Урок коми литературы по рассказу И.Торопова
методическая разработка (7 класс) на тему
Технологичекая карта урока коми литературы в 7 классе (ФГОС)
Скачать:
Вложение | Размер |
---|---|
![]() | 31.82 КБ |
![]() | 2.65 МБ |
Предварительный просмотр:
«Повны кö, не овны»: 7-öд классын И.Г.Тороповлöн «Кöнi тэ, кар?» висьт серти
Федя Мелехинлысь образ видлалöм.
Игнатова Елена Владимировна
МОУ Помоздинская СОШ им.В.Т.Чисталева
Предмет: Коми литература
Уроклöн тип: Деятельностнöй технология серти дасьтöм выль тöдöмлунъяс восьтан урок.
Урöклöн могъяс.
Велöдан:1. Сöвмöдны литература геройлысь образ восьтан приёмъяс;
2. Велöдны анализируйтны художествоа гижöдысь эпизод;
Сöвмöдан: 1. Сöвмöдны «Коми литература» предмет серти тöдöмлунъяс восьтыны кöсйöм;
2. Сöвмöдны логикаа мöвпалöм да йитчана сёрни.
Воспитательнöй: 1. Велöдны уджавны группаын;
2. Воспитывайтны велöдчысьясöс бура кывзыны да кывны öта-мöдöс, пыдди пуктыны ёртöс;
3. Велöдны кутны кыв не сöмын ас, но и группалöн тöдöмлунъяс вöсна.
Урок вылö колö: компьютер, проектор, экран, мультимедийнöй презентация (Приложение), коми-роч кывчукöр, Уголовный Кодекс РФ (Приложение), «Кöнi тэ, кар?» висьт.
Велöдчысьяс уджалöны группаясöн да асшöра.
Виччысяна результатъяс:
1. Предметнöй:
- Литературнöй геройлысь тöдчанлунсö видлавны кужöм;
- Художествоа гижöдысь эпизод анализируйтны кужöм;
2. Метапредметнöй:
Познавательнöй:
- вежöрысь колана информация корсьöм;
- быдсяма источникысь колана информация аддзöм;
- мöвпавны велöдчöм;
- эскöдöм могысь примеръяс вайöдöм;
- причинно-следственнöй йитöдъяс аддзöм.
Регулятивнöй:
- могъяс сувтöдны кужöм;
- план лöсьöдны да сы серти уджавны кужöм;
- водзвыв чайтöм, ас удж стöчмöдöм;
- версияяс висьталöм;
- анализируйтöм да ас удж донъялöм.
Коммуникативнöй:
- велöдыськöд да ёртъяскöд öттшöтш уджавны кужöм;
- уна пöлöс видзöдлас кывзöм, найöс öткодявны кужöм;
- ас чайтöмъяс висьталöм да донъялöм;
- ёртъяскöд сёрнитчыны кужöм;
- аудитория водзын висьтасьöм.
3. Личностнöй:
- бура велöдчыны кöсйöм;
- ас удж донъялöм;
- группаын ёртъяскöд уджавны да сёрнитчыны кужöм.
Уроклöн технологическöй карта
Уроклöн этап | Велöдысьлöн удж | Велöдчысьяслöн удж | УУД Коммуникативнöй Личностнöй Познавательнöй Регулятивнöй |
1.Мотивация к учебной деятельности | Видза оланныд, челядь! Таво ми тiянкöд видлалам Иван Григорьевич Тороповлысь «Кöнi тэ, кар?»висьт. Кольöм во лыддим «Шуриклы шыд» гижöд. Уськöдöй тöд выланыд Федя Мелехинлысь образ. Кутшöмöн Федя колис тiян сьöлöмъясö? Кöсъянныд-ö водзö нуöдны сёрнисö тайö зонка йывсьыс? | Челядь висьталöны , мый Федя Мелехин – зэв вежöра зонка. Сiйö повтöм, чой-вок вöсна тöждысьысь, зiль, ыджыд сьöлöма морт. Челядь петкöдлöны Федя Мелехин йылысь сёрнисö водзö нуöдны кöсйöм. | К: Кужны кывзыны велöдысьлысь сёрни Л: Бура велöдчыны кöсйöм |
