РАБОЧАЯ ПРОГРАММА учебного курса «Мордовская литература» в 6 классе
рабочая программа (6 класс)

РАБОЧАЯ ПРОГРАММА

учебного курса «Мордовская литература» в 6  классе

                                                   Составитель:  Моисеева Людмила Михайловна

                                              2019 – 2020   

   1. Учебнай предметть содержанияц.

1)Ингольдень вал.

        Родной литературань рабочай программась тиф котоце классонь тонафнихненди, конанди основакс сявф:

• Российскяй Федерациянь Федеральнай законць «Об образовании в Российской Федерации» №273 от 29.12.2012 года.
• Основной и средняй школань примернай программась родной литератураса  5-11 класса Российскяй Федерациянь  национальнай школань  2000 кизотькса;
• Мордовия Республикань Образованиянь Министерствань «Мокшэрзянь литературань программат 5-11-це классненди», Саранск 2010к.,
• Федеральнай Государственнай образовательнай стандартсь, кона примаф Российскяй Минобразованиять приказонц коряс  05.03.2004к.;
• Учебнай планонц коряс МБОУ «Мордовско – Полянскяй ООШ»  

Афкуксонь календарно-тематическяй планць тиф, нежедемок «Мокшэрзянь литературань программат 5-11 классненди», кона нолдаф 2010 кизоня, Саранскяйса, Мордовскяй книжнай издательстваса. (ингольдень валсь). Программать сёрмадозь: филологическяй наукань докторсь А.И.Брыжинский, педагогическяй наукань докторсь А.М.Каторова, филологическяй наукань кондидатсь Е.И.Азыркина.

    Программась ащи фкакс 6-це классонь «Родной литература» тонафнемань книгати общеобразовательнай учрежденияса, книгать автороц Азыркина Е.И., Саранск, 2015к. 

Родной литературань  урокти 6-це класса макссеви фкя част недляти, общеобразовательнай программать коряс колмогемонь   част, школань тонафнемань планть коряс 34 тонафнемань недля, марнек 34 част кизоти.

Тонафнемань материалсь етави программань материалть кирьфтаманц вельде.

2)Литературать тонафнемань целенза и задачанза.

Котоце класса национальнай школань ученикне родной литературань урокса тонафнихть лувфть коряс устнай и письменнай ответонь максома, произведениять идеянц, героинзон и конфликтонзон шарьхкодема.

Тя класса тонафневи произведениятнень эса лама материал, штоба касфтомс ученикнень видешить, ялгаксшить и родной природать колга эстетическяй содамашиснон.

Ученикне крхалгофтсазь эсь содамошиснон литературнай ёфкснень, устнай народнай творчествать колга, кармайхть содама, мезе стамсь стихотворнай и прозаиескяй корхтамась, рассказсь, повестсь, литературнай героень портретсь, пейзажсь, эпитетсь, метафорась, сравнениясь, олицетворениясь, гиперболась.

Крхкалгоды и словарнай работась. Ученикнень устнай и письменнай корхтамасост эвондай отвлечённай значения мархта лама вал.

Сяда сидеста кармай ётафневома картинань и иллюстрациянь коряс работась, мезсь лезды ученикненди художественнай литературать, живописть и графикать кода искусствань шарьхкодемаснонды.

    Лама лия предметтнень еткса, конат тонафневихть школаса, няевикс васта максови мокшэрзянь литературати. Родной кяльса серматф произведениятнень мархта шабатне васьфтихть васенда начальнай класса, сяда меле художественнай литературать колга содамошитнень касфтсазь мельдень класса тонафнемста. Литературась лезды тейст шарьхкодемс эряфть, перьфпяльть, кърхкалгофтсыне тевснон-мяльснон, козякофтсыне кяльснон-валснон, кеподьсыне корхтамань и сермадомань кялень культураснон, келептьсыне эстетическяй ванфксснон,касфтсынь содамошиснон эсь культураснон, масторснон колга.

