«Авань вайгяльсь тяниень пингонь мокшень поэзияса».
план-конспект урока

               Темась:«Авань вайгяльсь тяниень пингонь мокшень поэзияса»

Урокть вешфксонза-целенза:

Образовательнайхть:

1) максомс тонафнихненди содамошит аватнень-поэтессатнень П.Алешинать, М.Малькинать, Р.Орловать творчестваснон колга;

2) касфтомс содамошиснон тяниень пингонь поэзиять коряс.

Развивающайхть:

1) кърхкалгофтомс иттнень творческяй и самостоятельнай тевонь маштомашиснон;

1) кемокстамс выразительна лувомань и корхтама маштома навыкснон;

2) тонафтомс арьсема, кемокстамс маштомошиснон стихотворениянь анализировандамаса.

Воспитательнайхть:

аватнень-поэтессатнень творчестваснон вельде касфтомс и кемокстамс тонафнихнень кельгомаснон мокшэрзянь литературати, шачема-касома кяльти, перьфпяльти.

Оборудованиясь: М.Малькинать, Р.Орловать, П.Алешинать портретсна, книгасна, моросна, стихонь сборниконь выставка «Ару эшиня поэзиясь!», презентация, персональнай компьютерхт, мультимедиа.

Урокти цитататне:

«Лирикась – тя кяшф эпос: и нюрьхкяня лирическяй стихотворенияса кой-коста азови сняра, мзяра азови оцю эпическяй произведенияса»

М.Пришвин.

«Поэттненди инь оцю должностсь – Ломанць.

Поэтонь ваймось правданкса крьвястьф»

И.Кудашкин

Урокть ёрафтомань формац: урок-диалог.

                                          Урокть планоц:

1​ Урокти вешфксонь-целень путомась – 2 мин.

2​ Ётаф материалть лятфтамац (тестовай заданият) – 3 мин.

3​ Учительть ингольдень валоц – 5 мин.

4​ П.Алешинать творчестванц ваномац – 10 мин.

5​ М.Малькинать творчествац – 10 мин.

6​ Р.Орловать творчествац – 10 мин.

7​ Урокть итогонза – 5 мин.

                                         Урокть молемац

I​ Ётаф материалть лятфтамац

Тонафнихне персональнай компьютерса тиихть тестовай заданият:

«Кинет валхне?»

1​ «Кизонда, вирняй,

Пиже лопаняй,

Пси, мани шиня

Шида кяшиняй…»

А) З.Ф.Дорофеев

Б) М.И.Безбородов

В) И.П.Кривошеев

2) «Идняй, удок. Весь пяк шобда.

Монцьке катк удан.

Ванды антте танцти товда,

Нармоння кундан…»

А) И.П.Кривошеев

Б) М.И.Безбородов

В) З.Ф.Дорофеев

3) «Ах, од пинге, од пинге, од пинге!

Пиже пораня, цефкс, Кинель-ляй,

Миньдонк павазу пингоц аш киньге,

Миньдонк весялат архтака няйхть!..»

А) П.С.Кириллов

Б) М.А.Бебан

В) А.М.Моро

4) « Зиян пяк оцю сатозе весть Раянь:

Сон комась симома, мянць ляйти Васькац –

Фкя сяка павазоц и надияма вастоц.

Юркштадсь прокс лием сюретнень пачк каяма…»

А) А.Д.Куторкин

Б) Т.А.Кирдяшкин

В) И.П.Кишняков

5) «Сась сияне, коза кадондсь

Лямбе, валда пильгокит,

Коса тянемс стаки лядондсть

Кудонь тефне апак тикт…»

А) А.К.Мартынов

Б) И.А.Калинкин

В) А.С.Малькин

Заданиятнень тиемда меле тонафнихне озсихть вастоваст.

II. Тонафтыть ингольдень валоц:

ТОНАФТЫСЬ: Шабат, тячи минь карматама корхтама тяниень пингонь поэзиять колга, а сяда лац азомс, ванцаськ авань талекать мокшень поэзияса.

