Фольклор
классный час (7 класс) на тему

Коми фольклор

(Ворсöм)

Лöсьöдысь - Старцева Эльвира Александровна,

коми кыв да литература велöдысь,

Ыджыдвидз сиктса «Шöр школа»

Ворсысьяс:  6 морта 2 котыр: «Тунъяс» да «Чудьяс»

Ворсан правилöяс:

1. Быд котырысь бöрйöны командирöс. Командир  кывкутö ылöдчытöм  ворсöм вöсна, медым некод оз торкав ворсöмлысь мунöм.
2. Сетöма кö 1 котырлы юалöм, а 2 котырсаяс кадтöг вочавидзöны сы вылö- налысь босьтчö 1 очко; 3 торкöмысь босьтчö джын öкмöм  очкосö.
3. Вочавидзöм лöсьöдöм вылö сетсьö 1 минут. Вочавидзöм кö эм пырысьтöм- пыр, то командир  лэптö кисö, мыйöн висьталö котырлöн гöтовлун йылысь.
4. Болельщикъяс вермöны вайны очко аслас радейтана котырлы: эз кö вермы вочавидзны  котыр – позьö вочавидзны  болельщикъяслы.
5. Став  ворсöм бöрся видзöдö жюри.  Сійö жö медбöрын ворсöмлысь вöчö  кывкöртöд.

Ворсöмлöн мунöм:

1. Тіян водзын сэтшöм  ворсöм, коді öтсяма  «Морскöй бой» ворсöмкöд: сэн жö моз  тані эм лыдпасъяс да шыпасъяс.
2. Вочавидзысь котыр висьталö  öти шыпас да öти лыдпас таблоысь.
3. Квадрат восьтöм бöрын веськаланныд кö юалöм вылö:  

 вочавидзанныд; веськаланныд кö куш квадратö:

то ворсöм вуджö мöд котырлы.

4. Кымын квадратысь артмö вочакыв, сы мында очко и босьтанныд (стöч вочакыв сетöм бöрын). Онджык кö тöдöй, позьö босьтны нöшта öти квадрат, но сэки очколöн лыдыс чинö öти вылö.
5. Квадрат восьтöм бöрын веськаланныд кö паса квадратö:

шойччöг места ворсыштам важ коми ворсöмысь (1 содтöд).

1 котыр «Тунъяс»

            А       Б       В        Г        Д       Е        Ж      З        И

2 котыр «Чудьяс»

            А       Б       В        Г        Д       Е        Ж      З        И

Заводитчöм:

Дона челядь, ставныд ті тöданныд уна пöлöс коми сьыланкывъяс, ворсöмъяс, шусьöгъяс да кывйöзъяс, нöдкывъяс да мойдкывъяс. А кыдз ті чайтанныд, кысь найö миянлы воисны?

(Челядьлöн вочакыв бöрын)

Да, збыль сідз, донаяс. Тайö став тöдöмлуныс  миянöдз воис миян жö пöль- пöчьяссянь, а налы налöн пöль- пöчьяссянь. Кутам лача, мый и ті водзö вылö лоанныд коми традиция кутысьясöн.

Сідзкö, талунъя ворсöмлöн мог: уськöдны тöд вылö пöль- пöчьяссянь воöм озырлун, мöд ногöн кö, коми фольклор.

И сідз, заводитам. Медводз пудъясям, кутшöм котырлы заводитны ворсны. Та могысь лыддям пудъясянкыв (2 содтöд).

