«Тядянь кяль – шачема кяль»
план-конспект

Внекласснай мероприятиясь  мокшень кяльса.                               Темась: «Тядянь кяль – шачема кяль»

ТЕМАСЬ: «ТЯДЯНЬ КЯЛЬ – ШАЧЕМА КЯЛЬ»

ЦЕЛЬХНЕ: -максомс содамошит мокшэрзянь народть культуранц колга;

-кемокстамс иттнень содамошиснон мокшэрзянь поэттнень и писательхнень творчестваснон коряс;

- касфтомс иттнень кельгомаснон тядяти, тядянь-алянь кяльти,

МЕРОПРИЯТИЯТЬ МОЛЕМАЦ:

Мокшень кяльняй, лямбе валняй,

Тон вдь тядязеннят кяльсь!

Катк эрь валняце тонь гайняй!

Сембе мокшетнень тя кяльсь. 

(В. Родькин)

Кельгома тядяняй, –

Шачфтыняй-касфтыняй,

Порькскада анниняй,

 (Н.Циликин)

ТОНАФТЫСЬ: Шумбратада шабат, инжихть! Тячи школасонк ила, пуромоме марса, штоба корхтамс и шнамс шачем-касом краеньконь и кяленьконь. Тядянь кяль… Кодама мазы тя валсь, валрисьмось и кодама оцю смузь сон канды. Минь шачеме мархтонт аф пяк оцю мастор уженяса – Мордовияса и сонь пяк кельгсаськ. Кельгсаськ шачема веленьконь, коса сембе корхтайхть мокшень кяльса и коса эрь кодама илань ётафтомста кулевихть велеть квалма мазы морот и, марямок синь, тон бта кандоват стама вастс, коса аш пичефкс, ризф, аш эряфонь сталмот. Кельгсаськ ня козя нормальда, панкта, зверьда, нармоньда туста вирьхнень, кельгсаськ кърхка, лентакс шуди ляйхнень, парьхциса вельхтяф лугатнень и паксятнень.

ТОНАФНИСЬ:

Мон кельгса эсь шачема крайть,

Коса касонь и коса мон эрян.

Кельгса Севонть и Мокша ляйть,

Эсь велезень, эсонза эряфть.

Кельгса якамазень вирьге

Начка нарнява пиземда меле,

Коса ситявнясь морай тейне,

Озай лафтузон ёфси аф пелезь.

А кодама мазы лугась

Шобдавань зарять пингста!

Нарса ару расань путьконясь

Солай шить сюролданзон инкса.

Мзярдовок аф полафтса мон

Шачем велезень, кельгома васттнень.

Сяс, мес тяса эряйхть эсене монь,

Конат тейне тянь сембонь и максозь.

ТОНАФТЫСЬ: Мокшень кяльса корхтасть минь атянь-атяньке, корхтайхть минь тядяньке-аляньке, и тя кяльса минь васенцекс азоськс сембода питни валть – «тядяй». Тя кельгома ломанть колга корхтамс можна пефтома, мъзяра лямбе вал минь афолеме мархтонт аза, синь педа пес улихть кържат.

ТОНАФНИСЬ: «Тядя».

Сёксесь олькси кельме сельмоведьса,

Штадот шуфттне, тялоти лядсь вакс…

Эрь шиня кудъётконь тефнень петьсайть,

Шава кудозт озат вальмять ваксс.

Ниле стена ёткс лядоть ськамот,

Пелевес най кодат и кштирдят;

Лафтуфнень лангс лаподсь ризьфу сталмот, –

Сюнедост кафксть вишкста сиредят.

Аф кунара идьта кудце пяшксель

(Содаф эстейть, кода серьснон кассть),

Сась ся пингсь, и фкя-фкянь мельге эшксстот

Нармонькс лямбе пизостот лийкстасть.

Масторть келес срадондсть янцна-кисна,

Конацка ни меки изь мърда.

