Рассказ -азкс " Щавань щавазе"
творческая работа учащихся

                                                                          Щукина Алинась

                                                                          4 –це классонь ученицась

                                                                          МБОУ « Сосновская СОШ»

                                                                         Зубово-Полянскяй  районцсь

                                          Сосновка поселкась

        АЗКС

                                     Монь щавань щавазе.        

        Монь щавань щавазе шачсь войнада инголе, 1925-це кизоня. Сонь лемоц Наста. Семьясост шабада ульсь лама, эрясть беднайста. Школав ашесть яка, сермадома и морафтома исть машта. Нинге иднякс щавань щавазе покадсь паксяса, лезнось тядянцты. Мзярда ушедсь Великай Отечественнай войнась, Настаньди  топодсь 16 киза. Аляц и альняканза тусть фронту. Вели лядсть аньцек сире атятне и идь мархта аватне.

           Настянь путозь конюхокс. Ся пингть колхозса ульсь целай табун алаша. Щавань щавазе идь прясонза якась алашатнень меле: аннезень, урядцозень вастснон. Кизонда, сонць ластя алаша лангса, шобдава ранакиге сявондезень алашатнень лугав, шить панцезень меки стойлав, тоста сявондезь синь покадема. Мзярда шоподи, табунть тага сявондезь лугав ярцсема. Веть алашатнень эса ванондсть кафтонь ломань, сяс мес лугать меле ушеды  вирьсь, коса ламоль врьгазда. Веть врьгасне марясазь алашань шинеть и ушедыхть урондома.

       -Кода минь пелендемя, уноконяй, - азондь щавань щавазе монь тядязеньди,- ушедыхть врьгасне урондома, а минь локшеса пакордфтяма, бта ружьяса ляцентяма или ляйть трвас тол крьвястяма. Стане етафтсаськ венять. А лияста и пялевешкада алашатнень пансеськ стойлав, сяс мес врьгасне пачкочнесть  табунть малас, а рана шобдава меки лугав.

      – Аф стане пелендеме эсь инксонок, уноконяй, кода алашатнень инкса. Алашатне велеса тиендезь сембе стака тевть. Усксесть тише колхознай жувататненди и велень эряй ломатнень тракснонды, соксезь паксятнень, усксеть пенгат. А нинге алашатне ульсть машина вастс, кизонда телегас кильнезь, тялонда-нурдсь, и ломаттне арнесть базару, больницяв лия велес или райцентрав.

        Тялонда алашатнень меле якамс ульсь сяда стака. Ведь картнень эса ашель. Шити кафксть синь сявондезь симома ляйть лангс,а тялонда  керсесть кувака эйваря. Сявондезь аф сембонь марса, а 10-шкань алаша.

      -Щавай, а кода алашатнень ульсть лемсна?- кизефнезе тядязе.            

     - Мазыхть ульсть лемсна, уноконяй, и сембонь лият, хоть алашада табунть эса ульсь 50-шка. Мон мяляфтан тяфтама лепт: Ловня, Лопаня, Варма, Атям, Уле, Улька, Толня,  Вишкя, Машаня. Каждай лемсь пяк лацсесь азоронцты. Кепотьксонди, Вармась пяк вишкста арнесь, Лопанясь ульсь пяк мазы, Ловнясь-акшеня, Машанясь-пяк сетьмоня и стак тов.

          Монь щавань щавазе  сидеста азонкшнесь табунонц колга, а сонцень лятфнематнень эзда мзолдсть трванза.  Хоть и эряфсь ульсь пяк стака, но ломаттне эрясть дружнайста, и лядыкс кусок кшиняснон явондозь фкя -фкянь мархта. Покадемада меле, илять, лисендшнесть ульцяв кштима-морама.

          Мон щавань щавазень няендине аньцек фотографияса, сяс мес мзярда шачень, сон уже кулофоль. Но тядязе лама азондсь колганза, и мон  содаса сембе сонь эряфонц, и фалу карман лятфнема сонь. И монь азксозе аньцек фкя ёмла пялькскя щавань щавазень эряфста.