писательсь Анатолий Ежов, кона пяк лама тись журналть эреклафтоманц инкса.

Кулхцондсайнек Анатолий  Ежовонь стихотворениянзон.

Ару тяштеняньконди.

Лопанятне мазынят,

Эсост тейнек казендят,

Лувондсайнек педа-пес,

Сембе енюнят пяк месс.

Тейнек макссят лиемс пацят,

Идень эряфт строят-латцят…

Валда улеза эрь кице!

Пе аф содай катк эрь шице!

Кукуть колга.

Сермав кукуть тевоц сяка:

Велеть фтала коль кукай,

Кукуть мороц аф кувака,

Сон эсь лемонц келькси-шнай:

- Ку-ку, Ку-ку!

- Ку-ку, Ку-ку!...

- Корхтайхть, куку, содат лама –

Ули кизефксозе стама:

Кда школав молян ванды –

Мезе шта дневникса кандан?

- Ку-ку!

- Фкя…

- Ку-ку!

- Кафта…

- Кафта?

Рахсят лангсон, куку, тяфта?

Или колмос лувомс стака? –

Тев лия аф содат сяка!

Ванан, нолапарят, толгав,

Афи молян ванды школав,

Муворусь, куку, тон улят,

А мон ладян ульмонят…

Меле лама киза редакторкс ульсь Мордовиянь заслуженнай писательсь Григорий Пинясов. Сонь пингстонза «Якстерь тяштенясь» аськолдась од куцеманяс, кассь лопанянзон лувкссна, кармасть етафневома журналу тяштихнень мархта семинархт.

Тяфта журналсь пачкодсь тячиень шинцты. Мордовиянь поэтессась Вера Брындина «Якстерь тяштенять» главнай редактороц.

Тяла. Моли сетьме ловня.

Вярде цильфонц прафни ковнясь.

Удыхть вирьса шуфтонятне,

Кяшевсть яннятне-кинятне.

Мады ловнясь сей и тов.

Ков тят ванна – акша лов!

Киза.

Киза, киза – тевонь пиза!

Коза эряскодат, азк?

Эздот прокс ашеме сизе,

Эняльттяма, ащек тязк.

Киза, киза – лямбонь кази,

Кожфса медень ару таньф.

Конашкава сембось мазы,

Салай шабань сельмованф.

Коволнят.

Уихть коволнят,

Ефси вашенят.

Уихть саворне,

Ловнякс акшенят.

Уихть вярьгане,

Вастонь-алгане.

Уихть марняса,

Кода ялганят.

Эрь ковня «Якстерь тяштенясь» виде вайме ломанькс сашенды лувиензон пяли, канни од кулят тонафнихнень эряфста, азонды шабатнень эрь шинь тевснон-киснон, мяльснон-арьсемаснон колга.  Содафни писательхнень, поэттнень, художникнень и республикань лия ломаттнень мархта.

Кода корхтайхть журналть лангса работайхне, што сембода пяк кеняртьфни эсонк во мезе: школьникне кучсихть редакцияв лама сермада. Эсост стихсна, ефкссна, кульф-серматф легендасна, содама ефкссна, рисункасна. «Якстерь тяштенясь» лезни тейст касфнема асуснон.

Журналу сермат сашендыхть и Жуку школань тонафнихнень эзда.  

Лихтибряти якась Мару.

Лихтибрянясь ару, ару,

Шамань штамма якась Мару.

Марунь вельхксса лиендсть нармотть,

Мазы морснон фатнясь вармась,

Вармась кандозень синь вели –

Морхне срадсть ульцяньконь келес.

«Якстерь тяштенясь»  аф аньцек тонафты эсонк, но и кизефни, сон ерай содамс, кода тонафнетяма, мезе машттама тиема, кода кельгсаськ эсь шачема крайньконь, мезе содатама ся ломаттнень колга, конат эрясть, эряйхть, тиендсть и тиендихть аньцек пара тефт.

Эрь ина, варжасаськ виеньконь!

А кода дивандафтыхть эсонк валмуворксне. Синь, афкукс, пяк видет, ежуфт. Синь тонафтыхть эсонк аньцек цебярти:  улемс ежукс, енюкс,тевонь кельгикс. Кулхцондода ялгаксшить колга валмуворкст.

Цебярь ялгась сембодонга питни.

Кинь мархта шарат, сянь лаца арат.

Цебярь ломанць слава канды, кальдявть лемоцка аф ляды.

Шуфтсь кеме юрса, а ломанць – ялгаса.

Пара арьсят – пара учат.

Цебярь ялгась мумс стака,  а юмафтомс теждя.

Лама пара тият, лама ялга муят.

Цебярь ялгась ярмакта питни.

Ялгась содави тевса.

Цебярь ломань вакса тонцьке цебярь улят.

Тяса ни аф весть азфоль, што «Якстерь тяштеняста» мезе аньцек аф луфтама:  и ефкст, и стихт, и пеетькст.

