Конспект урока по литературному чтению (коми) во втором классе
план-конспект урока по теме

Тема: Сöдз челядьдыр гажöдысьяс.( Валентина Иванова «Лапъяпель»)

Шöр мог: лöсьöдны условиеяс, медым челядьлöн  сöвмис  колана ногöн лыддьысьны кужöмлун.

Могъяс:  Лöсьöдны условиеяс, медым

- челядьлöн сöвмис уроклысь могъяс да тема восьтыны кужöмлун, прогнозируйтны кужöмлун, план серти удж да удж донъявны кужöмлун (Р. УУД);

- челядь окотапырысь  тöдмасисны  выль гижыськöд да выль гижöдöн (П.УУД) ;

-челядьлöн  сöвмис лыддигмоз мöвпавны кужöмлун  (П.УУД);

- велöдчисны корсьны висьтысь юалöм вылö воча кывъяс да  медтöдчанас (П. УУД);

- велöдчисны вöчны кывкöртöдъяс (П.УУД);

- сöвмис  кывзыны да кывны öта- мöдöс кужöмлун(К.УУД);

- челядьлöн сöвмис ассьыныс мöвпъяссö висьтавны кужöмлун, котырöн уджавны кужöмлун( К.УУД);

- сöвмис челядьöн пемöсъясöс радейтöм да жалитöм (Л.УУД);

-велöдчисны сьöлöм пырыс лэдзны кодлыськö сьöлöмкылöмсö (Л. УУД);

Урок мунöм

   Удж вылö котыртöм. Öта-мöдлы нюмъёвтöм да ловру петкöдлöм.

   Горста удж прöверитöм. Челядь лыддьöны ассьыныс нöдкыв либö висьталöны ас серпас серти радейтана гортса пемöс йылысь.

Донъялöны уджъяс (Дöска вылын сетöм критерийяс серти).

 Лыддьытöдз текст серти удж.

Челядь лыддьöны авторлысь ним, вич, ов.

-Тöдса абу гижысьыс ? (Абу тöдса.)

Сiдзкö, кутшöм миян могным?  (Тöдмасьны…)

-Лыддям юрним. (Лапъяпель)

-Прогнозируйтам юрним серти. Кутшöм кывъяс дзебсьöмаöсь юрним кывъяс? Кызди найöс гöгöрвоанныд?(Лап,лапъя, пель)

 Лапъя кывсö челядь видлöны асьныс  гöгöрвоöдны ,  корсьöны кывчукöрысь. Сэсся быдöн ас ногыс гöгöрвоöдöны юрнимсö да дженьыдика висьталöны, мый йылысь вермас лоны гижöдыс.

-Восьтам небöг. Текстлöн вид серти кутшöм жанр вермас лоны? (Висьт либö мойд).

-Казьтылам, кутшöм юалöмъяс сувтісны миян водзын.(Мыйла татшöм юрнимыс? Мый йылысь гижöдыс? Кутшöм жанрыс? Мый тöдмалам автор йылысь?)

Юалöмъясыс петöны дöска вылö.

-Мый колö вöчны, медым вочавидзны юалöмъяс вылö? (лыддьыны, гöгöрвоны).

Лыддигмоз текстöн удж.

1.Лыддям комментируйтöмöн да прогнозируйтöмöн.

ЛАПЪЯПЕЛЬ.        

        Ванюша мамыскöд ветліс карö. Сэтысь сиктаныс вайисны зонкалы ичöт ёрт пыдди лапъя пеля ичöтик кычипиöс(понпиöс). Ванюша сылы Лапъяпель ним и пуктіс. Татшöм гöна да ыджыд пельяса понйыс сиктаныс эз на вöв.(Тöдмалім-ö коді Лапъяпельыс? Коді?) Зонка босьтчис сійöс велöдны, мед быдторсö кутіс вöчны, кöзяиныслысь кывзысьны (Кöсйö, мед кывзысис понпиыс). Кöть батьыс эз тшöкты, но гусьöникöн пыртліс понпиöс сарайысь, кöні сійö оліс дом йылын.

        Öтчыд буретш вöлі велöдö Лапъяпельöс, пырис батьыс.(Интереснö, мый шуас?Мöвпыштам.) Первойсö Ванюш быттьö повзис, но гöгöрвоис петкöдлыны батьыслы, мый понпиыс кужö, горöдіс нёль кока ёртыслы:

        - Лапъяпель, сет гöлöс!