Мзярда минь арьсетяма тяниень пингонь поэзиять колга, то сон арси инголенк оцю ляйкс, кона эсь кинц лангса васьфни од шудерькскат, ляйнят и эрек лихтибрят. Кажнайть эздост сонцень киц-яноц, сонцень вайгялец, горьфонь-жольфонь мороц. А марса тиендихть цебярьдонга цебярь тев: морасазь козя и аф фкя лацонь эряфоньконь, няфнесазь сонь павазонзон, кенярдеманзон, пичефксонзон.

Кунара ни корхнихть, што эрь поэтсь серматкшни эсь эряфстонза. Тя виде, вдь эсь сельмоса няйфть-шарьхкотьфть фалу улихть эсь тюсонзовок. И сяс, мзяра народть поэтоц, сняра сонь литературасонза и художественнай эсь лацонь тюстовок. Но виде и сявок: поэзияв эсь кицень, эсонза эсь тюсцень мумасна – тевсь аф теждя.

Эрь поэтсь эсь стихонзон эса ерай тейнек няфтемс тематнень, конат таколфнесазь ломаттнень ет Масторсь шачсь, конат кармайхть таколфтома эсонк, мзярс Масторсь аф юмай-арай. Тя: кельгомась, эрямась, куломась, ваймонь валдсь и шобдась.

Мекольдень кизотнень мокшень поэзияса появась аф кржа од лем. Синь етксост и авань лептка: Полина Алешина, Мария Малькина, Рая Орлова.

Шабат, а тянемс минь ваноме хоть фкя авань-поэтонь творчества? Виде, аш. Тинь лац содасасть Валентина Мишанинать творчестванц, но минь ваноме эсонза кода прозаиконь и драматургонь. Виде, «Мокша» журналть страницасонза тяни печатлакшневихть Валентина Ивановнань стихонзовок, и, мон ба мярьголень, пяк удалафт, кода и сембе тяштьфоц тя талантливай авать.

Да, мокшэрзянь литературань поэзияса авань талекась аф оцю, но кда ванцаськ мокшэрзянь поэзиять генетиканц, то няйсаськ, што поэзияньке шачема-касома кармась авань унксста, поэзиянь пацяв мяльхне лийкстасть авань эльста, поэзиянь васень валхне прасть авань кяльбряста. Вдь минь фольклороньконь ванфтыенза ульсть ават. Фольклорса пяк оцю васта занцихть моротне, а морайсна пцтай фалу аватне. Идень фольклорсь – нюрямонь моротне, кштиньгайхне, пеетьксне – аваннет; синь морайсна – тядятне, бабатне, щаватне. Свадьбань пъцтай марнек поэзиясь – моротне, урняматне, аварьфнематне – тага авань творчествась.

И, кда азомс видеста, эрь мокшавась кой-конашкада поэт; поэт марнек эрямань-ащемань койхнень, национальнай ила-кърдань коряс.

Тинь кудонь тевонте ульсь – анокламс сообщеният мокшаватнень-поэттнень колга, тонафнемс синь стихотворенияснон. Эрь, ванцаськ аватнень-поэттнень творчестваснон.

Кати онцтон ся ульсь, кати шить…

Аньцек кенерень сельмонень кончамс,

И монь инголен лиссть кафта кит,

Кода ёфксса. Да конанц, шта, кочкамс?

Ня валхне Полина Владимировна Алешинать. Тяфта арьсезь кочказе литературав эсь кинц поэтессась.

Ш. Тонафнись азонды Полина Алешинать колга:

ТОНАФНИСЬ: Полина Владимировна Алешинась шачсь 1950-це кизоня Ковылкинскяй аймаконь Ёжка велеса. Аделазе Мордовскяй госуниверситетть. Филолог. Работай Ковылкина ошень 15№ профтехучилищаса. Стихонь сермадома ушедсь нинге студенткакс. Нолдась поэтическяй кафта сборникт: «Тят ёта вакскан» (1996 кизоня) и «Азка, варма» (2004 кизоня). Полина Владимировна - Россиянь Писателень союзонь член. Сонь стихонза сидеста лисендихть «Мокша» журналса…

Полина Алешинать стихонза кельговихть, мяляфтовихть. Тяштьфт теждя кяльса, моразь моравихть. Авань лямбе пожф и кърхка смузь моли сонь стихонзон эзда. Поэтессать лирическяй героиняц машты муворунь простяма, кяжень аф пандома. Якстерь сюрекикс таргави Полина Алешинать поэзияса темась – аф аердамс, аф нильгодемс эряфонь кальдяв ширеда, маштомс перьфпяльть примамс стамкс, кодама сон ули.

