Читательская конференция по книге Я.Слушкина "Семья Кочкуровых"
план-конспект занятия (8 класс)

Ловномань конференция Яков Слушкинэнь «Семья Кочкуровых» книганть коряс

1 евтницясь

   Слушкин Яков Сергеевич чачсь ноябрянь 5-це чистэ 1911-це иестэ Кочкурова велесэ.1925 иестэ сон прядызе Кочкуровской колмо классонь школанть. Церыненть ульнесь мелезэ тонавтнемс, но тетязо, крестьянин-середняк,нейсь церанзо сокицякс-видицякс.

   Октябрянь 16-це чистэ 1926-це иестэ тетянзо-аванзо апак кевксте Яков Слушкин туи Шейн-Майданонь школав, мелезэ ульнесь тонавтнемс тосо. «Директорось арась, сон тусь Саранскоев, секскак кияк а приматанзат», - мерсть тензэ. Цела недля эри церась рузонь велесэ Майдансо,вейке ве уды вейке кудосо, омбоце ве – лиясо, учи,зярдо сы директорось. Окойники мелезэ топавтовсь – директорось сась ды сонзэ примизь тонавтнеме.

   1936-це иестэ пряды товароведэнь курсат ды важоди товароведэкс внешней торговлянь  министерствасо. Ульнесь зярыя минек томбале масторсо.

   1942-це иестэ Яков Сергеевич сы эсензэ родной велес - Кочкуровас. Важоди колхозонь завхозокс, мейле «Марс» колхозонь председателекс.

   1943-це иестэ аравтсызь сельпонь председателекс, а 1944-це иестэ саезь Яков Сергеевич Слушкин алтасы прянзо творческой роботантень, сермады «Семья Кочкуровых» романонть. Те романдонть башка сермады зярыя евтнемат ды очеркть. Примеркс, «Сильные люди», «Коневоды», «Садовод Рябинкин» ды ламо лият.

2 евтницясь

   Монь койсэ «Семья Кочкуровых» книгасонть авторось сех покш мель яви Сергей Кочкуровонь образонть невтемантень. Нама, авторось Сергеень образонть вельде невти весе неть ломантнень, конат стака войнань килангонть ютамсто получить ранат, аламодо лечамодо мейле велявтыть родной велетнес ды кармить колхозонь хозяйстватнень кепедеме.

   Сергей – Кочкуровтнень васень эйкакшост. Московонь сельскохозяйственной академиянь прядозь, сон туи эсь мельсэнзэ войнав. Войнань китне-янтнэ стакат. Но авторось Сергеень войнань тюрематнесэ а невти.Минь сонзэ марто вастовтано, зярдо сон, ранявозь ды Свердловонь госпитальсэ аламодо лечазенть мейле, велявты родной велев. Авторось васенцеде невтьсы сонзэ, зярдо сон валги Атяшева станциянтень. Уш истя сон тошнакадсь эсензэсетнень кис, истяшка сонзэ ульнесь мелезэ понгомс чачома-касома кудонтень, мик ашолгадомань апак учо сыргась кудов. Но тесэ «войнань кикстнэ» теизь эсест тевест. Вень перть ялго молемась госпитальде мейле истяк эзь юта. Сергей пры сэредеме, нама, сон пек и простудявсь. Сэредема шкасто церась невти эсь прянзо алкуксонь фронтовикекс. Тейсь истя, кода мерсь врачось, да и эсензэ ульнесь покш кемемезо, што пички. Эрямонь вечкемась теизе эсь тевензэ – сон сти пильге лангс.

   Тетянзо кевкстеманть каршо, косо карми важодеме, сон мерсь, што эсь велесэ.

   Вана Сергей Валыеева велень «Од веле» колхозонь агроном. Се шкастонть ульнесть покш а сатыкст робочей кедень. Да и косто сатыть, бути весе цератне войнасольть, велетнесэ ансяк ават ды подросткат. Вана истямо стака шкасто агрономокс кармась важодеме эсь Валыеева велесэ Сергей Кочкуров.