2.Актуализация и фиксирование индивидуального затруднения в пробном действии | Экран вылын шусьöгъяс: Быдöн аслыс кынöмпöт корсьö. Асъя зэрыд – гöсьт. Бордтöг этша лэбалан. Сьöлöмыд кö ыджыд, быд удж ичöт. Повны кö, не овны. Вöрыд миян вердан-вердысьыс. Вын-эбöс кö лоö, корысьö он во. Ас пöсьöн перйöм няньыд медся чöскыд. -Челядь, бöрйöй сетöм шусьöгъяссьыс сöмын сэтшöмъясöс, кодъяс лöсялöны «Кöнi тэ, кар?» висьтлöн сюжетлы, Федя Мелехин образлы. -Кольöм шусьöгъясысь индöй сiйö, кодöс Федя вайöдö карö мöдöдчытöдз мöвпалiгас. Тайö шусьöгыс и и лоö миян уроклöн темаöн 1 карточка серти удж.(Приложение) http://www.finnougoria.ru/logos/proza/2228/23348
| Челядь бöрйöны колана шусьöгъяссö, гöгöрвоöдöны, мыйла лöсялö висьтлы. (вочакыв петкöдчö экран вылын) Параясöн уджалöм Челядь лыддьöны карточка вылын сетöм юкöн. Воöны кывкöртöдö, мый тайö «Повны кö, не овны» - уроклöн тема. | П: Колана информация корсьны кужöм, ассьыд мöвптö подулавны кужöм. К: Кужны колана ногöн висьтавны ассьыд мöвпъястö да дорйыны найöс, кужны гöгöрвоны ёртъясыдлысь мöвпъяссö, примитны налысь видзöдлассö. Р: Уроклысь тема да могъяс сувтöдны кужöм |
3.Выявление места и причины затруднения | -Челядь, мыйла Федя Мелехин вайöдö буретш тайö шусьöгсö? Видлöй шуны сiйöс юалана интонацияöн. Збыль öмöй повны кö, не овны? (Велöдысь кыпöдö проблемнöй юалöм). Кутшöм мöвпъяс да выль юалöмъяс тiян чужисны? Верманныд –ö тi сетны стöч вочакыв пырысьтöм-пыр текстсö видлавтöг? | Ныв-зон мöвпалöны сетöм юалöм вылын, но вочакывсö вайöдны оз на пыр сяммыны. Параясöн уджалöм бöрын велöдчысьяс содтöны ассьыныслысь юалöмъяс: Збыль-ö повтöмлун отсалö мортлы сьöкыд ситуацияын? Мый Федялы отсалö вены полöмсö? Вермас-ö помасьны Федялöн олöмыс, кутас кö сiйö повны ва вылын? | К: Кужны колана ногöн висьтавны мöвпъястö Р: Ассьыд версияяс кыпöдны кужöм |
4.Построение проекта выхода из затруднения | Челядь, кутшöм мог ми пуктам ас водзаным талунъя урок кежлö? Кыдзи тi чайтанныд, висьтысь кутшöм эпизодъяс отсаласны восьтны талунъя уроклысь темасö да вочавидзны проблемнöй юалöм вылö? | Ныв-зон висьталöны мог: -Тöдмавны, кутшöм мытшöдъяс паныдасьöны Федялöн туй вылын да мый отсалö венны сьöкыдлунъяссö. Челядь индöны видлалöм вылö колана эпизодъяс: 1)Федя веськалö Чушки-Вишкиö 2)Волся полойын бергалöм 3) «Пароход!» 4) Ыбса зонъяслöн «дэльöдчöм» | Р: Кужны торйöдны велöдысь отсöгöн уроклысь мог. К: велöдчысьяслöн öтув уджавны кужöм |
5.Реализация построенного проекта | -Зэв бур, мый тi внимательнöя лыддьöмныд висьт да кужинныд вайöдны колана юкöнъяс. Öнi ми öтув дасьтам план, код серти позяс анализируйтны индöм эпизодъяс. | Класс öтув уджын дасьтö план, велöдысь корректируйтö да гижö дöска вылö. Примернöй план: 1)Кутшöм мытшöдкöд паныдасьö Федя? 2) Аддзöй висьт юкöнысь кывъяс, кодъяс петкöдлöны геройлысь сьöлöмкылöмъяссö., пытшкöсса состояниесö. 3)Мыйöн вермис помасьны тайö лоöмторйыс? 4) Федялöн поступок вылö менам видзöдлас | К: Кужны öтув уджавны, велöдчыны кывзыны ёртъясöс. П: Колана юöр корсьны кужöм |