ТОНАФТЫСЬ: Шабат, азондода Полина Алешинать творчестваста стихотворения.

Тонафнись азондсы «Шачема крайняй» стихотворениять.

ТОНАФТЫСЬ: Лувсы стихотворениеть.

Кизефкст:

ТОНАФТЫСЬ: Шабат, тусь мялезонт тя стихотворениясь?

ТОНАФНИСЬ: Да, тусь.

ТОНАФТЫСЬ: Кодама проблемат кепси авторсь?

ТОНАФНИСЬ: Авторсь азонды кода мазы шачема-касома ширеньке, кепси кизефксть кяльть ванфоманц колга, што сире койхне эрявихть ванфтомс.

ТОНАФТЫСЬ:Кода шарьхкодьсасть валхнень: «Штаян – лангсот сельмоведне»?

Тя валхне корхтайть ломанть кеме сотксонзон колга шачема ширети.

ТОНАФТЫСЬ: Мезе синь вельдост ёрась азомс авторсь?

ТОНАФНИСЬ: Геройсь пяк кельгсы шачема ширенц. Сон пяк лажаткшни куду. Эрь ломанть кенярдеманцты аш пе, мъзярда сон няйсы тя мазышить.

ТОНАФТЫСЬ: Мезьса тя стихотворениясь мала фольклорнайти? (Кирьфтамань-ляпошинь суффиксне).

ТОНАФНИСЬ: Сон бъта мор морави, ёфкс азондови.

ТОНАФТЫСЬ:Кодама изобразительно-выразительнай средстват васьфневихть тя стихотворенияса? Сермадость тетрадезонт.

Тонафтысь:

ТОНАФТЫСЬ: Озаф ёнь поэтокс няеви тейнек П.Алешинась. Сон саласыне мяльхнень мазы, кода ни азость, моразь морави кяльса-валса, лама пяльде эряфонь няемасонза. Мъзярда мон лувсайне сонь стихотворениянзон, инголен бта стяй покойнай щаванязе. Сон тяфтама жа кяльса-валса азонкшнель и морсель тейнек, эсь уноконзонды, народнай морот.

Полина Алешинатьке стихотворениянзон Н. Рузанкинась и И.Сургаев латцезь музыкас. Кулхцондость.

(П.Алешинать стихотворениянц коряс мор)

IV. Тонафтысь:

ТОНАФТЫСЬ:Мария Ивановна Малькина. Азомс видеть, П.Алешинать кармаме содамонза аф прокс тячи; нъльне афи исяк. А вов М.Малькинать лемонц азомста кой-кие эздонт абонгоды. И виде, минь мархтонт содасаськ сонь кода пяк цебярь критиконь. Статьянза сидеста лисендихть «Мокша» журналса. Но, шабанят, Мария Ивановна сермады и стихотворениятка. Синь эздост аф лама, но конашкава арьсефтихть! Васенцеда сонь стихотворениянза лиссть 1995 кизоня «Мокша» журналть кемгафтувоце номерсонза. (Учительсь няфтсы журналть тя номеронц) «Критиксь сермады стихт»,- тяштсь колганза Илья Девин. (Учительсь лувсы статьянять).