        И кычипи сетіс гöлöс.

        - Лапъяпель, вод!

        И кычипи водіс.

        - Лапъяпель, места!

        И кычипи пуксис öдзöсдорса гöгрöс джодждöра вылö. Батьыс небзьыштіс:

        - Ичöт, а кывзысьö. Мед, инöсь, олö.(Кажитчис-ö понпиыс батьыслы? Мыйла?)

        Öтитор падмöдіс(мешайтіс): понпи, кор кольліс öтнас, ёна тязвіс сарайын, а пыр аскöдыс кыскавны Ванюшлы деливö жö вöлі.(Интереснö,мыйла?) Лапъяпель либö ылö сыысь пышйыліс, либö мудзліс да ковмыліс ю дорысь ли вöрысь ки вылас гортöдз вайны. Дженьыд кокнас сямыс котравнысö эз вöв.( Аддзим, мыйла?) А зонпоснилы Ванюш ошйысис, мый понпиыс сылöн овчарка(Со мый Ванюшыдлы окота, овчарка, ыджыд, ен пон). Абу на аддзылöмаöсь татшöм пемöстö да эскисны (веритісны). Но эскöмным быри(Интереснö, мыйла ?), кор öтчыд сылы öти зонка кампет пыдди шыбитiс куйöдтор, и Лапъяпель тшапнитіс дука ёкмыльсö вомас. Ок и ваксисны ёртьясыс. Сіт сёйысьöн Лапъяпельöс нимтісны.(Кутшöм сьöлöмкылöмъяс чужисны Ванюшлöн?Мый эськö Ванюш вöчас водзö?Челядьлöн прогноз)

        Ванюш скöрмис понпи вылö, босьтіс бедь да лыйис сылы. Лапъяпель лёк ногöн тявöстіс да вешйис бокö. Чуймöмöн видзöдіс кöзяин вылас.(Мыйла-нö чуймöмöн?) Но Ванюш котöртіс гортас. Мед понйыс эз вöтчы, пыр лыйліс изйöн.(Сувтöдінныд син водзанныд лоöмторсö?)

        Мамыс казяліс öтнаслысь локтöмсö. Ванюш висьталіс, мыйын делöыс. Мамыс скöрмис:

        - Со тэ кутшöм вöлöмыд. Лапъяпельыд öд ичöт на, унатор оз гöгöрво, а тэ пырысь-пыр тöлксялöм виччысян. Мун да öні жö вайöд гортö.(Мый вöчас Ванюшыс? (Челядьлöн прогноз)

Но корсьöм пыдди Ванюш дзебсис керка сайö, а сэсся шуис, мый понйыс эз сюр. Аддзисны Лапъяпельöс сöмын коймöд луннас кильчö пос улысь. Öдва нин лолаліс. Нуисны ветеринар дорö.

        - Абу нин олысь, - шуис сійö, - лун кык сайын, тыдалö, мыйкö сёйöма да пагалöма(лек сёянысь висьмöма)(Мый лоö водзö, лыддьöй ас кежсьыныд)

        Сюйисны Лапъяпельлы укол, но понпи нинöмсö нин эз кыв. Регыд и лолавнысö дугдіс. Мама-пиа тубрыштісны понпиöс рузумö, пуктісны ичöт ящикö да нуисны вöрö. Дзебисны пожöм вужля улö. Сэки Ванюш гöгöрвоис: Лапъяпель некор нин оз нюлышт сылысь нырсö. И сэтшöм забеднö лои, мый вöр пасьталаыс бöрддзис.

Виччысинныд-ö татшöм гижöд?(Быдöн ас кежсьыс мöвпалö)

2.Лыддьöмтор гöгöрвоöм вылö уджъяс.

-Кытысь вайисны понписö?

-Мыйла Ванюш пуктіс Лапъяпель ним?

-Кыдзи найö ёртасисны? Кыдзи велöдчис  понпи? Кутшöм Ванюшыс тані (вöчöмторъяс сертиыс)?

-Мый падмöдіс Ванюшöс понписö видзигöн7 Лыддьöй.

-Мыйöн ошйысис Ванюш ёртъясыслы?

-Мыйла ёртъясыс Лапъяпельсö нимтісны сіт сёйысьöн? Лыддьöй.