     Литературань произведениятнень вельде тонафнихне сяда цебярьста кармайхть содама эсь народснон тевонзон-мялензон, иланзон, сонь кяль-валонь мазышинц и эряфонь киса смузенц, сядонгольдень эряманц-ащеманц.

      Родной литературань урокнень инголи путневи цельхть:

• тонафтомс шабатнень родной кяльть и литературать вельде шарьхкодемс эсь народснон историянц и тяниень пингонь эряманц,
• воспитандамс афкуксонь патриотт,
• касфтомс содамошиснон мокшэрзянь народть историянц, культуранц колга,
• касфтомс шарьхкодемаснон кяльть национальнай башкаширенц колга.

      Эсь кяльса серматф произведениянь тонафнемась панжи кели ки рузонь литературать шарьхкодеманцты и сонь вельденза лия нароттнень литератураснон содаманцты, сон лезды сяда теждяста шарьхкодемс сембе искусствань виттнень: киноть, театрать, живописть, музыкать и лиятнень.

Родной литературась кемоста сотнеф эряфть мархта, сяс и полафксне, конат молихть тя пингста, фалу  эрявихть кирдемс мяльса сонь тонафнемстонза.

       Тяни родной литературань урокста произведениятненди идейно-художественнай питнеть путомста сави кирдемс мяльса васендакиге аф идейно-политическяй ширеть, кода ульсь инголе, а нравственнайть и эстетическяйть. Анализонь тиемста васенда эряви шарфтомс мяль марнек ломанень проблематнень панжемаснонды, азомс эряфса писательть ванфонц видеть-аф видеть лангс, кодама художественно- выразительнай средства вельде авторсь панчсесы геройхнень тевснон-валснон, потмоежеснон, ванондсы кялень козяшить. Тяка пингть шабатне  тонафнихть арьсема, эсь мяльснон-арьсемаснон азондома, пара тефнень и афсатыкснень няема.

3) Учебнай планца предметть вастоц

Родной литературань  урокти 5-це класса макссеви фкя част недляти, общеобразовательнай программать коряс колмогемонь   част, школань тонафнемань планть коряс 34 тонафнемань недля, марнек 34 част кизоти.

Тонафнемань материалсь етави программань материалть кирьфтаманц вельде.

4)Программать потмоширец и тиевомац

       Родной литературать коряс программать сермадомста авторхне кирдезь мяльса и нолдазь тевс ся цебярь сатфкснень, конат кочкавсть синь тиевомстост ведьгемоньда лама кизоста. Тонафнемс сявфт ся произведениятне, конат кандыхть афкуксонь нравственнай и эстетическяй питне.

  5-11-це классненди программась тиф тяфта, штоба тонафнихне аф ламонь тонадольхть художественнай произведениятнень  смузьснон  шарьхкодема и тейст виде питнень путома, кармальхть содама теоретико-литературнай шарьхкодематнень и синь вельдест  анализонь тиема, келемольхть кялень козяшисна и эстетическяй  культурасна

     Программаса оцю мяль шарфневи предметтнень ёткса сотксненди. Родной литературать  тонафнемста тонафтыти фалу эряви маштозь нолямс тевс ся материалхнень, конат келептьсазь  и крхкалгофтсазь  шабатнень содамошиснон (лия народонь литературань, живописень, скульптурань, графикань, музыкань, родной масторть историянц колга произведениятне).

      Родной литературань программатненди  сувафтфт  мокшень и эрзянь народть устно-поэтическяй  лама  произведениясна, содавикс писательхнень литератураса касома кисна, поэзиясь, прозась, драматургиясь, азфт аф класса лувомать  коряс книгатнень  лемсна и сёрмадысна.