Тяни синцень шачихть-касыхть идьсна,

Кажнайсь пиза эстейнза пърдай

Сюре пяльди кядьбесот кштирняце

Арьсематнень понай сюреть ёткс.

Сельминголет ащи эрь идняце, –

Сюре лаца арась ётксонт соткссь.

ТОНАФТЫСЬ: Тядя… Сёлгить сельмотнень и кулхцонтт. Тон марясак тядяцень вайгяленц, кона эряй тонь потмосот, седисот, тяфтама содаф и маластонь. Сонь аф шорясак лия вайгяльхнень мархта. Мъзярда касат оцюста, фалу кармат мяляфтомонза тядяцень вайгяленц, сельмонзон, кядензон. А кодама мазы нюрямонь моронят сон тейнек морсель, мъзярда минь ёфси ёмланятолеме. Эрьда марняса кулхцондсаськ университетонь «Журналистика» отделенияса тонафни Аникина Маринать стихотворениянц, конань лемоц Нюрямонь мора.

ТОНАФНИСЬ:

Конить сельмотнень, удока, фкянязе,

Весь кунара ни инжикс сей сась.

Ванка, панчфкязе, раса сиянязе,

Тяштьське ваймама, нява, срхкась.

Сонга сизесь ни цифторкшнемс менельса,

Савор путозе тодути прянц…

Сембе шабатне удыхть ни менельса,

Шабрась матозе Катя стирнянц.

Конить сельмотнень, удока, маконяй,

Ванды валда шинясь тага стяй.

Васька катоське матодовсь, тяконяй,

Аньцек тонь удомаце аф сай.

Мазы оння катк ангелце кучи тейть,

Ащи вельхкссот мянь шобдавать самс,

Сон кунара ни пацянзон келептсь сей,

Мялец саворня онозт лийкстамс.

Конить сельмотнень, удока цёраняй,

Кда мяльце, тейть азондан ёфкс.

Удок, ваймоняй, ванды тейть мороня,

Морай кайгиста садсонк цёфкссь.

Ну и месть тяни ванондат лангозон,

Бта пелят, мон эздот туян?

Сака, ёмланяй, матте эсь ваксозон,

Питни тондедот мон аф муян,

Конить сельмотнень, удока, лефкскязе…

А тяни, шабянят, кулхцонттама нюрямонь мора, конань тейнек морасы госуниверситетонь хорть солисткац Н. Кильдюшовась.

(Путови грамзапись госуниверситетонь народнай хорть исполненияса. Солисткась – Н. Кильдюшовась)

ТОНАФНИСЬ:

Аяш эряфса стама вал,

Кона питни валда тядяй.

Аяш эряфса стама туфтал,

Штоба тядя валть кяжиста азомс.

Мзярда тон повоть зиянц,

Мзярда ашет ни кеподемс вийхне,

Васенцекс шары тонь мяльс

Тядясь, кона эряфса семботь тисы

Штоба идец улель шумбра,

Штоба ёню улель и мазы

И семботь инкса тянь

Тейнза оцю «спасиба» эряви азомс.

Тядяце шачфтонзе, касфтонзе тонь,

Оцю кис прважанзе-эряфс.

Сон тись стане, штоба кеме улель тонь онць,

Штоба афолеть васьфте эряфсот перяфкст.

Семботь инкса тянь, сюконяк,

Палайть сембе срманянзон псиста.

Мярьк, што кельгат эсонза пяк,

Аньцек эряза сяда ламоняс шиса.

ТОНАФТЫСЬ: И тя аф шава валхт. Кепотьксонди, вов кодама цебярь обрас тись Н. Циликин, няфтемок кельгомать тядяти:

ТОНАФНИСЬ:

Кельгома Тядяняй,

шачфтыняй-касфтыняй,

Порькскаса анниняй,

кис лихтиняй,

Лажназь прважайняй,

кенярдезь васьфтиняй,

Тячемс ужяльдезь

пъшкятькшнят: «Идняй!»