   Но сон эзинзе нолда кедензэ стакачитнень икеле. Тейсь весе сень, мезе эрявсь. Ды вана Сергей – председатель.

   Мелезэнь тусь Сергеень видечись ды смелчись. Зярдо сон кармась нееме, што тетязо кода завхоз эйсэнзэ а кунсолы, кода эйкакшонь, сон правления икелев аравтызе кевкстеманть, роботамс ли тетянстэнь завхозокс, ды сон ульнесь кармавтозь роботамо фермань заведущеекс.

   Пек ламо вий путсь, штобу стявтомс колхозонть пильге лангс. Войнань шкасто, зярдо а сатыльть а важодицят, а транспорт, сон сайнесь паксятнестэ аволь берянь урожай.

   Монь мельс тусь Сергей и личной эрямонть ладямсто: кода эзь ульне стака, но вечкема тейтересь Таня саезель никс.Эрямозо ладязель лувс.

   «Семья Кочкуровых» книгасонть главной героесь Сергей Кочкуров тейсь покш изнявкст эсензэ колхозсонть.Ульнесть строязь севонень селт, вармаведьгевть, строязь движок, теезель огородной бригада, косто урожаенть миеме якасть,мик, Саранскоев. Сергей Кочкуров лездась «Од веле» колхозонтень стямс пильге лангс. Од семиятненень, мик, строясь цела порядка од кудот.

   Нама, авторось те книгасонть арсесь, што сы истямо шка, зярдо те весе сови минек эрямос. Ды те истя лиськак. Алкукс, Кочкурова велес строязь од кудонь порядка, косо эрить минек велень од семиятне.

   Сергей пек вечкилизе эсь роботанзо ды свал бажась …….стакачитнень. Те пек неяви плотинань строямсто. Се шкане, ведь, кода ульнесь евтазь, мезеяк арасель: а лазт, а кирпецть. Но кода стака эзь ульне колхозниктне плотинанть строизь.

   Яков Слушкинэнь романсонть героесь сестэ уш арсесь строямс городок. Вана, ансяк ней минек Кочкуровас стявтсть истямо городок.

   Весе, се, мезе ланга арсекшнесь, совась минек эрямос.

3 евтницясь

   Танянь образоськак парсте невтеви «Семья Кочкуровых» романсонть.

    Таня эсензэ семиянть марто эрясь Псковсо. Семиясонть ульнесть  нилинест – тетязо Михаил Данилович, авазо Аграфена Александровна,Таня ды сазорозо Маша. Таня тонавтнесь Ленинградсо.

   Но зярдо жо ушодовсь войнась, тетязо кадовсь Псковс, а сазорозо аванзо марто тусть Средней Азияв, Танядо кодаткак кулят арасельть.

   Аграфена Александровна ульнесь Саранскойсэ, зярдо Маша тусь таркань вешнеме, козонь бу улевель лоткамс.

   Седе тов евтневи, кода Таня пачкоди Валыеева велес. Моли варштамо сэредиця Сергеень. Весть Сергей токась Ломаты велес, штобу вастовомс тейтеренть марто. Танянь мельс тукшнось сон, ансяк Танянь ульнесь вечкевиксэзэ, Гена, кона туекшнесь войнав. Аванзо мельс жо пек эзь тукшно эрзянь церась.

    Таня карми роботамо Ломаты велесэнть завпочтой. Мейле авазо кучтсы Рузаевкав важодеме. Тейтеренть арасель мелезэ туемс, но авазо эзь кунсоло, ды теде икеле сонсь тусь тов.

   Таня Рузаевкасо.

   Прядовсь войнась, Таня аванзо марто велявты Ленинградов ды карми тосо важодеме. Сеетьстэ кучнесь Сергейнень сермат, но мейле сынь кармасть сакшномо седе чуросто. Тувталось тенень ульнесь Гена, кона велявтсь войнасто кудов.