6.Первичное закрепление с проговариванием во внешней речи | Öнi ми юксям чукöръяс вылö да анализируйтам юкöнъяссö сетöм план серти.Позьö вöдитчыны разöдöм карточкаясöн, а позьö и небöгъясöн. Артмас 4 группа (4 эпизод видлалöм), быдын – 4 морт, быд велöдчысь бöрйö сетöм планысь юалöм. Татшöм ногöн чукöръясын уджалiгöн быдöн пыртö öтув вочакывйö ассьыс пай. http://www.finnougoria.ru/logos/proza/2228/23348 Гöгöрвööдöй «полой» кывлысь вежöртас http://komikyv.com/archives/2055 -Челядь, тайö юкöнын донъялöй тшöтш зонъяслысь поступоксö. ( 6карточка) | Челядьлöн примернöй öтветъяс: 1)Федя веськалö Чушки-Вишкиö (2 карточка) Кык кывйöн висьталöны юкöнлысь содержаниесö. Пасйöны, мый Федя «садь быртöдз». повзис, весиг кöсйис чеччыштны дi вылö. Пурйыс заводитö дзуртны, ружтыны, омлявны (Велöдысь содтö, мый тайö градация), визув ваыс лёк звер моз –орччöдöм. Тайö кывъясыс нöшта на ёнджыка ёсьмöдöны геройлысь повзьöмсö. Зэв лёк нога вермис помасьны тайö лоöмторйыс: Федя вермис сунгысьны кöдзыд ваö, доймавны,вермис дi вылö кольны дыр кежлö да нинöмтöг локны гортас. Мелехин оз шöйöвош, сiйö казялö, мый пурйыс «швачкысьöма абу дзик плеш шöрас» да заводитö мый вынсьыс уджавны-отсавны визувлы. Не кö сылöн киас асьсö кутöмыс, повтöмлуныс, ёнлуныс, вермис эськö лоны ыджыд шог. 2) Волся полойын бергалöм (3 карточка) Дженьыда висьтыштöны содержаниесö. Полой (диал)- вабергач. Федялöн сьöлöмкылöмъяс: «А унаöннад тай абу гажтöм, кöть кöн. Ми пондiм чуксасьны, серавны öта-мöд вылын.», «Радлыны нин пондi…» «Мися, öнi мыйкö думыштам!». Дыр на эськö ковмис бергавны Федялы, эз кö юрас во мудер мöвп йитчыны Шырлöн пур помас да вермасьны вабергачкöд. Федя усьтöдзыс тiльсьö-уджалö, но воöдчö аслас могöдз – вены вабергачсö. 3) «Пароход!» (4 карточка) Дженьыда казьтыштöны содержание. Федя абу нин öтнас, найö кывтöны Шыркöд. Кыкнан зонкасö автор петкöдлöма нюмсорöн. Шырлöн чужöмыс тырöма тöждысьöмöн и збойлунöн. Челядь быттьö тыш кежлö дасьтысьöны пароходкöд: «Мед бур оз виччысь, кералам и розьöдлам!» Тайö здукас ми гöгöрвоам, мый Федя да Шыр дзик на челядь мывкыдаöсь. Федя оз казяв чужöмсö скöра горзысь капитанлысь, но пасйö, мый «шапкаыс сылöн мича». Дерт, ми гöгöрвоам, мый тайö вермас помасьны зэв лёка… Весиг сьöлöмыд топавлö. Танi быттьö окота, мед челядь повзьыштiсны, мед полöмыс видзис олöмнысö… 4) ) Ыбса зонъяслöн «дэльöдчöм»(5 карточка). Неуна висьтыштны содержание. «Кывза найöс и думайта лöгпырысь». Федя öлöдö Шырöс изйöн воча лыйсьöмысь. Молодеч! Кужö асьсö сувтöдны колана здукö и скöралöмысь и воча лыйсьöмысь. «Урöс понтö вöрзьöдан, да нöшта на ёнджыка увтчыны пондас,» - шуö сiйö Шырлы Зонъяслысь поступоксö донъялiгöн пасйöны, мый тайö хулиганство. Öнi татшöмторсьыс позьö весиг сутуга сайö веськавны. | Л: Ситуациясö нравственно-этическöя донъялöм, кужны гöгöрвоны, мый тэ кывкутан аслад группа водзын. П: Колана информация корсьны велöдчöм, межпредметнöй йитöдъяс корсьны кужöм |
