Урок- путешествие поэтлон миро
методическая разработка (8 класс) на тему

УРОК-ПУТЕШЕСТВИЕ ПОЭТЛÖН МИРÖ

(Уроксö нуöдöны 8-9 класса велöдчысьяс)

Виктор Савин!

Сё дас во нин тыртан,

А тэ век на юрган

Коми сьыланкывйöн

Миян Коми муын.

Урок заводитчö «Öтчыд овлö» сьыланкывйöн. (Кывзыны грампластинка.)

Велöдысь: Челядь, тi кывлiнныд коркö тайö сьыланкывсö? Сiйöс гижис В.А. Савин. Быд лун Сыктывкарса радио заводитлiс асъя сёрнисö тайö сьыланкыв мелодиясянь. Талун миян водзын пуктöма мог – казьтыштны нималана коми мортöс – Виктор Алексеевич Савинöс, кыдзи поэтöс, юмористöс, артистöс, режиссёрöс, композиторöс, драматургöс.

Но тайö урокыс миян лоö мöд нога. Тi ставöн кывлiнныд роч поэт, сьылысь В.С. Высоцкий йылысь. Öтчыд сы дорö шыасисны татшöм юалöмöн, мый, сы ногöн, лоö шудыс. А сiйö вочавидзис: «Шуд – сiйö путешествие. Абу сöмын ветлöм-мунöмын. Путешествие позьö вöчны и гижысьлöн мирö».

И öнi ми тайöс вöчам.

Казьтыштам медводз челядьдыр олöмсö гижысьлысь и заводитам ассьыным «туйнымöс» Трöш сиктсянь. Миян водзын Коми Республикалöн административнöй карта. Сувтöдам татчö пас и панам сёрнинымöс В. Савинлöн ичöтдырся олöмсянь.

Чужис В. Савин Нёбдiнын, Трöшсикт грездын.

Велöдчысь: «Мамöлы колö вöлöм, медым поп меным Иван ним сетiс, а Вассиан поп пыртiгöн пуктас «тешкодь» ним – Виктор. Первойяссö бура дыр тайö нимыс «мисьтöмöн» кажитчöма. Ме ногöн, попöс таысь позьö ошкыны. Не сiйö кö, ме эськö öнöдз вöлi Иванöн. «Нёбдiнса Иван» – ньöти абу интереснö. Иваныд, гашкö, кымын Нёбдiнад да. Куш Трöшсиктын менам ичöт дырйи вöлi сизим Иван, ме эськö вöлi кöкъямысöд. Поп сетöма Виктор, прöстöй ногöн Виттор, дай öнi на век Виттор. Сэки Нёбдiнас ме öтнам вöлi татшöм нимаыс».

Велöдысь: А öнi сьылам «Чужи-быдми сьöд вöр шöрын» сьыланкыв. (В. Савинлысь сьыланкывъяссö челядькöд вöлi велöдöма водзвыв.)

Сизим арöс тыртöдз на мöдöдiсны велöдчыны школаö. Ок и сьöкыд вöлi коми детинкалы лыддьыны роч книгаяс!

(Велöдчысь лыддьö «Тöвся рыт» кывбур.)

Велöдчысь: «1900 воын воссис Дереваннöйын второкласснöй школа. Ме велöдчи сэнi куим во, помалi 1904 воын «первой ученикöн» (став 13 предметсьыс свидетельство вылын сулалö «отлично». Тайöн менам и помасис став образованиеöй. Окота на эськö вöлi да нинöм вылö – сьöм эз вöв».

(Карта вылысь петкöдлыны Дереваннöй сикт, сувтöдны пас. Тадзи жö петкöдлыны да пасъявны мукöд инъяссö, кытчö волывлiс поэт).

– А сэсся заводитчö Виктор Савинлöн асшöр олöм. Мыйкö дыра уджалö писарлы отсасьысьöн, сэсся и писарöн Кулöмдiнын, Саваягын, Щугырын. «Щугырын олiгöн ме первойяысь на тöдмаси политикаöн: буретш 1905 вося революцияысь сэтчö вöлi ыстöмаöсь кык том мортöс да накöд ме ёна овлывлi. Гажа эськö вöлi овны, да гортö корисны мам-батьяс да бöр лои лэччыны Нёбдiнö».