-Кутшöмöн петкöдлöма  Лапъяпельсö тайö юкöнас? (гажтöмсьö öтнас сарайын, öдйö велалö, ичöт на да, сьöкыда , сямтöг котралö дженьыд кокнас, тöлктöм на, унатор оз гöгöрво).

-Мый Ванюш вöчис Лапъяпелькöд?

-Кутшöм сьöлöмкылöмъяс понпилöн?  Лыддьöй, кызди та йылысь висьталö авторыс. «Чуймöмöн видзöдіс…»- гöгöрвоöдöй. (Понпилы вöлі гöгöрвотöм, мыйла Ванюш дойдалö сійöс, öбиднö).

-Кывзіс-ö зонка мамсö?

-Мый вöчис сійö?

-Кыдзи вежсис Ванюшыс (вöчöмторъяс сертиыс)?(Лоис скöр,жальлун тöдтöм, пöръясьысь).

-Мый лои понпикöд?

-Мый öнi верманныд висьтавны Ванюш йылысь ? (вöчöмторъяс сертиыс)

-Корсям текстысь действие петкöдлысь кывъяс, кодъяс отсöгöн автор петкöдлö Ванюшлысь понпикöд вöчöмторсö.(Котыръяс вылö юксьöмöн)

Удж вöчöм бöрын  петöны дöска вылö кывъясыс.Кывкöртöд.

Шойччöг.

Текст лыддьöм бöрын удж.

1)-Кутшöм кывйöн автор помалö гижöдсö? (Бöрддзис)

-Мыйла?( Гöгöрвоис –ö зонка, мый вöчис?)

- Кутшöм лоöмтор петкöдлöма: шог али гажа?

-Мыйла Ванюш эз вайöд понписö гортас? Кыдзи тэ донъялан зонкалысь вöчöмторсö?

-Мый эськö тэ вöчин Ванюш местаын, кор челядь кутісны серавны понпиöс?

- Кыдз тi чайтанныд, мый кутас вöчны Ванюш, водзö олöмын лоöны кö сылöн гортса пемöсъяс? Кутшöмöн тi сiйöс аддзанныд?

Мый кöсйис висьтавны аслас произведениеöн авторыс ?  Мый вöсна сылöн сьöлöмыс висьö?(Некор оз ков лекавны пемöсъяс вылö, колö найöс гöгöрвоны да дöзьöритны,а.то верман воштыны ёрттö…).

2)Торкöм план сетöм.

- Лöсялö оз менам план гижöд дорö.? Мый колö вöчны? (Челядь котыръясöн колананогöн лöсьöдöны план , öта-мöдыскöд орччöдöны да доказывайтöны лöсялöмсö):

Понпиöс нимтісны сіт сёйысьöн.

Зонка ворсö да велöдö Лапъяпельöс.

Карысь вайисны лапъя пеля кычипиöс.

Лапъяпель некор оз нин нюлышт Ванюшöс.

Ванюш изйöн вöтліс понпиöс.

3) Мый позьö вöчны план отсöгöн? (ас кывйöн висьталöм).(Гортса удж вылö вöзйыны ас кывйöн висьталöм кöсйöм серти, либö понпиöс серпасалöм,либö челядь асьныс вöзйöны мöд сикас удж. Бöръясны кö сьöлöмсянь лыддьöм, сёрнитыштны кыдзи лыддьыны помсö:öдйö- нöжйö, гора-лöня, кыпыда-нора- шога ).

4)-Кутшöм гижöд лыддим? (Висьталöны юрним да сiйöс гöгöрвоöм)

- Кутшöм жанрын? (Челядь висьталöны да доказывайтöны)

-Коді гижис? Мый тöдмалінныд гижысь йывсьысь произведение сертиыс? (…)

-Кыдзи авторыс донъялö зонкаöн понпиöс вöтлöмсö?  

-Кытысь тыдалö? (Мам кывъясысь).

 -Мыйла зонкасö авторыс Ванюшöн шуö, а оз мöд ног, Ваняöн либö Иванöн?

Гижысь йылысь 2-3 серникузяа велöдысьлöн содтöд юöртöм да сылысь гижöдъяс лыддьны вöзйöм.

Рефлексия .

-Помалöй сёрникузясö (öтиöс бöрйöмöн):

(Дöска вылын сетöма)

- Меным вöлi…

- Меным окота лои …

- Меным лов вылын…