7.Самостоятельная проверка с самопроверкой по эталону | -Челядь, видлöй асшöра гижны кывкöртöд: Кутшöмöн петкöдчö Федя Мелехин «Кöнi тэ, кар?» висьтын? Кутшöм качествояс торйöн нин воисны тiянлы сьöлöм выланыд? | Велöдчысьяс уджалöны тетрадьын, гижöны кывкöртöд, а сэсся ас кöсйöм серти лыддьöны класс водзын. | Л: Кужны видлыны ассьыд вынъястö Р: Ас действиеяс колана ногöн тэчöм, сiйöс гöгöрвоöдöм. Кужны лоны дасьöн ёртъяскöд да велöдыськöд сотрудничество дорö, тырмытöмторъяс казялöм да вежсьöмъяс пыртöм |
8.Включение в систему знаний и повторение | -Челядь, бергöдчылам уроклöн заводитчöмас. Мыйла гижысь пыртö «Повны кö, не овны шусьöгсö» висьтö? Кыдзи сiйö йитчöма текстлöн ключевöй эпизодъяскöд? Висьталöй, вермим ми сетны вочакывсö проблемнöй юалöмъяс вылö, кодъяс юргисны урок заводитчигöн? Збыль öмöй повны кö, не овны? Збыль-ö повтöмлун отсалö мортлы сьöкыд ситуацияын? Мый Федялы отсалö вены полöмсö? Вермас-ö помасьны Федялöн олöмыс, кутас кö сiйö повны ва вылын? Позьö-ö босьтны тöдöмлунъяссö олöмö | «Повны кö, не овны» шусьöгсö Федя Мелехин шуö аслыс кузь туйö петтöдз на, кор оз на тöд, мый сiйöс виччысьö ю вылын. Но сiдз артмö, мый буретш тайö кывъясыс отсалöны сылы вены сьöкыдлунъяссö. Став юалöмсö лои восьтöма, ставыс гöгöрвоана. | П: Кужны ориентируйтчыны уроклöн системаын, тэчны ассьыд рассуждение-доказательство. К: кужны висьтавны стöча да гöгöрвоана мöвпъястö. |
9.Рефлексия | И сiдз, ми воöдчим пуктöм могъясöдз. Öнi помалöй сетöм серникузяяссö: Меным кажитчис талунъя урок вылын, сы вöсна мый… Меным урок вылын вöлi сьöкыд, сы вöсна мый… Ме гöгöрвои, мый… Ме ог вöлi тöд, мый… Та вылын урок помасис. Аттьö, челядь. Аддзысьлытöдз. | Челядь висьталöны мöвпъяссö. Челядь донъялöны асьнысö. Велöдысь оценкаяс вуджöдö журналö. | Р: Кужны гöгöрвоны, мый тöдан, а мый колö на велöдны. Л: Кужны кыпыда донъявны ассьыд уджалöмтö. |
Предварительный просмотр:
1 карточка
— Федя,— шуö Шырыд,— кöсъян мешок тыр деньга нажöвитны?
— Куш кöсйöмыд этша на,— серала ме.— Кöсйöмсьыд зептыд оз тыр, торйöн нин мешöкыд.
— Эн öмöй тэ кывлы?— шензьö Шырыд:— Чукöртöны йöзöс пуръяс кылöдны. Шунькнитам кар дорöдз, и витсё-квайтсё чöлкöвöй дась лоö.
— Шунькнитысь петöма, дыш да горш! Аддзан, кыдзи ойдöма Сыктылыс? Ыджыд ваыс зутшкас кутшöмкö полойö, да сэнi и ковмас гожйыны.
Шуавнысö ме шуалi тадзи, а аслым Шырлöн кывъясыс желлясисны нин. Дерт, шуам, муна кö ме вöрö, гашкö и вая на нöшта öти дозмöрöс. А ог кö вай? Сiйö öд менö сэнi оз виччысь. Сэки мый пондам няклявны? А пуртö кылöдöмысь, волан кö быттьö карöдзыс, не öти пажын да ужын ваян гортад. Сьöм и... А мый, гашкö и, збыльысь видлыны? … (Кутшöм шусьöг?)