Кельгома Тядяняй,

ажаняй-матаняй,

Тячиняй-вандыняй,

виде киняй,

Пелезне стяфтыняй,

кельгозне матыняй,

Шобдавань заряняй,

валда шиняй!

Кельгома Тядяняй,

кемама вастоняй, -

Ащат кибрясон

прокс тяште сиянь, -

Пацяняй, неженяй,

менельняй-масторняй…

Тонь лацот Тядя

аш киньге лиянь!

(Морави мор Н. Кошелевать музыканц лангс «Сембодонга мазыняй»)

ТОНАФТЫСЬ: Тядяце тонафттанза кельгома аф аньцек эсь кяльцень, но эсь шачема крайцень эса. Вов И. Кудашкин эсь кельгоманц шачема ширенц колга азондсы лямбе, тёждя валняса:

ТОНАФНИСЬ:

Мон келькте, крайняй, пиже лаймонь кашторф,

И лажадан тейть, пиче вирень гайф,

Мес цебярь тевонь тиема тон маштат;

Мес паксятне тонь сёроса люкайхть.

ТОНАФТЫСЬ: А кодама мазы и эрек М. Безбородовонь кялец:

ТОНАФНИСЬ:

Кизонда, вирняй,

Пиже лопаняй,

Пси мани шиня

Шида кяшиняй,

Яксян потмоват,

Шуфттнень ёткова,

А пингонь-пингонь

Ляйге, лоткова.

Кулхцондан эсот

Кода тон увнат,

Тифтень лопаня

Модати прафнят.

Мастору лопась

Либордозь прай:

“Вай, курок сёксесь

Якшамть мархта сай”…

• Тяфта кашторды

Прафке – лопанясь,

Алга шаштомста

Сединь токайнясь.

Седись токави …

Марят пилеса,

Кода нармоттне

Морайхть келеса

ТОНАФТЫСЬ: А вов кода кельгозь, мялень петезь сёрмады А. Пудин эсь шачема краенц колга.

ТОНАФНИСЬ:

Мокшень крайняй, шачема крайняй,

Моньге морозень примак.

Катк сон паксять вельхксса гайняй,

Прокс аф сетьмоси сон катк.

Седизе монь аф кирди

Тядянь-алянь крайть аф шнамс.

Мон аф бокста въдь, аф ширде

Ардонь мокшень модать лангс.

Мон кунара тоннян, тоннян,

Колгат тяштян въдь аф стак.

Мокшень крайняй, мазы онняй,

Моньге морозень примак.

ТОНАФТЫСЬ: А кодама цебярь ёжу валмуворксса няфневи мокшень ломаттнень смузьсна:

ТОНАФНИСЬ: Лама содак, кържа корхтак. Сура аф видят, пача аф пидят. Кодама тонафтысь, стама и тонафнись. Цебярь валсь ярмакта питни. Эсь кядезе – эсь мялезе.

ТОНАФТЫСЬ: Мокшень кяльса корхтасть мастор лангса лама содаф ломань. Нят – Советскяй Союзонь геройсь М. Девятаев, маршалсь Устинов, ВЦСПС-нь председательсь Шалаев. Мокшетнень ёткса эрясь адмирал Ушаковсь, кона путф святой ликнень ёткс.

Цёфксокс кайгихть мокшень морсиеньконь вайгяльсна: Россиянь Заслуженнай артисткать Н. Марковать, А. Куликовать, Н. Спиркинать, Л. Князьковать и лиятнень мазы морсна, конатнень сёрмадозень народнай поэтсь, мокшень авась Н. Кошелевась.

