Рабочая программа по дисциплине "Родной (мокшанский) язык"
календарно-тематическое планирование (5 класс)

Ветеце классонь мокшень кяльса покодемань программась кочкаф, нежедемок мокшень кялень программать лангс, конань аноклазь 5-11 классненди Г.С.Иванова и Т.И. Ломакина. Сон  кемокстаф Мордовия Республикань Образованиянь министерстваса и нолдаф Саранскяйса, мордовскяй книжнай издательстваса 2017 кизоня. Учебнай пособиясь «Мокшень кяль. 5 класс». В.М.Имярекова. Саранск, Морд.кн.изд. 2017к.

Учебнай  планть эса мокшень кяльть тонафнеманцты максф  34 ч. (1 част недяляти, 34 учебнай недяля). Оцю мяль шарфневи цебярьста корхтамати.

Раздел I. Планируемай результаттне

Учебнай предметть марстонь характеристикац

Актуальностсь: мокшень кяльсь - мокшетнень шачема кяльсна, кона ётась касомань и вииямань пяк кувака кигя. И тяни сон мокшэрзянь народть национальнай литературнай кялензон эзда фкясь. Мокшень кяльсь школаса кода тонафнемань предмет занци пяк эрявикс васта, сонь оцю тонафнемань и цебярь потмовиень касфтомань смузец.

Цельсь и задачатне

        Цельсь: анокламс культурнай, сембе ширде содай ломатть, максомс тейст мокшень литературнай кяльса морафтомань, корхтамань и сёрмадомань содамошит.

        Дисциплинать  задачанза: 

 - тонафнихненди эряви максомс сатомшка содамоши родной кялень  морфологияста, орфографияста, синтаксисста и стилистикаста;

- пачфтемс марнек эряфса кяльть асувонц колга, сяда тов касоманц и виияманц и масторлангонь лия кяльхнень ёткса сонь вастонц колга;

- шачема кяльть лезксонц вельде, сонь лангозонза нежедезь, эряви касфтомс иттнень логическяй мяльснон – арьсемаснон, ёжемарязь морафтомань и корхтамань маштомошиснон;

- максомс сёрмадомань, пунктуациянь и интонациянь кеме маштомошит, кеподемс синь мяльснон цебярьста содамс, кельгомс и ванфтомс тядянь – алянь кяльть.

Шабатненди эряви сатомс тяфтама результатт:

Личностнайхть:

-шарьхкодемс мокшень кяльть вастонц эряфса, фкя-фкянь ёткса корхтамста;

-маштомс кочкаф содамошитнень и сатфкснень нолямс школань и эрь шинь эряфса;

-касфтомс маштомашитнень ялга и оцю мархта прянь вятема; шабрань ломаттнень мархта сотксонь  кирдема;

  - содамс иттненди народоньконь эряфста: мокшетнень эряма койснон, унксснон;

Метапредметнайхть:

- шарьхкодевиста марямс кайги мокшень кяльть;

- маштомс покодема валкснень мархта;

- маштомс кочкама информация разнай источникста;

- маштомс корхтама мокшень кяльса.

Предметнайхть:

- содамс валзюлмоса главнай и зависимай валхнень, корхтамать целенц коряс валрисьмотнень видснон, валрисьмоть главнай и зависимай пяльксонзон, кафта главнай пялькс мархта аф распространённай и распространённай валрисьмотнень, фкя составонь валрисьмотнень шарьхкодемаснон, однороднай пялькс мархта валрисьмотнень, пъшкядемать, виде корхтамать, корхтамань вайгялькснень тиевомаснон, гласнай и согласнай вайгялькснень, валть смузенц, валонь тиевомать.

Тонафнихненди эряви содамс:

корхтамать целенц коряс валрисьмотнень видснон;

валрисьмоть зависимай пяльксонзон;

согласнай вайгялькснень;

гласнай вайгялькснень;

валть смузенц;

кевонзаф валзюлмотнень.

Тонафнихненди эряви маштомс:

вайгяльть лац вятема азондомань, кизефтемань, кошардомань и серьгядемань валрисьмотнень азомста и морафтомста;

текстса или устнай корхтамаса валхнень виде и аф виде смузьснон содама;

валбяльксова валть явома, сонь смузень няфти пяльксонзон мума (валъюрхта, валбе, вальюр, суффикс).

Раздел II. Учебнай предметонь тематнень содержаниясна

1-це разделсь. Кяльсь – корхтамань инь эрявикс средства. (1 част)

2-це разделсь. Начальнай класснень эса тонафнефть лятфтамац. (1 част)

        Валсь. Валть пяльксова явомац.

        Корхтама пяльксне. Самостоятельнай и служебнай корхтама пяльксне.

        Валрисьмось. Валрисьмонь главнай и зависимай пяльксне. Аф распространённай и распространённай валрисьмотне.