2 карточка
Век жö менö зымкнитöдiс Чушки-Вишки плешö. Чорыда швачкöбтiс. Сы вöсна мый паськыд плешыс вöлi зумыда нин дорöма быдсяма лöпнас: кернас и вужлянас, увнас и кляпнас,— ставнас сiйöн, мый сöмын шедö тулысын ыджыд валы. Медпервой менам пурйöй дзоньнас сыркмунлiс, сэсся пондiс быд ногыс дзуртны, ружтыны, омлявны. Няжмунiсны ромщинаяс, ставыс вежыньтчис, киссьöм гармуни моз, весиг чомйöй пöлыньтiс вомсö. Бипурувса керъяс чашкалiсны, и öгыръяс да пöсь пöим дзожгöмöн пондiсны киссьыны ваö, и ме весьтö кыпöдчис еджыд ру кымöр.
«Со и кывтi карöдз!— садь быртöдз повзи ме.— Сiдзи тэныд и колö! Тайö тэныд Микол вöсна!..»
Визув ваыс лёк звер моз мургис-эралiс, пондiс вынысь патурликöдны бöръя плиткаöс, сюйны сiйöс мукöдъяс улö. Ме шыбитi пöвйöс да кватитi нопйöс, мед, кытчöдз абу на сёр, чеччыштны пемыд дi вылö.
Но сэки ме казялi, мый пурйöй швачкысьöма абу дзик плеш шöрас, а неуна шуйгавывджык, и шуйга визулыс мый вынсьыс кыскö да мырддьö миянöс веськыдыслысь. Ме бара тшапнитi пöвйöс да, сöткиг-ружтiгтыр, пондi отсасьны. Но-но, давай! Но, ёнджыка! Но, сюра сöтана! Но, едрö и ерö...
И öд ньöжйöникöн, гыж кузя воськовъясöн, пондiс öтуртчыны пурйöй шуйгавыв. Сэсся век öдйöджык, öдйöджык, и со нин ме бара шыльыд ва вылын, бара мена шывгö-нöбöдö, быттьö немтор абу и вöвлöма.
3 карточка
Сюйис менö Волся полояд, вабергачад. Но ме сэтчö эг öтнамöн веськав — нёль пуръя дядьö тшöтш гöгралiсны, Шыр тшöтш и. Со кöнi ме вöтöдi сiйöс... А унаöннад тай абу гажтöм, кöть кöн. Ми пондiм чуксасьны, серавны öта-мöд вылын. Асьнымöс сöмын и гöгрöдлö, сöмын и гöгрöдлö... Мися, куш öти сералöмнад тай он мын татысь.
А кыдзи менö сюйиссö? Чукыль сайын ме друг пондi казявны, мый кутшöмкö гöгöрвотöм вын вештö пурйöс веськыдвыв. Кватитi зiбйöс — оз судз. Бара ковмис босьтчыны пöв дiнö да сынны. Сöмын öнi менам сынöмысь пöльзаыс, буракö, вöлi пуркостса ва коялöмысь не унджык — шулывлöны тай сiдзисö, меным буретш и лöсялiс... Юыс меысь шуйгавыв пышйö, а менö веськыдвыв жуньгöдö. Сэсся кытшов босьтöдiс да пондiс катöдны паныд, бöр гортлань. Дерт, ставыс татi ойдöм видзьяс... Сэсся коркö-некоркö бöр бергöдiс да пондiс нöбöдны зэв джуджыд кыркöтш бердтi юлань. Радлыны нин пондi: мися, öти кытшовтö кöть и вöчи, ог на сыв таысь... Но менам пурлы, менам асныралы, буракö, кажитчöма нин полойса ваыс. Воис пыранiнöдзыс, зэв лабутнöя бергöдчис да и босьтiс выль кытшов. И зiбйöй некытчö матö оз судз.
Рытывбыд и войбыд тадзи кытшлöдлiс менö. Мукöдсö тшöтш и. Первойсö ме ныр вылö усьтöдз тiльси-уджалi, сынi да мый да. Сэсся и сьöлыштi. Мися, узьышта кöть чомйын, а то неморт кодьöн нин кутi лоны, он и тöдлы, усян пур вывсьыд. Биöс лöсьöдыштi — мед эз кус ни эз сотчы вывтiасö, да и водi.