Тонафнихне азондыхть М.И.Малькинать эрямань и творческяй кинц колга:

ТОНАФНИСЬ: Мария Ивановна Малькинась шачсь 1944-це кизонь январть кемнилиеце шистонза Ковылкинскяй райононь Малав велеса. Иван Егорович и Пелагея Федорона Малькиттне пяк кельгозь эсь емла стирняснон, кона шачсь войнань кизотнень. 1948-це кизоня сонь аляц кулось, вете итть лядсть тядянц видес: Архип, Паша, Володя, Татю, Маша… Идькс пингонди Машати угадявсть ашудонга ашу кизотне, нльне школав якамс савсь пакшень-пакш. Ашушить сюнеда сексень и тялонь якшама кофнень школав якамс ашель мезьса. Ашельхть тялонь щамонза-карямонза. Хуш тяфта, а тонафнемась макссевсь теенза теждяста. Етнесь класста класс фалу пяк цебярь оценкаса. Шумордамок школать, Мария Ивановна тонафнесь Зубунь педучилищаса. Меле «Якстерь» диплом мархта шумордазе Мордовскяй университетса филологиянь факультетть. Тернезь аспирантурав, но Мария Ивановна тусь работама Краснослободскяй райононь Од Синдру мокшень вели. Кемонь кизот сон тонафнесь итть. И аньцек фкя киза – Мордовиять эзда ширеса. Тушендсь Тульскяй области. Кода пара тоса ашезь уле, но седиец-ваймоц усксь куд шири, мокшэрзянь масторозонк. 1979 кизоня мрдась Мордовияв, а тяса васьфтезе ингольдень преподавателенц, содаф литературоведть Борис Ефимович Кирюшкинонь, кона тердезе работама научно-исследовательскяй институту литературань сектору научнай сотрудникокс. 1986 кизоня Мария Ивановна аралазе кандидатскяй диссертациянц. Тяни сон работай «Мокша» журналса.

Тонафтысь:

ТОНАФТЫСЬ: Мария Ивановна Малькинась сермадсь «Мезе тейнек эряви?» мокшень литератураса антология. «Ниле ават – ниле морот» книгаса, кона нолдаф 1998 кизоня Эстонияса колма кяльса, Мария Ивановна азсь мяльхть-валхт и кода поэт, и кода критик. Тя книгать презентацияц ётась минь школасонк, и Мария Ивановна Полина Алешинать и лия инжи мархта ульсь ширесонк. Эста тинь нинге ёмлатоледе, улема, аф мяляфтсасть.

(Учительсь няфтьсыне ня книгатнень, инжихнень автографснон)

Тонафнись наизусть азондсы «Макст вий аф кирнемс кяшнень ваймосон…» стихотворениять:

ТОНАФТЫСЬ: Кодама кизефкст арьсекшни поэтсь тя стихотворениясонза?

ТОНАФНИСЬ: Местема ломанць шачи масторлангу? Кода етафтсыне шкаень максф шинзон? Мезьса ломанть павазоц?

ТОНАФТЫСЬ: Кода арьсетяда, мес М.Малькинась аделазе стихотворениянц кизефксса?

ТОНАФНИСЬ:Эрь ломанть сонцень эряфонь философияц, сяс и ответтне кармайхть улема аф фкя лацоннет.

ТОНАФТЫСЬ: Тинь мяльсонт, сонць поэтсь шарьхкодьсыне сятнень, конат эряфонь кигя молемста юмафтозь сянь, мезсь ломанть тисы Ломанькс? ТОНАФНИСЬ: Аф шарьхкодьсыне, сяс мес сонць М.Малькинась аф тиеви мзярдовок синь лацост.

ТОНАФТЫСЬ: Кода арьсетяда, мес тя стихотворенияса лама строчкада-кизефкста?

ТОНАФНИСЬ: Эрь ломанць кандсы эсь эряфонь кинц, сонцень мяленза-арьсеманза, сяс теенза эряви мумс ся виде кизефкссь, кона тисы сонь ломанькс.

ТОНАФТЫСЬ: Мария Малькинать ламоц стихотворенияц ащи кизефксста и миньге кошардсамазь арьсемс. Кулхцондость тага фкя стихотворениянц:

ТОНАФНИСЬ:Кодак аньцек пяле венясь сай, Удомазе явай.

Марян: ичкозе, пирьф пенясонк Бта явси ава. Кинди тоса якамс-аварькшнемс? Шабрань кудсь вдь шава. Аф, аф онцтон. Шистон маряса: Стаки олькси авась. Валнянц фкянятьке аф шарьхкодян. Вайгялец лужаня… И эрь веня тяфта варьхмодемс Ораткшни нужанят. Мес, шта, ямбарсь прянянц шавонды, Вень-вень афи утци? …Ся, маряк, юкстаф Юрхтаванясь Явси шава кудса.

