Сочинение «Монь ошом, косо мон эрян.»
план-конспект урока (6 класс) на тему

«Монь ошом, косо мон эрян.»

               Мон эрян сехте мазый ды ванькс ошсо. Те ошонть лемезэ Саранск. Саранск ошось - прявтош минек Республиканть. Саранскоесь промышленной ды  культурной ош. Сонзэ эйсэ ламо театрат, музейть, школат, покш мазый кудот. Сон эрьва иестэ касы ды мазылгады. А кодат мазыйть Саранскойсэ ульцятне!  Эйстэст ламодо 250. Минек ошсо улить ульцят: А.С.Пушкинень лемсэ, А.И.Полежаевань ульця, Никуль Эркаень, космонавтонть Ю.Гагаринэнь, Герман Титовонь, В.Терешковань ды лия лемсэ ульцят.  Ламо ульцят кандыть седикелень лемть, конатнень умок уш стувтызь. Монь ули мелем ёвтнемс неть ульцятнень ланга.

            Аволь васоло стадиондонть "Старт" ули а покш ульця, конань лемезэ Якстере (рузокс Красная). Седикелень шкасто сонэнзэ мерильть Кузнечной ульця, тесэ важодсть кузнецт. Ульцянть кувалт юты покш ки. Ямщиктне ды микшницятне, конатне якасть эсесть тевест ланга, тесэ стакшность кшнинь алксст алашаст туртов.

              Рабочой ульцянть лемезэ  седикеле ульнесь Заводской. Те ульцясонть ульнест ламо заводт. Те ульцясонть ульнесть строязь крахмальной ды винокуренной  заводтне.

             Сехте покш минек ошсо - те Советской ульцясь. Сон появась, зярдо Саронскоесь ульнесь крепостекс. Те таркасонть седикеле ульнесь найман, секс ульцянть лемезэ ульнесь Базарной. Ней тесэ арась найман, но улить ламо мазый служебной ды эрямонь кудот. Советской ульцясь - те седей минек ошонок. Сон кармась ней пек мазый ды покш.

              Главной площаденть  минек ошонть лемезэ Советской. Седикеле тензэ мерильть - Соборной, секс што тесэ аштесь Спасской соборось. Революциядо  мейле сон ульнесь калавтозь, сонзэ таркас строясть Правительствань кудо - Дом Советов. Советской площадьсэ ашти  ашо кудо, косо важодить минек Мордовиянь прявтонок ды сонзэ советникензэ. Каршонзо якстере кудо, те городской администрациясь. Те сех пек ташто кудось минек ошсо. Од иестэ площаденть куншкас путнить покш ды мазый куз. Эйкакштнэнь туртов тейнить сказочной замокт, нурсемат, эрьгелемань пандынеть. Кизна тесэ ютавтыть эрьва кодат конкурст эйкакштнэнь туртов. Эрьва кизна арси артовксонь конкурс асфальт лангсо. Эрьва тюсонь порсо сынь артыть, мезе сынь бажить: эсест ошост, ялгаст, аваст ды тетяст, тонавтыцяст, вечкевикс каткаст. Советской площадсэ вечкить эрицятне пурнамо праздниктнестэ. Тесэ сынь киштить, морыть цела чи.

              Советской ульцясо ули вейке площадь - Победань. Сонзэ лангсо путозь мемориал кулозетненень Великой Отечественной войнасо. Куншкасо - монумент "Мать - Мордовия": авась мокшэрзянь оршамосо баслави эсензэ цёранзо - солдатонзо Отчизнань ванстомо. Памятник икеле палы Пингень тол. Сон зярдояк а мади, истя эряви улемс, минь а стувтсынек нетнеь, кить эсть пачкодть  войнасто. Удалост  ашти балюстрада. Тесэ мраморной плитатнесэ сёрмадозь лемтнэ минек земляктнэнь, конатне максызь эсест эрямост тюремасто янтнэнь марто. Сынь вансть эсест кудост, косо чачсть, ошост, косо эрясть, вечкевикс Мордовиянть ды весе покш масторонть.

          Изнямонь чистэ площадсэнть ютнить торжественной митингт ды парадт. Тезэнь сакшныть од ломатне урьвакстомань чистэ. Тестэ тукшныть армияв призывниктнэ. Мемориалонть бокассо - музей. Тосо тон неят оружия, конанть марто минек солдатонок яксесть тюреме войнасо, землянкась - сон ульнесь сыненст кудокс. Музейсонть ламо фотографият. Кодат сынь ульнест одт. Сынст ульнесь мелест эрямс, те моданть лангсо, кенярдомс  эрямонтень. Ламо эсть сак кудов, сынь лиятсть тосо. Музеенть перька танкт ды пушкат. Сынь алкуксонь. Ансяк сынь зярдояк а кармить леднеме. Ансяк эйкакштнэ тесэ налксить войнасо.

        Изнямо площаденть вакссо Соборной площадь, косо ашти  кафедральной Свято - Феодоровской соборось.  Сон строязь аволь умок ды канды лем праведной воинэнть адмиралонть Российской флотонть Ф.Ушаковонь. Ф.Ушаков ульнесь ёроков флотоводокс. Сон служась морской офицерекс  Балтийской  флотсо, Донской флотилиясо. Мейле сон кармась командовамо Черноморской флотсо, конась кирдсь изнявкст  тюремстэ. Меельце эрямонь чинзэ ютавтынзэ Ф.Ушаков эсензэ имениясонзо Алексеевка велесэ, конась Санаксарской монастырь вакссо. Сон ламо ознось, сеедьстэ ульнесь сон монастырсэ  ды натой эрясь тосо келиясо. Ф.Ушаковнэнь путозь памятник, соборонть вакссо.

           Соборонть лия ёндо ули памятник - патриарх Никонень. Минь ловтано сонзэ землякокс, сон чачсь эрзянь велесэ Вельдеманова, аволь васоло Нижней Новгородто. Неть памятниктнень теинзэ Мордовиянь артыцясь Николай Михайлович Филатов. Соборной площадсэ ашти мазый, теке  налкшке, часовнясь преподобной Александр Невскоень.

Государственной музыкальной театрась  И. М. Яушева лемсэ.

                Советской ульцясь сюпав площадте. Вейкесь сынст эйстэ - Театральной. Театральной лемезэ секс, што тесэ ашти театра. Театрасонть максыть спектаклят кавто театрат - драматической ды музыкальной. Спектаклянь ваномо сакшныть аволь ансяк  покш ломанть, тев класснек сакшныть спектаклянь ваномо эйкакшт. Театральной площадесь пек мазый кизна, зярдо тесэ панжовить цецятне. Тесэ ули фонтан, конась теке покш цеця. Сонзэ вакссо - цецяпире ды эземть, косо оймсить ошонь эрицятне.

          Минек ошсо улить ламо  мазый лия ульцят. Монь ульнесь мелем сериадомс неть ульцятнень ланга. Сёрмадомам прядса истямо валсо, кадык касы ды  мазылгады минек ошонок.