Садьми асъядорыс. Чорыда шкоргыштi, немтор весиг эг вöтась. Вынöй тöдчымöн содöма, быд сöн ворсö. Мися, öнi мыйкö думыштам! А тöвзьысьöма, и мый бурыс — юлань пöльтö тöлыс. Ок эськö, парус кö вöлi! Тöлыс эськö и чепöстiс менö ю визув вылас... Чомйöй, дерт, тшöтш жö парус пыдди туйö, но ичöт. А вай жö, мися, зэвтала зiбъяс вылö, кутшöм кöлуй менам эм. Шуöма — вöчöма. Зэвтi фуфайкаöс, пинжакöс, мешöкöс, нямöдъясöс. Кöсйи тшöтш и гачöс вылысь пöрччыны, но яндысьыштi... Мукöд пуръяс вывсянь зонъяс сералöны: «Федя, он-ö нин вузасьны кöсйы?» Ог на, мися,— городi воча, а ачым бара на босьтi мустöммöм пöвйöс да выль вынöн пондi сынны, отсасьны тöлыслы. Комилесскöй вöв моз песси. Видзöда — отсалыштö, тöдчымöн матысми ме водзын гöгралысь Шырлань.
4 карточка
Пароход!
Ми Шыркöд, быттьö тшöктöм серти, звирк сувтiм кок йылö.
— Ме понда сулавны черöн, а тэ босьт багыр!— горзö Шыр, би югöрын бура тыдалысь чужöмыс сылöн тырöма тöждысьöмöн и збойлунöн.
Ме гöгöрвоа сiйöс. Миянлы колö петкöдлыны пароходса капитанлы, мый кöсйö кö сiйö öбидитны миянöс, мед бур оз виччысь — кералам и розьöдлам пароходсö гырк пытшкöсöдзыс...
Ми тöдам, кывтысьяс неöтчыд висьтавлiсны, мый пароходъяссьыд колö повны, капитанъяс пöвстас пö быдсяма тешитчысьыс эм. Серам вылö, либö сы вöсна, мый дыш бокö кежыштны, татшöмъясыс неöтчыд нин пасьвартлöмаöсь кöлесаяснас пур плиткаяс. Унаöн веськавлöмаöсь и парохода-баржа костö. Лоö кö тадзи, буртö нинöм нин виччысьны...
Ми Шыркöд смела сувтiм пур дорöсö. Чер да багыр киясын кутам сiдзи, мед пароход вывсаясыс ылiсянь на казяласны найöс. Мед сэсся думайтöны, а ми асьнымöс дойдны ог лэдзöй.
Пурнымöс миянлысь кылöдö шöр визулöдыс, пароходыс сэтi жö катö. Коднымлыкö ковмас сетны туйсö. Ми эськö и сетам, мед нин, абу ми ыкшаöсь, но некыдз ог вермöй.
Пароход веськöдiс миян вылö яръюгыд öтка синсö, здук кежлö синтöммöдлiс миянöс. Сэсся скöрысь букöстiс сибдöм кыз гöлöсöн. Быттьö öш, люкасьöм водзвылын. Сэсся и ньöжйöникöн пондiс кежöдны нырсö шуйгавывджык. Сэтшöм-татшöм, мися, гöгöрвоин, мый миянкöд шутитны оз позь. А кор ми öтвесьтасим, капитан, помощникыс ли, мыччысьлiс рулевöй рубкасянь да, мыйкö зэв скöрысь горзiгтыр, петкöдлiс миянлы кулаксö. Чужöмсö эг и удит казявны, но шапкаыс сылöн — мича... Мый сiйö горзiс, эг велалöй ни. Сы вöсна, мый ныр улын бузгис-шлопöдчис пароходлöн ыджыд кöлесаыс. Пидзöсöдз ылькнитiс кöдзыд топыд вал, муртса кок йылысь эз пöрöд. Ми чепöсйим бöрвыв.
— Багыртö босьт!— горöдi ме Шырлы.— Пондам йöткасьны баржасяньыс!
Баржалöн ыджыд сьöд тушаыс, кодöс вöлi лэдзöма пароходсянь кузь тросъяс вылö, чöла вувзьöдiс миян вылö. Ми пыксим сы нырö багыръясöн да пондiм мый вермöмысь йöткасьны-колльöдны сiйöс. Но кöть кутшöма эгö ружтöй, öти плитка пельöс век жö веськалiс сьöкыд утюг улас. Плиткаыс дзикöдз вöйлiс ва пыдöсас, кылö, ратшмунiс-чегис ромщинаыс. Мыйöн сöмын баржа бöжыс бöр шлывснитiс плитка вывсьыс, ми тэрыба тювöдiм сэтчö накат кер да ньöръялiм сы дiнö разгысьöм «авиояссö». Кардъялiм, мöд ногöн кö шуны. Позьö шуны — воштöмъястöг ставыс помасис. Некымын накат кер эськö и мыськовтiс плитка вылысь, но ми найöс пырысь-пыр жö куталiм да бöр лэптiм пур вылö.