5-8-це класснень эса родной литературась тонафневи кода литературань морафтома. Шабатне кочкайхть содамошит писательхнень колга, морафтыхть художественнай башка произведеният. 5-це класса, ваномок шабатнень вийснон и мяльснон лангс, произведениятне путневихть жанрово-тематическяй принципонь коряс: васенда максфт идень фольклоронь произведениятне; сяда тов – литературань ёфксне и баснятне, сяльде моли «Идькс пинге» пялькссь, коза сувайхть мяльс туф азксне, конатнень эса главнай геройхне тяфтама жа итть, кода и синць тонафнихне. «Идькс пингть» поладсы «Перьфпяльсь» темась.

Тяза сувафтфт произведеният, конатнень эса морави перьфпяльть мазышиц и азондовихть мяльхть-арьсемат сонь ванфтоманц колга. Аделави ветеце классонь программась «Историясь» пяльксса. Сонь эсонза азондови мокшетнень и эрзятнень эряфсна и Великай Отечественнай войнать пингста врагть каршес тюремасна.

   Программаса тяда башка максовихть теоретико-литературнай шарьхкодемат, аф класса лувомать коряс произведеният и педа-пес арьсеф ся, кодама литературно-творческяй тефт эрявихть тиемс класса.

   5-8-це класснень эса кочкавихть марс тонафнихнень содамошисна мокшэрзянь устно-поэтическяй творчествать, писательхнень произведенияснон и теоретико-литературнай шарьхкодематнень коряс.Сембе тя козякофнесыне шабатнень мялямснон и эстетическяй культураснон.

   Корхтамань и сёрмадомань кялень навыкнень касомаснонды программаса максовихть башка урокт. Эрь класса арьсефт литературань творческяй жанратне, конатнень коряс тонафнихне сёрмадсазь эсь мяльснон. Арьсетяма, тя канды оцю лезкс кялень культурать касома тевса.

   Литературань процессь аф ащи фкя вастса, эвондайхть писателень од лепт, цебярь произведеният, сяс тонафтыхненди фалу эряви келепнемс эсь ваномаснон литературать лангс и старандамс, штоба шабатне улелельхть анокт одонь вешема и содама.

Нюрьхкяня методическяй няфтемат

  Родной литературань тонафнихненди эряви кирдемс мяльса, што минь литератураньке серматф кафта кяльса, но сембе лия ширетнень коряс сон аф явови, сяс мес няфнесыне сембе мокшетнень и эрзятнень эряфснон, койснон и мяльснон. Аф эряви юкснемс сяньге: минь литератураньке кемоста сотнеф рузонь кяльть мархта. Улихть малавикс сюжетт, темат, эряфонь няфтема принципт. Минь писателеньке тонафнесть рузонь и лия народонь художественнай  валонь мастерхнень эзда эряфть сяда цебярьста няфтемаса, сяс шабатненди сидеста сави корхтамс тянь колга. Тяка мархта марса эрь урокса эряви шарьхкодемс, мезе од тись тя или тона писательсь литератураса, кодама общечеловеческяй смузь кандыхть сонь произведенинза, мезьса пяк лац няевихть национальнай ширенза. Сатомшка мяль эряви шарфтомс мокшетнень и эрзятнень койснон лангс (семьяса сяда оцюфнень кулхцондомасна, щамснон, праздниконь ётафтомаснон и ст. тов) и национальнай обуцянь ширетнень панжемаснонды, родной кяльть козяшинц и мазышинц няфтеманцты.

   Родной литературань тонафтыти мяляфтома сявок, што мекольдень кизотнень эряфсонк тиевсь лама полафткста. Сидеста сашендови няендемс, кода валомня бъта стяфневи пряста пильге лангс мъзярда-бъди лама вастова колсеф социальнай, историческяй и нравственнай видешись, мърдафневихть афкуксонь тевсна-арьсемасна ся ломаттнень, конатнень лемсна стакащемда валфтольхть ърдазса. И сембось тя, васендакиге, няфневи литератураса, сяс мес сембе уликс искусстватнень ёткста эряфонь няфти ваномакс сембодонга ладяй лемдемс литературась. Эвондакшни  од сельмованф ётаф событиятненди. Мокшэрзянь литературасовок эвондась аф кържа произведения, коса тя няфневи.

