Укучыга өй эшләрен үтәүдә ярдәмлек.
занимательные факты (5 класс) на тему

1. Дәрестә актив эшлә: игътибар белән тыңла һәм сорауларга җавап бир.
2. Килешмәсәң яисә аңламасаң сораулар бир.
3. Һәр предметтан өйгә бирелгән эшне көндәлеккә мөмкин кадәр төгәл итеп, җентекләп язып бар.
4. Сүзлекләр, белешмәлекләр белән (справочник, энциклопедия) эшләргә өйрән. Аңлашылмаган сүзләрнең мәгънәләрен ачыкла, кирәкле фактлар, аңлатмалар, кагыйдәләр, формулаларны эзләп тап.
5. Компьютерың булса, аның ярдәмендә кирәкле мәгълүматларны табарга өйрән.
6. Дәрестә үтелгәннәр авыр кебек тоелса, материалны шул ук көнне кабатла, хәтта киләсе дәрес иртәгә кермәсә дә.
7. Биремнәрне үтәгәндә тагын  нинди ысуллар кулланып булуы турында да уйлан.
8. Ярдәм сорап зурларга яки сыйныфташыңа, дусларыңа мөрәҗәгать итәргә оялма, күчермә, аңламый калу зыянлырак!
9. Дәресне хәзерли башлаганчы, көндәлегеңне ачып кара: барлык өй эшләре дә язылганмы?
10.  Игътибарны җәлеп итәрдәй барлык артык әйберләрне алып куй. Беренче биремне эшләү өчен кирәк булган әсбапларны гына калдыр. Эшләп бетергәч, боларын алып куй һәм икенче дәрескә кирәклеләрен әзерлә.
11.  Дәресләр арасында тәнәфес яса.
12.  Материалны башта аңларга, аннан соң истә калдырырга  тырыш.
13.  Язмача биремнәрне башкарганчы, шуларга караган кагыйдәләрне кабатла.
14.  Дәреслектәге параграфны укыган вакытта, үз-үзеңә түбәндәге сорауларны бир: текстта кем яки нәрсә турында сүз бара, аның турында нәрсә әйтелә?
15.  Һәр яңа күренеш яки төшенчәне элек өйрәнгәннәрең белән мәгънә ягыннан бәйләргә тырыш.
16.  Истә калдырырга тиешле материал зур күләмле яки авыр булса, аны өлешләргә бүлеп, һәрберсе буенча аерым –аерым эшлә.
17.  Сочинение яки башка иҗади эшләргә әзерлекне соңгы көнгә калдырма, чөнки алар күп вакыт таләп итә. Һәр көнгә авырлыкны тигез бүлеп, берничә көн дәвамында , ягъни алдан әзерлән.
18.  Телдән  бирелгән өй эшләрен эшләгәндә, карта, схемалар куллан, алар сиңа материалны истә калдырырга ярдәм итәрләр.
19. Телдән бирәсе җавабыңның планын төзе.
20. Бүлмәдә тыныч булырга тиеш!

Уңышлар сиңа!