Мöд велöдчысь: «Арсö гортын уджалi, а туй пуксьöм бöрын тöвся Микöла мöд лунö батьöкöд мунi Богослов заводö пес керавны. Ме тöлысь кымын уджалi да öти асывводзын и пышйи бать дiнысь.»

В. Савин служитö сэсся Уралса заводоуправлениеясын. Сэнi жö паныдасьö рудникса гöлиника олысьлöн нывкöд, Лидия Ивановна Усовакöд, да гöтрасьö. Уралын олiс нёль во да джын, а сы бöрын мунiс корсьны «бурджык олöм» Украинаö. Сöмын и Украинаын олöм эз вöв кокни. Войвывса крестьянин пилы танi ковмис тöдмасьны сир курыд олöмöн.

1918-öд воын В. Савин бöр локтö Коми муö да став вынсö сетö ыджыд общественно-политическöй уджлы. Уна во чöж веськöдлö гижысьяс котырöн, гижö кывбуръяс, поэмаяс, басняяс, котыртö театральнöй труппа да лöсьöдö национальнöй драматическöй репертуар.

Украинаысь воöм бöрын кык тöлысь да джын мысти нин «Зырянская жизнь» газетын вöлі йöзöдöма Нёбдінса Витторлысь медводдза кывбур «Гöрд звöн». Революциялöн образыс босьтö тöдчана места В. Савинлöн став творчествоын. Поэт серти революция – «муса вöля», «югыд шонді», «ыджыд праздник», «биöн лолалысь, гымби восьлалысь», «важ мир косялысь».

Революция образ кындзи тайö жö кадö чужö мöд художественнöй серпас, «югыд туйлöн» образ. «Югыдлань!» – чуксалö поэт коми войтырöс да петкöдлö «югыд туйлысь» колана серпасъяс: воссьöны выль школаяс, быдмö промышленность, котыртсьöны колхозъяс.

Велöдысь: Савин вöлі поэт-песенник. Сылöн сьыланкывъясыс матынöсь бытöвöй народнöй лирика дінö. Уна вын пуктö устнöй литература чукöртöм вылö. Савин лыддис, мый став сикас искусство пытшкысь быдöнлы медся матыссаöн лоö сьылöм. Сійö ёна майшасьö, мый этша чукöртöма йöзкостса сьыланкывъяс, этша на гижöма выль сьыланкывъяс. А тайö зэв колана удж. Öд важ сьыланкывъяс отсöгöн ученöйяс вермасны тöдмавны, кыдзи олісны важöн йöз.

1918-23-öд воясö гижö «Югыд кодзув», «Веж видз вывті», «Чужи-быдми сьöд вöр шöрын», «Мича нывъяс» да мукöд сьыланкыв. Найö мыджсьöны любовно-лирическöй да том пöра йылысь йöзкостса сьыланкывъяс вылö. Бытöвöй лирика кындзи, Савин гижö «Эм кö шог, эм и мог», «Губернятöм губернатор», «Варыш поз», «Коми море» да мукöд выль сьыланкыв. «Эм кö шог, эм и мог» да «Варыш поз» сьыланкывъяс форма сертиыс матынöсь роч литературнöй сьыланкывъяс дінö. А «Варыш поз» сьыланкыв босьтöма Коми республикалы гимнöн.

(Кывзыны Нёбдінса Витторöн лöсьöдöм сьыланкыв.)

Велöдысь: В. Савин вöлі и поэт-сатирикöн.

Сатира жанрын гижöма «Губернятöм губернатор», «Кыдъя роч» кывбуръяс. «Кыдъя роч» кывбурын сійö сералö чужан кыв кедзовтысьясöс, кодъяс яндысьöны сёрнитны комиöн.

(«Кыдъя роч» кывбур серти челядь петкöдлöны сценка.)

В. Савин пуктіс ыджыд пай сідзжö национальнöй драматургияö. 1920-öд воясö коми сиктъясын чужисны самодеятельнöй театральнöй коллективъяс. Но эз вöв колана национальнöй репертуар. Комиöдлісны «Женитьба» (Н. Гогольлысь), «Свои люди – сочтемся» (А. Островскийлысь) да мукöд роч пьеса.