Кизефкст:

ТОНАФТЫСЬ: Коста авторсь сявозе Юрхтаванять образонц?

ТОНАФНИСЬ: Мокшень мифологияста, кудъетконь Шкай-авать образоц)

ТОНАФТЫСЬ: Мес явсезевсь Шкай-аванясь?

ТОНАФНИСЬ? Сон явси, сяс месс шамихть куд васстне, юмайхть-арайхть велетне.

ТОНАФТЫСЬ: Кода шарьхкодьсасть валхнень: «Валнянц фкянятьке аф шарьхкодян. Вайгялец лужаня…»?

ТОНАФНИСЬ? Мъзярда ломанць аварди пяк пичедезь, сонь валоц киндинге аф шарьхкодеви. Вов и тя стихотворенияса еройсь сяшкава пичеди, ризнай, што валняц аф азови, аф шарьхкодеви.

ТОНАФТЫСЬ: Мусть метафоратнень. Сермадость тетрадезонт.

ТОНАФТЫСЬ: Ужяль, мес аф содасаськ, кода М. Малькинась тиендезень поэзияса васень аськолксонзон. Тячи инголенк афкуксонь поэтонь стихт, эсост эряф-ащеф ломанень крхка и ризфонь качамняса архтф арьсемат. Васенда ванозь, поэтсь бта киндивок лиянди аф пшкятькшни, сон бта ораткшнесыне седиботмонь таколкшнеманзон и вяти поэзиянь эсь лацонь дневник, коза ширдень ломанти варжакснемс аш кода. М.Малькина путозе эсь талеканц мокшень поэзияв. Кялец козя, сонь валъёжесонза лац маряви народть кяль-валонь асувоц, смузец.

Мария Малькинать стихонзон эса арьсемат, пичефкст-таколдомат улихть, а одонь элякоткшнемат аш. Кода арьсетяда, мес? Виде, М.Малькинась стихонь сермадома ушедсь «поздна», аф од пингста. Но, шабат, кодама цебярь стихотвореният сон сермады! Кода азозе Е.И.Азыркинась, минь землячканьке: «Мондейне арам, М.Малькинать стихонзон лувомста марясак, кода тотнай авторть седиец…» Сон пяк лац шарьхкодьсыне тинге, оттнень, таколдомантень. Минь сембонь и сиретнень, и оттнень пичефтсамазь кизефкссь: «Мезе тейнек эряви?». Смузю ответ макссь М.И.Малькинась:

Мезе тейнек эряви? Кшиня, Кельме ведня, модамарьнят, салня,

Пара ялгань мелень пети валня, Менель тёшкста вандолды шиня.

Сатоль тевок. Да вдь улихть тяштть, Цифтордыхть, ве-вешка мяльхнень салсихть… Цератне стирняснон псиста палсихть, Люпшневихть стирнятне церань мяштьс. Мезе тага эряви? Вирнят, Тише лангса пиндол-вандол раса, Нармонь морот серень шуфта пряса. Кудста кудти такорготф кинят; Штоба мокшень велева-кува Свадьбань морхне сиденяста кайгольхть, Марявольхть эрь кудса шабань вайгяльхть. Улель поза – каванямс сувайть. Мезе нинге эряви?..

V. ТОНАФТЫСЬ: Да, аф стак Илья Максимович Девин мярьгсь М.Малькинать стихотворениянзон колга: «Азан аньцек фкя вал: ПАРХТ!»

А тяни ванцаськ од поэтессать, Рая Орловать,стихотворениянзон. Тя лемсь теенть аф од. Етай кизоть школасонк етафтоме лемозонза ила, 11-це класса,

мъзярда карматама тонафнема од поэттнень творчестваснон, ванцаськ соньге творчестванц.

ТОНАФНИСЬ: Раиса Константиновна Орлова шачсь 1963 кизонь 13-це октябрьста Мордовия Республикань Старошайговскяй райононь Сарга велеса фронтовик-шоферонь и кудазоравань семьяса сисем идь еткса. Н.П.Огаревонь лемса Мордовскяй госуниверситетонь филологическяй факультетонь аделамда меле работась шачема велесонза сельсоветонь оцюнякс, учительницакс школаса. Тяни эряй Саранск ошса.

