Келән мартҗв гихлә, кенәхнәв гиҗ санхви?!
статья ( класс) на тему

« Келән мартҗв гихлә, кенәхнәв гиҗ санхви?! »

                                                                                            Саңhҗин  Бося.

Төрскн келнәннь тускар келвр бичтн гисн даалhврта цаас авчкад ,кесгтән  ухалув .Ода юн гиҗ  бичхүв ?  Бичхләрн, омг орулх, седкл байрлулх ,өргмҗтә  тоолвр төрүлх чинртә келвр бичх  седклтә биләв .Болв уханасм учрсн нег hундлта  йовдл  мел hарлго бәәв.

 Найдгч  җилмүдин эклцәр хамдан  көдлдг багшта  хоюрн Ессентуки балhснур амрлhнд одувидн .Зуни цаг  билә. Амрчах  улс  олн: мана  орн- нутгинчн, hазадын орн-нутгинчн әмтн үзгдәд бәәв. Хасгас ирсн  баhчуд үзгдв, моңhлмуд чигн үзгдв. Хасгуд   намаг үзчкәд, эврәhәрн нег юм келлдәд, hарарн дайлн  мендлв. Нанла хамдан йовсн багшм хар маңhд келн күн билә. Теднә келн хасгин келнлә ирлцдгчн, тегәд эн келсинь медәд бәәв. Дәкәд нег йовҗ йовхламдн хальмг күүнә чирәтә дөнтә - тавта күүктә баахн бер мана нүднд тусв. Эн мана  hазра күн болхий, угай гиҗ, нанас нәәҗм сурҗана. Өөрдәд ирхләнь медхговидн гиҗ би хәрү өгүв. Күүкд күн күүктәhән күүндн йовҗ  өөрдәд, давад hарв. «Не, хальмгий, угай?» - гиҗ нәәҗм сурҗана. «Хальмг», - гиҗ би келүв. «Яhад медүвч?» - гиҗәнә. «Мадн, хальмгуд, нег - негән чирәhәрн таньдувидн», - гиҗ хәрү өгүв. Яhҗ үнәртән таньсан би нәәҗәсн нуувув, юңгад гихлә келхдән ичүв әмәвүв. Баахн бер бичкн күүктәhән орсар күүндҗ йовла. Тегәд би дотран hундҗ санув: «Мана баhчуд эврә келәрн күүндхш, хальмг бер боллта». Һундл төрхд, терм үнн бәәҗ: Элстүр тер берлә хамдан нег самолетар нисҗ ирләвидн. Тер җилмүдт баhчудын кесгнь төрскн келәрн күүндхдән нам эмәдг билә. Зуг цаг селгәтә гиhәд келчксн биший. Тегәд мана төрскн хальмг келн дәкнәс күч авад, өргҗәд йовад одх биз гиҗ нәәлҗәнәв.