   Тячи писательхненди можна аф пелезь азодомс сянь, мезсь таколфтсыне. А ульсть пинкт, мъзярда эряволь сёрмадомс сянь, мезе мярьголхть «оцюнятне», кепсемс ся кизефкснень, конат таколфтсазь синь, эряфть няфнемс аньцек цебярь ширенц. Къда писательсь ёрась  мезе-мезе азомс эсь эздонза, тушендсь цютькада каршек, произведениясь афоль ноляв печатьс.

Тяконь лувксса коллективизациянь, революциянь, Великай Отечественнай войнань событиятне. Кепотьксонди, революциянь тиихне фалу няфневсть аньцек цебярь ширде, а козятне – мекланкт. Тячи содаф, щто козятнень ёткс шоворязь и тевонь кельги ломаттненьге. Революциянь тиихневок аф фкя лацотольхть, синьге ётксост кой-кие шудефтсь аф кържа аф мувору верда. Великай Отечественнай войнатьке перьф лама мекольдень пингть лисенди аф содафта. Мезе корхтамс, лама аф фкя лацонь мяльда-арьсемада  ломаттнень ёткса тячи. Нъльня мярьгондихть нардамс мялямстонк историять, сяс мес ламоль тоса аеркс тевда, эльбятькста, а кинди пяк мялезонза тячиень эряфоньке. Но кие кода афоль арьсе, а виде ся: истоиясь аф эряви юкснемс. Сяс, тонафнемок родной литературать, тяда эряскода максомс питне няфтьф событиятненди, обрасненди. Ваность васенда, месс тя или тона геройсь тяфта тись. Варжасть шарьхкодемс сонь ваймонц и мяляфтомс, кодама пингста сон эрясь. Ня арьсематне савихть кирдемс мяльса тонафтыхненди литературань произведениятнень ваномста: ушедомань занятиятнень эса, произведениятнень лувомста, анализонь тиемста и мельдень занятиятнень эса.

   Родной литературань урокса эрь темать тонафнемац ушедови ушедомань занятияста. Средняй класснень эса ушетксонь занятиятненди макссеви 5-20 минута, оцю класснень эса жа – марнек уроксь. Ушетксонь занятиятнень основной цельсна – касфтомс шабатнень мяльснон получамс содамошит писательхнень и синь произведенияснон колга, анокламс тонафнихнень произведениянь лувома и цебярьста шарьхкодема.

   Ушетксонь занятиятне молихть аф фкя лаца, кепотьксоди, можна ваномс:

• писательть эряфста пакшт, конат лездыхть произведениять шарьхкодемс;
• родной и рузонь литературань урокса ётаф и од материалть мархта соткснень арьсемасна;
• историческяй, историко-литературнац и бытовой комментариянь тиемась;
• произведениять сёрмадомань историянц тевс нолдаманц;
• кяльть лангса покодемась.

   Ня тефне максомат башка приём вельде, кепотьксонди, ётафтомс экскурсият (писательть эряма вастс, музеи, вири, лугав, паксяв и стак тов), можна нолдамс тевс художниконь картинат и иллюстрацият, кулхцондомс морот и лия музыкань произведеният, лятфтамс ётаф материалть.ушедомань занятиятне ётафтовихть аф фкя лаца. Кажнайть улеза сонцень шамац, эрь писательть мархта васьфтемась куватьс кадоволь шабатнень седиса.