3-це разделсь. Синтаксиссь. Пунктуациясь. Цебярьста корхтамась. (9 частт)

Валзюлмось. Валзюлмоса главнай и зависимай валхне. Валзюлмось и валрисьмось, синь ётксост аф фкаксшись.

Корхтамать целенц коряс валрисьмотнень видсна: азондомань, кизефтемань и кошардомань. Серьгядемань валрисьмотне.  

Валрисьмоть главнай пяльксонза: подлежащайсь и сказуемайсь.

Валрисьмоть зависимай пяльксонза: дополнениясь, определениясь, обстоятельствась.

Кафта главнай пялькс мархта аф распространённай и распространённай валрисьмотне.

Фкя составонь валрисьмотнень шарьхкодемсна.

Однороднай пялькс мархта валрисьмотне. Однороднай пялькснень ёткса и, а, но союсне. Однороднай пялькснень видеса запятойсь.

Пъшкядемась. Пъшкядмать видеса лотксема тяштенятне.

Союз мархта валрисьмотне, Мзярда эрь пялькссь моли кафта пялькс мархта. Запятойсь сложнай валрисьмоть пяльксонзон ёткса и, а, но, што, штоба, сяс мес, кона, кодама, мзярда, къда, коса  валхнень инголе.

 Виде корхтамась. Виде корхтмась авторть валда меле и инголе.

Виде корхтамать видеса лотксема тяштенятне.

Ламонь корхтамась. Ламонь корхтамать шарьхкодемац. Ламонь корхтамать видеса тиресь.

4-це разделсь. Фонетикась. Графикась и орфографиясь.    Цебярьста корхтамась. (10частт)

Корхтамань вайгяльксне. Корхтамань вайгялькснень тиевомасна. Гласнай и согласнай вайгяльксне.

Слогсь. Валхне слогова явомасна.

Гласнай вайгяльксне. Рядонь коряс гласнай вайгялькснень явомасна кяльть кеподеманц коряс гласнай вайгялькснень явомасна. Тървань и аф тървань гласнайхне. Ингольце рядонь а гласнай вайгялькссь. Лафча (ъ) гласнай вайгялькссь.

Согласнай вайгяльксне. Кайги и аф кайги согласнайхне. Калгода и ляпе согласнайхне.

Ударениясь. Валхнень эса ударениять вастоц.

Орфоэпиясь. Гласнай и согласнай вайгялькснень, согласнаень сюлмотнень азомасна.

Вайгяльксне и букватне. Вайгялькснень бкуваса няфтемасна. Алфавитсь.  

Фкя строчкаста омбоцети валонь ётафтомась. 

5-це разделсь Лексикась. Цебярьста корхтамась. (7 частт)

Лексикать шарьхкодемац. Валть смузец. Валть фкя и лама смузенза. Валть виде и аф виде смузенза.

Омонипне. Омонипнень типсна.

Синонипне и антонипне, корхтамаса синь рольсна.

Кевонзаф валзюлмотне (фразеологизматне).

Мокшень кяльть валлувксонь составоц.

Мокшень литературнай кяльсь и диалекттне.

Сире валхне: историзматне и архаизматне.

Од валхне (неологизматне).

Мокшень кялень валкснень содамасна.

6-це разделсь. Валбяльксне и валонь тиевомась, орфографиясь. Цебярьста корхтамась.(4частт)

         Валбяльксне. Валюрсь и валбесь. Апак тик и тиф валъюрхтсь. Гласнай и согласнай валъюрхтсь. Афкуксонь, полатф кирьфтаф валъюрхтсь. Валъюрхсь, суффикссь и валбесь кода валса смузень няфти пялькст. Сотксонь гласнайсь.

Валонь тиевомась. Суффикс вельде валхнень тиевомасна и синь сёрмадомасна.

Сложнай валхне. Сложнай валхнень тиевомасна и синь сёрмадомасна.

Парнай валхне. Парнай валхнень тиевомасна и синь сёрмадомасна.

Кирьфтаф сложнай валхне кода рузонь кяльста сявф валлувксонь единицат. Синь азомасна и сёрмадомасна.

7-це разделсь. Кизоть песта тонафнефть лятфтамац. (2 частт)

        Валзюлмось и валрисьмось. Валрисьмотнень видсна. Валрисьмотнень главнай и зависимай пялькссна. Кафта главнай пялькс мархта аф распространённай и распространённай валрисьмотне.

        Однороднай пялькс мархта валрисьмотне.

        Корхтамань вайгяльксне. Гласнай и согласнай вайгяльксне, синь явомасна. Вайгялькснень букваса сёрмадомста няфтемасна.

        Лексикась. Фкя и лама смузь мархта валхне. Омонипне. Синонипне и антонипне, кевонзаф валзюлмотне, корхтамаса синь рольсна. Валлувксть составоц.

        Валбяльксне и валонь тиевомась. Валхнень смузень пялькссна.

Раздел III. Тематическяй планированиясь

Календарно-тематическяй планированиясь