— Бур, мый паськыд чертö петкöдлiм да кежыштiс,— чиктылö-радлö Шыр.— А то эськö лöсьыда гудралiс миянöс.
5 карточка
Шуöны: тайö сиктыс пö медся кузь став Коми му пасьталаас. Сы пыдди нимыс сылöн, буракö, медся дженьыд — Ыб.
Сикт шöрланяс кымын, зэ-эв джуджыд кыркöтш вывсянь, мия¬нöс пондiсны дэльöдны татчöс зонкаяс. Мый вынсьыс горзöны öтвылысь: «Пуръя дядьö,— полойö, полойö! Пуръя дядьö,— полойö, полойö!»
Кывза найöс и думайта лöгпырысь: мися, аслыныд эськö, йöйяслы, кöть öтчыд гöгралыштны полояс! Мый эськö тi сэки пондiнныд сьывны-а…
Но зонкаяслы дэльöдчöмыд, тыдалö, кажитчис этшаöн на, и найö пондiсны шыбласьны изъясöн. Торйöн нин зiлис ар дас квайта кузь зон. Вöлi жвучкöбтас кузь сойнас, да изйыс пур сайöдз на шутёвтö, инмас кö — юртö поткöдас. Сылы эськö, та кузяыслы, яндысьны нин колö, со тай, петöма да мый керö... Лоис дзебсьыны чомйö. Шыр заводитлiс öктыны пур вылö сибдöм изъяссö да воча шыбласьны, но ме дугöдi сiйöс: мися, урöс понтö вöрзьöдан, да нöшта на ёнджыка увтчыны пондас. Торйöн нин, шыбласьнысö миянлы колö вöлi улiсянь вылiö, и изйыд зэв матö лэбö...
6 карточка
Уголовный кодекс РФ
Статья 167. Умышленные уничтожение или повреждение имущества
1. Умышленные уничтожение или повреждение чужого имущества, если эти деяния повлекли причинение значительного ущерба, -
наказываются штрафом в размере до сорока тысяч рублей или в размере заработной платы или иного дохода осужденного за период до трех месяцев, либо обязательными работами на срок от ста до ста восьмидесяти часов, либо исправительными работами на срок до одного года, либо арестом на срок до трех месяцев, либо лишением свободы на срок до двух лет.
2. Те же деяния, совершенные из хулиганских побуждений, путем поджога, взрыва или иным общеопасным способом либо повлекшие по неосторожности смерть человека или иные тяжкие последствия, -
наказываются лишением свободы на срок до пяти лет.
О судебной практике по делам о нарушении правил пожарной безопасности, уничтожении или повреждении имущества путем поджога либо в результате неосторожного обращения с огнем см. Постановление Пленума Верховного Суда РФ от 05.06.2002 N 14.
По теме: методические разработки, презентации и конспекты
![](/sites/default/files/pictures/2013/06/14/picture-266044-1371222235.jpg)
Конспект урока по литературе по рассказу К.Паустовского "Ты прости меня,мама,прости..."
Урок внеклассного чтения в 8-9 классах.Технология критического мышления.Использование элементов ИКТ.Творческая работа...
![](/sites/default/files/pictures/2017/11/12/picture-153070-1510462521.jpg)
Открытый урок по литературе по рассказу В.П. Астафева "Конь с розовой гривой"
Методическая разработка открытого урока по литературе...
![](/sites/default/files/pictures/2017/02/21/picture-842669-1487687504.jpg)
Урок по литературе по рассказу И.С. Тургенева " Бежин луг". Роль пейзажных зарисовок в рассказе " Бежин луг".
В ходе урока ученики приходят к выводу о том, каким талантливым писателем-пейзажистом был И.С.Тургенев. Отмечают текстовые средства выразительности,.помогающие автору создавать картину русской природы...
![](/sites/default/files/pictures/2024/03/16/picture-1516606-1710601808.jpg)
Конспкут урока. Коми литература. Тема: Чужан кывлӧн да чужанінлӧн талуныс да аскиыс. 8 класс
Тема: Чужан кывлӧн да чужанінлӧн талуныс да аскиыс....