Мокшень кяльть ули сонцень эряфонь киц, конань лангса васьфсь аф кържа сталмот, и конатнень сон васьфни тянемс. Тя лац няеви тяниень эряфса. Полафневи марнек перьфпяльсь, сиредихть ломаттне велеса, сиреди и юмай сонць мокшень велесь, мархтонза юмси и минь кяленьке, минь культураньке. Од ломаттне тушендыхть ошу, юкснесазь эсь юрснон. Кой-кит виздихть корхтамаснон сембонь ингольде тядянь кяльсост. Аньцек мзярда кяшихть кудгаст, корхнихть эсь ётковаст мокшекс. Мес тяфта лисенди? Коста тя пичефкссь? Кали мокшень кяльсь сяда кальдяв, мярьктяма, рузоннеть коряс, кали рузонь сарафанць сяда козя мокшень панарда, кали мокшень моротне сяда кальдяфт рузоннетнень коряс, кали рузонь писательхне и поэттне сёрмадыхть сяда лац?

(Тяса морави морось «Вай, паксяса». Валхне П. Черняевонь )

ТОНАФТЫСЬ: Вов тя мороть да и ламоц мокшень моротнень кулхцондомда меля ёрат ювадемс: «Ломатть, лоткада! Ваность, мезе тинь тиенттяда! Мес срафнесасть кяленьконь? Мес сонь юмафнесасть?»

Пяк пара, што тянь колга мекольдень пингть кармасть ломаттне арьсема, и вятиеньке-оцюняньке тянь шарьхкодезь. Мекольце кизотнень тиендеви станя, штоба родной кяльсь меки суваль эряфозонк, штоба афоль юма-ара.

Мялезонк ся, што телевиденияса молихть передачат мокшень кяльса, пара и ся, што, хоть и аф сембе, а ламоц школатнень эса сон тонафневи. Надиятама сянь лангс, што кяленьке аф юмай, а, меколанкт, сонь смузец эряфса сяда касы. И кивок аф кармай виздема эздонза, вдь, сон минь тисамазь малаценнекс фкя-фкянди, сон – тядянь кяленьке.

ТОНАФНИСЬ: Мокшень кяльсь…

Тя кайги валхне

Горьняй пайгонякс цинняйхть.

Синь, кода тундань панжи саттне

Сембе перьфпяльть мазопнесазь.

Синь кандыхть седиеньконди лямботь,

Синь макссихть тейнек оцю вий.

Тя тячинь шиньке минь и вандысь,

Тя эряфоньке сембонь минь.

Минь морсетяма мокшень морот,

Минь кельгсаськ тядянь-авань кяльть,

Минь кельгсаськ ляйть и лайме порать,

Минь кельгсаськ марнек мокшень крайть.

Минь кельгсаськ кяльть, мес сон инь мазысь,

Инь кельговись, инь мазысь сон.

И коза ба афолемазь вяте эряфсь,

Сон кармай фалу тяштекс минь.

ТОНАФТЫСЬ: Э-эх, мзяра масторда, мзяра республикада, ошта, веледа, ломаньда пефтома модать лангса! И эрь ломанть, кона эряй минь кели масторлангсонк, ули шачема кялец: кинь рузонь, кинь мокшень, английскяй, немецкяй, эрзянь и лама-лама лият, конатнень лувомс нъльне сурхневок аф сатыхть. Но мъзяра кяль ломанць афоль тонада, а сяка ули фкя, конац тейнза инь малась и питнись. Тя ся кяльсь, конань вельде минь азоськ васенце валоньконь, арьсеськ васенце мяленьконь.

Козя ся ломанць, кона шачема кяленц кельгсы и шнасы, ванфнесы седисонза Шкаень толня лаца. Козя ся, кона вестьке аф аерды эсь кяленц эзда и сембе виенц путсы сонь эряфонцты. Но ся, кие кяленц анок мимс и рамамс, кие питневок тейнза аф путы – сяшкава ашу, нльне сави сонь аньцек ужяльдемс. Тяфтама ломанть ваймоцка равжа, седиецка коське и кельме. Эряви лац шарьхкодемс ся, што кяльсь – тя оцю казня Шкайть эзда. Шачеть, шятять лямбе модати, няить эсь сельмосот шить валда сюролданзон, азыть васенце валцень – павазуват! Кеняртть тянди!