1 котырлы юалöмъяс (мойдкывъяс):

1. Коймöд лунö Марпида Саревна чышъян лэптіс, меддзöля чойыс. Йöз чукöрмöма став сарствосьыс, быдöн желайтö судзöдны. Вокъяс шувöны, ветлам пö и ми, талун пö, гашкö, сюрö нин. (Седун)
2. Старик шувö: - Уна- ö коран? А мый пö сетан. Босьт пö деветьсот рублей, али пö бур кыв босьтан? Думайтіс, думайтіс салдат, öпеть шувис, бур кыв пö. Старик тöвар  босьтіс  и шувис, подымай пö, а не пускай, сэсся босьтліс шапкасö, прöщайтчис  и муніс. А салдат сэтчö шензян и коли. (Бур кыв)

2 котырлы юалöмъяс (мойдкывъяс):

1. Ме пö, шувö казак, восьт пö. Пырисны, и попаддя öпеть ювалö, мыйла пö локтін. Паччöр вылад пö сю кольтаяс эмöсь да батюшкоыд вартны тшöктіс. Чöв пö, тöрыт на пырті  кольтаястö  да ульöсь, эн вöрöд. А поп пö тшöктіс да быть  меным кывзы, шувö Иван, ме пö вöд казак. (Поп казак)
2. Эн на пö вывті вылыті лыйлы, давай пö пондам тышкасьны, шувö Иван. Давай пö. Пöльышт пö квайт верст пасьта да квайт верст кузя кöрт гумла. Ачыд пö пöльышт, тэнд пö квайт лов да квайтнанныс пöганöй, а менам пö öти да чистöй. (Гундыр)

1 котырлы юалöмъяс (нöдкывъяс):

1. Öти чышъян улын нёль чой бöрдöны. (Мöс)
2. Оліс- кынöмöс вердіс, а пазаліс- уличаö воис. (Гырнич)

2 котырлы юалöмъяс (нöдкывъяс):

1. Пукалö дед, сё пасьöн пасьтасьöма, коді сійöс кульсьöдас, сійö и синвасö кисьтас. (Лук)
2. Быд керкаын кос сöчöн. (Стеклö)

1 котырлы юалöмъяс (помавны шусьöг):

1. Тулысын кö узян, арын (шогö усян)

2 котырлы юалöмъяс (помавны шусьöг):

1. Шыд да рок - (медбур вок)

1 котырлы юалöмъяс (тöдмавны приметаяс):

1. Гожöмын пöжар кö вöтöн аддзылан- (шондöдас)

2 котырлы юалöмъяс (тöдмавны приметаяс):

1. Йöлöга кö вöрын гора кылö- (мичаммас)

1 котырлы юалöмъяс (тöдмавны коми йöзкостса сёян- юан):

Пызьöдз изöй стöкан джын кос льöм, кöтöдöй ваöн, содтöй стöкан джын песок да пуктöй пöжсьыны пачö 150  градуса жарын 2-3 час кежлö. Сэсся содтöй кык стöкан да джын чуж пызь да нöшта пöжыштöй 30 минут 170 градуса  жарын, мед сукмас. Пызан вылö вайöй кöдзöдöмöн. (Ляз)

2 котырлы юалöмъяс (тöдмавны коми йöзкостса сёян- юан):

Водзвыв дасьтöм пöткасö пуктöй чугунö, кисьтöй кöдзыд ва да пуöй яйсö небзьытöдзыс. Содтöй весалöм да вундалöм 3-4 картупель, солалöй. Кор пусяс, содтöй вундалöм лук джын. (Шыд)

1 котырлы юалöмъяс (шуны öти кывйöн зумыд кывтэчасъяс):

1. Пыста кодь - (ичöт)
2. Блин сёйысь рöдысь – (озыр)

2 котырлы юалöмъяс (шуны öти кывйöн зумыд кывтэчасъяс):

1. Вадор берба кодь ныв - (мича)
2. Гуысь петöм ош кодь- (скöр)

1 котырлы юалöмъяс (помавны кывпесан):

1. Шоныд гожöм, шоныд рыт,

Шуим пуны (шома шыд).

2 котырлы юалöмъяс (помавны кывпесан):

1. Сьылысь сьылö гöра йылын,

Мыла сьылöм (кылö ылö).