Нолинонь мархта вассетькшнетяда сидеста. Сон кучсь «Якстерь тяштенянь» редакцияв тяфтама серма:  «Якстерь тяштеня», мон тонь пяк келькте. Кодак канттядязь, юкстайне сембе тевнень, нльне уроконеньге аф тонафнесайне. Печатлакшнесайть школаса тонафнихнень стихснон, азксснон, сценкаснон, ефксснон. А монь лемозень фалу кунцесак кальдяв валса.бта мон и нолан, и аф кулхцондан, и урокса фатнян аньцек «кафтт». Хуш весть азоледе колган пара валня.

Сценка.

- Сема, кодама тев васенцекс тиелеть, кда путоледязь образованиянь министркс? – Кизефтезе учительницась.

- Тяштелень приказ, штоба учительхне афольхть путне «кафтт» и кувалгафтолине каникулатнень.

Учительсь кизефнесыне иттнень:

- мезе эряви тиемс. Штоба ванфтомс учебникть, тетраттнень?

Васенцекс ювадсь Сема:

- Синь аф эрявихть каннемс школав.

- И мезькс улят, мзярда касат? – апрякасы Нолинонь тядяц. – тевс аф кошардоват, тонафнят кальдявста, якат и нуват.

- Солдатокс улян, - прянь шнафтозь пшкядсь Сема. – Синь фалу корхнихть: солдатсь уды, а службац моли.

- Тон месс ашеть рисованда тялонь рисунка – кизефнесы Нолинонь учительсь.

- Мон рисовандань, Мария Ивановна. Аньцек вадине семботь акша тюсса меьге аф няеви. Семботь ловсь ацазе.

Кулхцондость, мезе сермады «Якстерь тяштенясь» фкя сермасонза: «Семен Нолиттнень колга сиземе ни серматкшнемс. Кизотне етнихть. Финцне аделасазь школать, туйхть, вастозост сайхть лият,сяда емлат. Но сембонь промазсна фкя: нолат, аш мяльсна тонафнемс, лездомс оцюфненди, тиендихть аеркс тевнят. Колсесазь учительхнень и эсь ялгаснон мяльснон.

Эрьда тяряфттама марняса лездомс сембе Нолиттненди сяськомс лафчашиснон, кальдяв промазснон, арамс цебярь церанякс и пара ялгакс. Пяк и пяк учсеса ся шить, мзярда мокшень школава аф ляды фкявок Нолин.

Паронь арьсезь «Якстерь тяштенясь».

А минь школасонк улихть Нолитт?

Улихть. Да нинге мзяра. А кит синць, тянь ученикне синцьке содасазь. Виденц корхтан? Эряви тиемс стане, штоба синь афольхть уле, штоба синь афольхть шоря тонафнемста, эрямста.

Уи коволнясь. Емланя. Теждяня, бта качамня. Уи саворне, аф эряскоды. Лоткай шабатнень вельхксс, кит озафнихть-валондыхть шуфтонят, андыхть толонь орняса щаф урнятнень или ужяльдихть вирень лия эряйхнень эса, строяйхть нармонень куднят, кенярькшни-тии коволнясь инксост и туй сяда тов.

Вярде сембось няеви, лац ванови. Сяс коволнясь лама содай. «Якстерь тяштеня» журналса ули  природань кельгиень уженя, конац лемдьф  «Коволнякс». Сонь мархтонза минь васетькшнетяма журналть эрь номерсонза.

Эх, тунданя-мазыня,

Эрек панчфонь казиня.

Ару кожфкясь -  ваймоце,

Пижелхт моли лаймоце.

Сембонди тон, кельговат,

Сокуват и эрьгават.

Приметат.

Тишетнень и панчфнень маряви цебярь шинесна – пиземти.

Кда шобдава тишесь коське, веть туй пизем.

Кудонь панчфсь начки – учт пизем.

Кда рана шобдава менельге уихть туман лаца шура ковол пакшкат, ули пизем.

Эрька сценати листяма, моратама и кштитяма.

Мзяра ба минь афолеме корхта тяса журналоньконь колга, сембось аф азондови. Вдь эрь номерса, кона сашенды эрь ковня, минь мушенттама лама одняда, интереснайда, конат кошарясамазь арьсема, тонафтсамазь улемс настоящай ломанькс.

Валдопнек, тяштеняй!

Тейть тячи, Тяштеняй,

Тейть сембе казнетнень,-

Тефнень лиякс кода шнамс?!

Мярьк тячи сембонди –

Шкай шистон – праздникстот,

Пильгозт мярьк сюконямс!

Лама тон кулендеть,

Лама тон няендеть,

Кирнеть аф идьморонь канкст,

Пря ашеть ноля тон,

Тейнек най пеедеть,

Надиять вандыньконь лангс.

И коста топотькшнесть

Эряфонь аймакне,

Полафнить тейнек Шинять,

Валдопнить сединьконь,

Валдопнить ваймоньконь,

Валдопнить Шкай уженять.

Валдопнек, Тяштеняй.

Валдопнек, Якстерняй,

Валдопнек эряфонь кить.

Лезтт етамс тячиень

Каварксу паксятнень,

Маласькофтк Вандыень Шить.