Сценарий к закрытию межрегионального семинара, посвященного к году семьи.
занимательные факты

 Биленин јылына ла Туулу Алтайдагы эл- тергеелик университеттин 75- јылдыгына учурлалган «Билелик педагогика - калыктардын этнос культуразын чеберлеп корыйтан эп- аргазы» деп тергеелер ортодо   ӧткўрилген  билим-таскамал семинардын јабылтазы.  

1 вед.    

      Бўгўн Белтир јуртта ӧткўрилген «Билелик педагогика - калыктардын этнос культуразын чеберлеп корыйтан эп- аргазы» деп тергеелер ортодо   ӧткўрилген  билим-таскамал семинардын уч-турултазына једип келдибис. Республикабыстын башка-башка аймактарынан келген ўредўчилер бийик билгирлериле, ченемел устарыла, чечен ле терен кӧгўс байлыгыла бисти кайкадып оморкоттыгар.  Кандый ла ченемелде турушкан ўредўчи ол јаан билгир телекей, ундылбас бийикте јаркынду јылдыс болуп, Эре-Чуйдын эл-јонынын кӧксинде артар.

2 вед.

      Адакы сӧсти «Туулу Алтайдагы эл- тергеелик университетте география ла ар-бўткенди тузаланар кафедразынын доцентине, педагогикалык науканын кандидадына Эмма Васильевна Екеевага бередис.

 1 вед.      Эмди «Кыдат Тебекованын адыла адалган  Белтирдин орто текши ўредўлў школынын»  Кош- Агаш аймак ичинде «Алтын Арабеск» кӧрўзинде Гран-При  алган, республикан ла бастырароссиялык кӧрўде јенўчил болгон, калыктар ортодо  ӧткӧн кӧрўнин лауреады  «Экпин» ӧмӧликтин бијезин уткыгар.

1 вед. Айылдап келген айылчыларыс,

Амадугар бўдўп турзын.

Ыраактан келген айылчыларыс,

Ырыс, сўўнчи слерге болзын.

2 вед.

Эре-Чуйдын салкыны

Эркелеп слерди сыймазын.

Арчын сынду Алтайыс

Араайын слерди алказын.

1 вед.

Јанжыканы аайынча  алтай калык айлына келген айылчыны алкап, кур курчайтан.

Эмди тӧргӧ Улалудан келген айылчыларды кычырадыс.

2 вед

Алтайыстын јўреги

 Сўўген кала Улалу.

Ар- бўткенге ороткон

Кудайыстан курчулу.

Улалунан јол алган

Улустары бу туру.

Айылчыларды качан да

Аткарбайдыс бис куру.

Ижигерде једимдер уткызын.

Билегерде ырыс ла амыр болзын.

1 вед.

Тӧргӧ  Маймадан келген айылчыларды кычырадыс.

Кадын суунын тыныжын

Алганча келди эл- јоны.

Манјўректин јылузын

Ӱлешти бисле эл- јоны.

Майма аймак эзенин

Калыгынан бис алдыс.

Келгенеерге быйан деп,

Бу курларыс курчайдыс.

2 вед.

Эмди тӧргӧ  Чамал аймактан келген айылчыларды кычырадыс.

Сартакпайдын каалгазы

Тегин не ачылатан?

Кара –Кӧлдин чакпыны

Калас не чайбалатан?

Межеликти ӧдӧлӧ,

Айылдап келди эл-јоны.

Илбизинге оронгон

Бисте Чамал калыгы.

Ар чыдалар кӧп болзын,

Арга кўчигер астабазын.

1 вед.

Тӧргӧ  Шабалин аймактан келген айылчыларды кычырадыс.

Јебрен корымдар шулурты

 Кенете кайдан угулды?

Таш бичикте јуруктар

Кӧс алдыма тирилди.

Бу куулгазын тарманы

Экелген биске Шабалин.

Јеринин эзенин јетирген

Кӧрзӧӧр, јаражын элинин.

 Чыгып келген айга тўней

Чырайаар слердин јаркынду болзын.

2 вед.

Тӧргӧ  Кан-Оозы  аймактан келген айылчыларды кычырадыс.

Тӧгӧрӧк, Улужай, Теректи

Сын тайгалар эдегинен,

Тӧрт ӧзӧк белтиринин

Сўрлў јоны бу келди.

Кӧдўрген, Чарыш суулардын

Эзенин биске јетирди.

Кан- Оозы аймагынын

Калыгын бис уткыйлы.

Ырыс, сўўнчи, су-кадык

Ылтам слерден ырабазын.

1 вед.

Тӧргӧ  Кӧксу-Оозы  аймактан келген айылчыларды кычырадыс.

Кадын- Бажы – Ӱч-Сўмер.

Калыгыстын ийдези.

Рерих кайкап јураган

Республикабыстын толугы.

Калык- јоны озодон

Кӧгўс- байлыгын  кичееген.

Оймон ичинде эмдиге

Ойгор калык јуртаган.

Алтай јеригер амыр турзын.

Албаты-јоныгар эзен болзын.

2 вед.

Тӧргӧ  Ондой  аймактан келген айылчыларды кычырадыс.

Себи бажын ажала,

Салкынла кожо кожондоп,

Урсул суула јарыжып,

Калык јоны јет келди.

Ондой аймак эспегин

Ончобыска экелди.

Санаа- кўўнер омок болзын,

Сананганар бўдўп турзын.

1 вед.

Тӧргӧ   Улаган  аймактан келген айылчыларды кычырадыс.

Алтын- Кӧлдин јаражы

Телекейде јар эмей.

Улаганнын эл-јоны

Јайалталу, бис билбей.

Кызыл каалга ачала,

Келди биске эл-јоны.

Алкап курыс курчайла,
Айдадыс быйанысты.

Бала- баркабыс ырыс тапсын.

Кўннин чогы улай тийзин.

2 вед.

Бўгўнги семинар учына јетти.  Кажы ла кижи бу семинарды сананып јўрер деп иженедис. Јаны билгирлер, јаны нӧкӧрлӧр бой- бойыгарды ундыбагар, ўредўчи адысты бийик тудуп јўрели! Качан бирде јол келишсе, айылдап јўрўгер деп сурап турубыс.

  1 вед.        Бистин тӧрӧл школыстын ӧмӧлиги слерге кожонын сыйлайт.