Белем иленә беренче адым әлифбадан башлана
статья (1 класс) по теме

           Белем иленә беренче адым Әлифбадан башлана.

             Кабатланмас балачак иленең иң зур бәйрәмнәрнең берсе - Әлифба бәйрәме. Җир йөзендә кем генә булмасын, кайда гына эшләмәсен, ул зур дулкынлану белән үзенең нәни кулларына тәүге тапкыр Әлифба китабын алганын искә төшерә.

        Үсеп җиткәч , нинди һөнәргә ия булса да – эшчеме ул , игенчеме , укытучымы , әллә журналистмы , инженермы , генералмы , беркем дә балачакта шушы беренче уку китабын читләтеп уза алмый .Чөнки һәркемнең дә белем дөньясына беренче адымы Әлифбадан башлана.

             Безнең Иске Богады урта белем бирү мәктәбендә дә зур бәйрәм -“Әлифба бәйрәме”булды. Әле 1 сентябрь иртәсендә генә мәктәп бусагасын тәүге тапкыр атлап кергән нәни дусларыбыз мәктәп дигән белем йортындагы беренче җиңүләрен бәйрәм иттеләр.

          Хәрефләр белән танышу, алардан иҗекләр, сүзләр төзү җиңел булмады. Тик алар югалып калмадылар тырышып белем алдылар: укырга, язарга өйрәнделәр.Әлифба аларны матур языргада өйрәтте.Шунлыктан сыйныфыбыздан район күләмендә үткәрелгән “Алтын канат”дигән конкурста катнашып Шарафутдинова Амалиябез 2 нче урынны яулады.

           Балаларның Әлифбаны яхшы үзләштерүендә әти-әниләрнең дә өлеше бик зур. Бүген безнең сыйныфта һәрбер бала укый, яза белә. Укуны энә белән кое казуга тиңлиләр. Димәк, без сезнең белән бергә бик зур хезмәт башкарганбыз .

          Бәйрәмебез котлы булсын! Тагын шундый бик күп, бик күп хезмәт уңышларын бәйрәм итәргә насыйп булсын безгә! Сезгә һәркайсыгызга шатлык-куанычлар, ныклы сәламәтлек, яңадан-яңа уңышлар телим.

                                                                                      Эльза  Назмиева,

                                                                     Иске Богады белем бирү мәктәбенең

                                                                        башлангыч класслар укытучысы.