Медводдза коми пьеса В. Савин гижис 1918 воын. Тайö вöлі «Гудрасьöм» да «Ыджыд мыж» – украинскöй мотивъяс серти лöсьöдöм öти действиеа тешъяс.

Медся тöдчанаöн лои «Шонді петігöн дзоридз косьмис» пьеса (1919 во). Пьеса петкöдлö крестьяналысь революцияöдзса сир курыд олöмсö. Полöм, пемыдлун – со мый личкö гöль йöзöс.

Пьесаын петкöдлöма большевик Гриша Сигеровöс, коді олöмыслöн бöръя лунъясöдз тышкасис шуд вöсна.

1920 воын театральнöй труппа ветлöдліс Сыктыв да Эжва юяс вожöд да быд сиктын петкöдліс тайö пьесасö.

(Челядь петкöдлöны «Шонді петігöн дзоридз косьмис» пьесаысь юкöн.)

Коми гижысь Николай Попов (Жугыль) казьтылö:

«Сьöкыд вöлі сэки ветлыны сиктъясöд коми труппалы. Вöлöкъяссö унджыкысь лои вуджны подöн. Вöвъяс эз тырмыны: колö вöлі военнöй грузъяс кыскавны Аныбланьö, кöні вöлі сэки фронт. Унаысь артистъяслы нинöм вöлі сёйнысö. Кодсюрö жугыльмывлісны. Но Нёбдінса Виттор аслас гажа юморöн бурдöдас вöлі быдöнöс. Корсясны сиктысь ведра картупель да пуасны, госö чутöдöмöн сёясны, сюрö кö солыс, а оз кö сюр, сідзи сёйсяс».

(В. Савин йылысь казьтылöмъяссö лыддьöны челядь жö.)

Сатирическöй пьесаяс пиысь медся тöдчанаöн лоис «Райын» (1921) да «Инасьтöм лов» (1926) дилогия. Парма чуркйысь крестьянин Сюзь Матвей кулöм бöрас веськавлö райö да адö.

Нёбдінса Виттор гижис и медводдза коми историческöй драма «Кулöмдінса бунт».

1932 воын заводитіс уджавны öнія драмтеатр. Н. Дьяконов казьтылö: «Сійö рытнас Виктор Алексеевич котраліс томиник чань моз, синъясыс югъялісны. То сійö котöртлас залö, то отсалö сцена вылын декорация сувтöдны, то пыралас гримуборнöйö да вашнитас кодлыкö пеляс – збодерлун содтас. Со и ме дінö локтіс да вашнитіс: «Шуда тэ, Дьяконов! Миян карын эз вöв прамöй театр, ворсім школаясын, клубъясын. А талун восьтам карса театр! Тайö зэв ыджыдтор!...»

Велöдысь: А 1937-öд вося октябрь тöлысьын В. Савинöс некутшöм мыж вöчтöг арестуйтісны. Сійö кувсис 1943 воын Сибирса ссылкаö туй вылын. Кöні дзебöма – абу тöдса. Пöшти кызь во чöж Савинлысь нимсö эз казьтывны печатьын, но сылöн гижöдъясыс да сьыланкывъясыс пыр олісны йöз сьöлöмъясын.

Коми йöз пыдди пуктöны сылысь сöстöм паметьсö. Сылысь нимсö новлö Коми республикаса драма театр, Нёбдінса сиктса школа. 1994 вося август 21-öд лунö Сыктывкарын вöлі восьтöма В. Савинлы памятник.

В. Савинлöн нимыс некор оз вушйы миян вежöрысь.

(Урок помавны В. Савинлöн сьыланкывйöн.)

Урок-путешествие нуöдігкежлö колö дасьтыны: портретъяс, фотографияяс (В. Савин, Н. Попов (Жугыль), Н. Дьяконов, эм кö, гöтырыслысь, челядьыслысь, Нёбдінса музейлысь, памятниклысь, драма театрлысь, ворсысьяслысь) да поэтлысь книгаяс, сьыланкыв сборникъяс; газетъясысь, журналъясысь гижöдъяс.

Став дасьтöмторсö колö петкöдлыны урок вылын сёрни нуöдігöн.