Стихонь тяштема ушедсь нинге школаса тонафнемста. Синь лемтьфтольхть тядяти, ялгаксшити, васень кельгомати. Рая Орловать стихонза печатлакшневсть «Трудовая правда», «Мордовский университет», «Мокшень правда» газетаса, «Мокша», «Якстерь тяштеня» журналса. Сонь стихонза коми-кяльса лисендсть «Северная звезда» журналса.

1998-це кизоня Рая Орловась примаф Россиянь Писателень союзу. Тяни работай «Мокша» журналса.

ТОНАФТЫСЬ: Улихть поэтт, конатнень стихснон лувондолить и лувондолить, сяс мес эрь строчкаса кяшф крхка смузь, маряви потмошинь вий. Монь койсон тяфтамот стихонза Рая Орловать. Седиень таколфтыхть поэтессать тядяти лемтьф стихотворениянза, и тя лац шарьхкодеви – сонь кунара ни кулось инь кельгови ломанец. Кулхцондсаськ «Тядязти» стихотворениять.

ТОНАФНИСЬ: Сембодонга цебярь стихозе изь ладяв, Сембодонга мала ломанезе тусь. «Тядянязе-аванязе,- мон ювадян,- Ваймоняце-коволсь коза васта мусь?» Исяк улень кудсонк, станяк ащи сембось, Алязе урядцень кирдьсы коса-повсь. Каванямазь сиресь пянакудонь лямда, Аньцек сяка арьсян: улелеть ба тонць. Васьфтелемасть, тядяй, нинге орта лангста, Кизефтелеть савор: «Сизеть, щять, стирняй?» Казелемасть, тядяй, ваймонь пети ванфса: «Унокозе аля ни, етанзе, стирняй».

Классти кизефкст:

ТОНАФТЫСЬ: Кодама мяльхть шачихть седисонт тя стихотворениять кулемста? Кодама роль налхкихть кафтонзаф валхне? Лятфтасть, кодама жанраса сидеста васьфневихть кафтонзаф валхт?

ТОНАФНИСЬ: Рая Орловать лама стихотворенияц ладяф музыкас. Пъцтай сембе тяниень пингонь композитороньке латцесть сонь стихонзонды мелодия, синь етксост Василий Радионов: «Кизоня», «Акша лов»; Нина Кошелевась «Мокшень цера», «Од киза мархта!»; Андрей Пивкин (минь земляконьке) «Мон кърьвястян фкя штатолня». Кулхцондость фкять.

ТОНАФТЫСЬ: Шабат, Рая Орловать стихонзон эса лама нравственнай и философскяй вешфкста. Надиятама, што и сяда тов сон кармай кеняртьфнемонк эсь мазы и козя стихонзон мархта.

VI. Учительть мекольдень валоц:

ТОНАФТЫСЬ: Вов и шумардавсь тячиень уроконьке. Минь мархтонт ваноме колма мокшавань-поэтессань творчества. Мордовияса ават, стихонь сермадыхть, улихть и рустка, и эрзятка. Синь стихотворениясна печатлакшневихть «Сятко», «Мокша», «Странник» журналхнень и сембе республиканскяй газетатнень эса.

Кода арьсетяда, «авань» поэзиясь лия «аляннеть» коряс? Виде, авань поэзиять сонцень ликоц. Авась ваны, штоба кудсонза, коса сон эряй, улель фалу лямбе, валда. Пичеди, къда семьястонза кивок туй. Станя и поэзиясовок аватне-поэтессатне пичедихть марстонь кудоньконь, Родинаньконь, инкса. Пяк ризнайхть, што шамондыхть велетне, ломань седись казямготкшни, оттне тушендыхть павазонь вешема ширьгя, велетне шамондыхть, и катф куд юрхтова аварди-кольгонди Юрхтаванясь. Пяк видет Иван Кудашкинонь валонза, конат сявфт эпиграфонди тячиень урокти: «…Поэтонь ваймось правданкса кърьвястьф». Правданкса кърьвястьфт и аватненге-поэтессатнень седисна М.Малькинать, П.Алешинать, Р.Орловать. Катк тага нинге ламняс-ламняс валдопнесазь тейнек правдать ня колма аватнень седисна.