   Танянень сы велестэ Сергей. Тейтересь евтни, што Гена арси саемс сонзэ козикакс, ансяк сонсь Таня аламодо тенсэ кавтолды, секскак мери Сергейнень учомс вейке-кавто чи, ды мейле мезе лиси. Но Сергей мезеяк апак евта туи Московов. Таня учи эйсэнзэ, но, зярдо карми содамо, што церась тусь, сон оршасы пальтонзо ды лиси ушов. Сонензэ мезеяк эзь кадово, кода туемс а содавикс ошов вечкевиксэнзэ мельга.

   Таня пачкоди Московов, мусы Сергеень братонзо, ды сынь вейсэ молить Глезковтненень, козонь лоткась Сергей.

   Тейтересь арси туемс Валыеевав. Ды вана сынь тесэть. Таня лиси Сергеень экшс, ды сыненст максыть од квартира.

   «Семья Кочкуровых» романсонть тейтерь-аватнень ютксто сехте покш тарка явови Танянь образонтень.

   Васенцеде мартонзо вастовтано минь Атяшевань вокзалсо, козонь сась Ленинградсто. Тесэ вастови Валыеевань эрицятнень – Игнатычень, Федоронь ды Сафрононь марто.

   Сеске жо сонзэ аравтсызь Валыеева велень сельпонь бухгалтерэкс.

   Монь мельс тусь Танянь образось сень кувалт, што сон, кие соды косто сазь (Псковсто), вети эсь прянзо, кода эрзянь тейтерь, кона буто чачськак Валыеева велесэ – эрьва марто корты, эрьвантень сон малавикс.

   Войнань ушодомсто Таня тонавтни омбоце курссо. Сон а туи Ленинградсто, а кадови чувомо окопт, мейле понги портс, тосо сэреди. Весть сонзэ нолдасызь кудов родноензэ вешнеме, но сынь а муевить. Сон велявты одов Ленинградов, тосто Танянь эвакуировасызь самолетсо.

4 евтницясь

   Эйкакшт, Яков Сергеевичень книгадонть евтниде, евтнинк сонзэ романонть коряс войнань шкасто ды войнадо мейле аватнень стака роботадост.

   Да, неть аватне, конань ланга сон сермады, ульнинек минь – Кочкур велень аватне, «Од веле» колхозонь роботыцятне.

   Евтнеса автордонть сень, што сонзэ марто роботынь колхозсо, сон – председатель, мон – разноробочей. Колхозонь роботанть кис Яков Сергеевич путылизе оймензэ, ков бу аволинзить кучо, свал мериль: «Ават, скоренька роботадо, скоренька велявтодо, вейке пильгенк - тесэ, омбоцесь  тосо улезэ».

   А ней евтнеса, кодамо стака савсь синдемс тенек велесэ войнань шкань иетнестэ. Хоть уш фронтось тей эзь юта, но минь изнявксонть Гитлерэнь лангсо истя жо…………тылсэ, велесэ.

   Эйкакшт, паро эрямось тынк менельста эзь пра, сонзэ кисэ ламот путызь пряст, ламо вий путынек и велесэ. Паро трактортнэнь саизь фронтов, да и алашатнень истя жо. Колхзсо жо кадовсть кой-кодат,карминек тонавтомо букатнень, скалтнэнь  сокамо. Карминек сокамо букасо, скалсо ве плугсо. Прыль ракшась, кодаяк а стявтови. Мейле кармасть явшамо тенек соткань сотка чис – чувомс, кочкомс.Паксятне беряньстэ ульнесть роботазь, сюрось сэрейстэ а касыль, савиль тенек таргазь таргамс. Мезе урядави сюрось, провожилинек фронтов.Эйкакшт, ярсамс ульнесь а мезде, кшись ламонь ульнесь тикшень, теяк аволь сатомга.

    А кода видемс видьменть пачтилинек Атяшевасто? Лангсо,эйкакшт. 20 килот каить кескавозот ды кандт кода маштат. Оймсеме лоткат, кургозот а мерить каямс зернадонть. Пильгтнесэ карть, пильгтне пачк начкить. Трактортнэнень горючеенть истя жо лангсо кантнинек.