1 котырлы юалöмъяс (вуджöдны коми вылö):

1. Прялка (печкан)
2. Котёл (пöрт)

2 котырлы юалöмъяс (вуджöдны коми вылö):

1. Веретено (чöрс)
2. Галоши (колоши)

Öшмöсъяс:

1. Висер вожса сьыланкывъяс да мойдкывъяс / Чукöртіс да лöсьöдіс И.А. Осипов.- Сыктывкар: Коми книжнöй издательство, 1986.- 256 л.б.
2. Коми календар.2009 / Дасьтіс А.Н. Рассыхаев.- Сыктывкар: ООО «Издательство «Кола», 2008. – 384 с.
3. Коми муöй, няньöй – солöй.- Сыктывкар: Анбур, 2008.- 41 л.б.
4. Коми народные загадки / сост. Ф.В. Плесовский; под ред. Т. Чукичева.- Сыктывкар: Коми книжнöй издательство, 1975.- 112 с.
5. В.Б. Липин. Словник по традиционной матеиальной культуре коми. – Сыктывкар, 2008.- 52 с.

1 содтöд.

Быдмысь морт оз вермы овны ворстöг. Ворсöмын сылöн и велöдчöмыс, и уджыс. Ворсіг сылöн сöвмö сямыс, тöдöмыс, вын - эбöсыс и киподтуйыс. Со  талунъя ворсöм вылö некымын  важ коми ворсöм.

Ворсам ошкысь.

Юксянныд- пудъясянныд. Öти лоас ош, мукöдыс - вотчысьяс. Ош джодж вылас пидзöсчанясяс. Ошсö колö вевттьыны пасьöн (чышъянöн ли). Вотчысьяс пырасны кытш пытшкö, кöні дзик кытш шöрас узьö- вугралö ош (кытшыслысь ыдждасö водзвыв  сёрнитчöмöн визьнитанныд мелöн). Вотчысьяс ветлöдлöны ош гöгöр, петкöдлöны, быттьö вотісны дозъясö чöд либö пув. Асьныс сьылöны:

Ошкö- бабö, ошкö- бабö,

Чöдтö вотам, пувтö öктам,

Бур вотöссö босьталам,

Лёк вотöссö чöвталам…

Тайö кывъяс бöрас ош чеччыштас да пондас кутавны вотчысьясöс. Кодöс удитас кутны кытш пытшсьыс, сійö лоö ошкöн.

Оз кö кут, бöр ачыс кольö ошнас. Тадзи некымынысь.

Коді серöктас?

Ставöн босьтчöны шуйга кияснас  ёрта- ёртыслöн веськыд  киса ыджыд чуняс да, ньöжйö бергалігтыр, шуалöны:

Ас ки карнан.

Ки карнан.

Кодлöн водзджык

Пинь воссяс-

Дас тувик,

Дас печик.

Тю! Тю! Тю!

Сэсся ставныс ланьтöны. Оз варовитны, оз нюмъявны. Вом тупкöса, мед некод эз аддзы пиньнысö. Кодкö öд оз жö вермы кутчысьны да серöктас (пиньсö петкöдлас). Сылы ворсысьяс небыдика  тувкнитасны да печиктсасны. Тайöс позьö вöчны сöмын сы мындаысь, кутшöм лыдпас лоö лыддьöдлöма. Лыдпассö кывъяс шуалігöн позьö вежлавны öтисянь дасöдз.

2 содтöд.

Пöшти быд ворсöм водзын ковліс пудъясьны. Пудъясьны позьö уна ног, но челядь медсясö радейтöны юксьыны лыддьысянкыв отсöгöн. Со некымын важ лыддьысянкыв.

1. Тірс- торс

Куим стöкан морс.

Он кö вöдит,

Он и ворс!

2. Сеня Гриш,

Купеч öш,

Льöм пу плеш,

Мöлöт юр,

Из гырддза,

Ала чуг!

3. Анка- танка

Зима, зня.

Ющикован

Зелян- белян,

Корсь.

Дзебся да.