3 сыйныфта әйләнә-тирә дөнья белән танышу дәресе "Хайваннарның төрлелеге"
план-конспект урока по окружающему миру (3 класс) на тему

Апас муниципаль районы Чури-Бураш төп белем бирү мәктәбе

Хайваннарның төрлелеге

(3 сыйныфта әйләнә-тирә дөнья белән танышу дәресе)

Төзеде: I категорияле башлангыч сыйныф

укытучысы Шәрәфиева Гөлинә Рифат кызы.

   Тема:  Хайваннарның төрлелеге.

   Максат: 1) Җир йөзендәге хайваннарның  төрлелеге белән таныштыру, аларны  уртак билгеләре буенча төркемләү;

2) Хайваннар дөньясы турында күзаллауларын киңәйтү;

3) Табигатькә карата сакчыл караш формалаштыру, аны өйрәнүгә кызыксыну уяту.

   Җиһазлау:   “Әйләнә-тирә дөнья”  дәреслеге,  эш дәфтәре, ачыклагыч-атлас – “Җирдән күккә кадәр”, медиапроектор ,  презентация - «Хайваннар төрлелеге”.

Дәрес барышы

   I  Оештыру өлеше

   -Хәерле көн!

   Менә тагын яңгырады

   Көтеп алынган звонок.

   Бер-беребезгә елмайыйк та,

   Дәресебезне башлыйк.

   II Өй эшләрен тикшерү

   III Актуальләштерү

  - Без бүген үсемлекләр патшалыгын калдырып, хайваннар дөньясына сәяхәт итәрбез.

   Исегезгә төшерегез әле, без алдагы сыйныфларда хайваннарны нинди 2 төремгә  бүлдек?

   Презентация  «Хайваннарның төрлелеге»

   1 слайд.  Кыргый хайваннар  һәм йорт хайваннары.

   -Ә галимнәр хайваннарның башка төркемнәрен дә билгеләгәннәр.  Без бүген шул төркемнәр белән танышырбыз.

   IV Яңа тема өстендә эшләү.

   -Безнең планетабызда хайваннарны бөтен җирдә дә очратырга мөмкин. Гади күз белән күреп була торган эре хайваннар белән беррәттән микроскоп аша гына күренә торган хайваннар да бар.

   - Ә хәзер әйдәгез, хайваннар дөньясына сәяхәтеезне башлыйк.

  2 слайд. (Умырткасызлар ) Суалчаннар

  -Бу төркемгә суалчаннар, сөлекләр керә. Яңгыр суалчаннарын күргәнегез бар инде, ә сөлекләр суда яши.

   3 слайд.  Моллюсклар, яки йомшак тәнлеләр     -Бу төркемгә ике капкачлы моллюсклар, әкәм-төкәмнәр, лайлачлар, сигезаяклар, кальмарлар керә.  Игътибар итегез, аларның тәне йомшак һәм кабырчык (панцирь) белән капланган.

   4 слайд.  Кысласыманнар

   -Болар – кысла, краб, креветкалар.

   5 слайд.  Үрмәкүчсыманнар

   -Болар – чаяннар, печәнче үрмәкүчләр.  Аларның нинди уртак яклары бар?

 (4 пар аяк)

   6 слайд.  Бөҗәкләр

   -Бөҗәкләрнең нинди уртак яклары бар? ( 3 пар аяк)

   7 слайд. (Умырткалылар)  Балыклар

   -Балыкларның тәннәре тәңкә белән капланган.

   8 слайд . Җир-су хайваннары

   -Бакалар, гөберле бакалар, тритоннар. Алар суда да, коры җирдә дә яши ала. Тәннәре ялангач.

   9 слайд.  Сөйрәлүчеләр

  -Кәлтәләр, еланнар, ташбакалар, крокодиллар. Алар шуышып, сөйрәлеп йөриләр.

   10 слайд.  Кошлар

   -Кошларның тәне каурый белән капланган.

   11 слайд.  Җәнлекләр, яки имезүчеләр

   -Туганда җәнлек балалары  йомык күз белән туалар, көчсез булалар. Аларны әниләре сөт имезеп үстерә (русча-млекопитающие, борынгы сүз “млеко” “молоко”, “сөт” дигәнне аңлата). Күпчелек җәнлекләр балалары турында кайгырта, дошманнардан саклый, азык эзләп табарга өйрәтә. “Ачыклагыч-атлас”тан  хайваннарның төрле төркемнәрен табып, алар турында тулырак укырсыз.

    Физминутка

    Микс-фриз-групп

   -Көй яңгырагач бии башлыйбыз. Туктагач катып калабыз. Мин сорау әйтәм. Шул сорауның җавабында нинди сан булса, шукадәр кешедән торган төркем туплыйбыз.

    Сораулар:

    - Бөҗәкләрдә ничә пар аяк бар?

    - Кошларның ничә аягы бар?

   V Беренче ныгыту.

 Эш дәфтәрләре белән эшләү. № 1, бит 58

 1.Земноводные (җир-су хайваннары)

 2.Черви (суалчаннар)

 3.Моллюски

 4.Ракообразные (кысласыманнар)

 5.Иглокожие (энәтирелеләр

 6. Паукообразные (үрмәкүчләр)

 7.Пресмыкающие  (сөйрәлүчеләр)

   VI  Конэрс

   1 почмак – кошлар

   2 почмак – балыклар

   3 почмак – йорт хайваннары

   4 почмак – кыргый хайваннар

   -Төрле халык әкиятләрендә хайваннар образы еш кулланыла. Әгәр сезгә дә ниндидер тылсым белән шул хайваннар образына керү мөмкинлеге бирелгән икән, сез кайсысын сайлар идегез? 2-3 секунд уйлыйбыз, һәм дәфтәр битенә язып куябыз. Ә хәзер үз почмагыгызны табыгыз, шунда барып басыгыз.

     VII Таймд-пэа-шэа

    -Үзегезнең төркемнән булмаган партнер белән парлашыгыз. Бер-берегезне сәламләгез.

   Ни өчен бу төркемне сайлавыгызны бер-берегезгә  аңлатыгыз. Һәр укучыга 30 секунд вакыт бирелә.

   Иң беренче кемнең буе озын, шул укучы башлый.

VIII Йомгаклау.

    -Бүгенге дәрестән сез үзегезгә нинди яңалыклар алдыгыз?

    Билгелә кую.

Өй эше Дәфтәрдә эш № 2, бит 58

              Дәреслектәге материалны укырга, 86-87 бит.