Шабат, тинь содасасть, што минь велестоноконга кулеви авань-поэтессань вайгяль. Тя Валентина Петровна Парваткинась-Кирдяпкинась. Сон ведьгемонь кизоть мала ни эряй Саровса, но аф юкснесыне эсь юронзон, кельгома Коцятов веленц. Лама стихотворения и мор сон ладясь кельгома веленцты, кяленьконди. Тинь лац сонь содасасть веленьконди лемтьф моронц, кона арась Гимнакс шачема-касома вастоньконди:

Шкайнять инголи аран, Кельгом велезти анан Лама павазу валда шит,

Сембе ширеста такор кит. Кода тядязе-алязе, Стане седизон повсть

Мокшень щапне и кялезе, Да родной Коцятовсь…

Пингсь лиезь лии. Курок тинь аделасасть школать. Ламонцне эздонт оду аф кармайхть тонафнемонза мокшэрзянь литературать, кода предмет, а, пади, конацка эздонт, кода 9-це классонь тонафниеньке Данилова Ольгась, карматада тинцьке серматкшнема шачема-касома кяльсонк стихотвореният… Кода ба афоль ладяв сяда товолдонь эряфонте, мон пяк еран, штоба тинь фалу мяляфтолесть минь мокшэрзянь поэтоньконь и лувондолесть синь произведенияснон, въдь, кода азозе Е.И.Азыркинась: «Лирикась съргозьфтьсы ваймоцень, ёнцень».

Урокть итогонза.

Питнень путомась.

                 Самоанализ урока родной литературы в 9 классе.

Тема урока: «Авань вайгяльсь тяниень пингонь мокшень поэзияса».

Данный урок является уроком внеклассного чтения. При планировании урока были учтены реальные учебные и творческие возможности учащихся: знание классиков мордовской литературы, умение читать и анализировать стихотворения, вокальные способности некоторых учащихся. На уроке решались следующие задачи.

1.Образовательные: познакомить учащихся с творчеством женщин-поэтесс П.Алешиной, М.Малькиной, Р.Орловой; углубить знания учащихся по современной мордовской поэзии.

2. Развивающие: развивать навыки работы с текстом, умение анализировать и делать выводы, навыки выразительного чтения.

3. Воспитательные: на примере жизни и творчества мордовских поэтесс П.Алешиной, М.Малькиной и Р.Орловой воспитать в учащихся чувства глубокой любви и уважения к своему родному народу, языку, Родине.

На уроке использовались различные формы работы: фронтальная, дифференцированная, групповая.                                                                           Применялись следующие методы обучения: словесно-репродуктивный, наглядный, частично-поисковый, исследовательский, практический.                Использовались средства КТ: персональный компьютер, мультимедиа.               Для проведения этого урока я подготовила презентацию, выставку книг современной мордовской (мокшанской и эрзянской) поэзии «Ару эшиня поэзиясь», небольшие тестовые задания. На доске висели цитаты из высказываний М.Пришвина и И.Кудашкина. Дети сами искали материал к уроку.                                                                                                                            Работа проходила в форме диалога учитель-ученик. Мне кажется, что структурные элементы урока взаимосвязаны, осуществлялся логичный переход от одного этапа к другому.                                                                            Была затронута и литературно-краеведческая работа, осуществлялись межпредметные связи (эрзянская и русская литература), связь с жизнью.    Чередование и смена видов деятельности обеспечивали поддержание работоспособности и активности учащихся на уроке.                                        Когда я проводила этот урок, в классе почти все девочки являлись участницами школьной фольклорной группы «Ляйня». Две песни («Ловня» и «Лаймоть ала») они исполнили сами.

Я считаю, что такие уроки очень важны. Они не только развивают творческие и образовательные способности учащихся, но и имеют большое воспитательное значение. Все задачи, поставленные мной на уроке, реализованы.