  Ушедомань занятиятнень ётафтомда меле моли произведениянь лувомась. Средняй класснень эса сембе ёмла произведениятне лувовихть урокса, мъзярда жа тонафневихть повестсь, оцю азкссь, то башка пяльксне максомат лувомс куду. Вейхксоце-кефкиеце класснень эса произведениятне марнек, лирическяйда башка, лувовихть кудса. Произведениятнень лувомста васендакиге эряви кирдемс мяльса сонь родонь и жанрань ширенц, сяс мес эрь жанрась вешсы сонцень лувомань кинц. Кепотьксонди, лирическяй произведениятне васенцеда лувовихть фалу класса, кайгиста. Тянь тисы учительсь или учениксь, къда цебярьста машты лувома. Драматическяй произведениятнень тонафнемста сидеста кулхцонкшневихть радиоспектаклятне, конат сёрматфт магнитофонц. Произведениять лувомда меле ушедови содержаниянц лангса работась: путовихть кизефкст, тиеви план, азондови смузец (эпическяйхнень и драматическяйхнень) и тиеви анализ.

   Анализонь тиемста учительсь кочкай эсь мяленц коряс тяфтама методическяй приёмт, конат ладяйхть сонь классонцты тя или тона произведенияти. Эряви шарьхкодемс произведениять смузец и темац, азовихть сюжетонь, композициянь ширетне, изобразительно-выразительнай средстватнень рольсна типическяй характеронь тиемста, панжеви идейнай смузсь.

   Приёмтне, конатнень нолдасыне тевс тонафтысь тя пигста, эрьсихть аф фкя лацоннет :путф проблематнень мумасна и азомасна, комментированнай лувомась, произведениятнень, геройхнень, васттнень, сценатнень карань-каршек арафтомасна и ваномасна, киносценариень тиемась, устна валса портретонь и перьфпяльть колга азондомась, инсценированиясь, литературань налхксематнень ётафтомасна (викторинат, литературнай геройхнень мельге заочнай путешествият) и лият.

   Анализонь тиемань приёмтнень кочкамста и синь тевс нолдамстост учительти эряви мяльса кирдемс шабатнень кизосна и литературать коряс содамошисна.

   Литературать тонафнемста пяк эрявихть тематнень коряс остатка урокне. Ня урокнень эса максовихть геройхненди кърхка характеристикат, арьсевихть путф проблематне и идейнай смузсь, писательть эряфть лангс ванфоц, нюрьхкяняста мярьгомс, произведениясь арьсеви марнек, сембе ширде. Сидеста оцю класснень эса мекольце урокнень пингста ётафтови работа критическяй статьятнень коряс (къда фкя произведениять коряс сёрматф аф фкя статья), эста синь путовихть карань-каршек, азови мезьса синь фкат, кона критикать сяда видет мяленза-арьсеманза. Тяда башка, вейхксоце- кефкиеце класснень эса лядыкс занятиятне оцю темань аделамда меле ётафтовихть семинаронь и зачётонь формаса.

Произведениятнень тонафнемста родонь и жанрань кизефкснень мяльса кирдемасна

Эрь литературань родть улихть сонцень призаконза, кнатнень эса няфтьф перьфпяльдень эряфсь, азфт тяшить мяленза-арьсеманза, кодама эстетическяй вий канды произведениясь лувихненди.

Эпическяй произведениятнень тонафнемасна

Литературоведенияса башка ширекс лувови повествованиясь, лиякс мярьгомс, ётай событиятнень колга корхтамась. Эряфса васьфневи событиятнень и синь колгаст эпическяй произведениятнень эса азондомать ёткса фалу ётай мзъярошка пинге. Сяс азксса, повестьса, романца корхтамась моли ётай пингонь грамматическяй формаса. Эпическяй повествованиятнень эса эрси лама азондома: перьфпялень, кудъетконь предметонь, геройхнень образснон, щамснон, ёжмарямаснон колга и стак тов.

Оцю васта заняйхть геройхнень фкя-фкянь мархта корхтамасна и тевсна. Кой-кона эпическяй произведениятнень эса васьфневихть авторть башка мяленза-арьсеманза ся событиятнень колга, конатнень лангс сон лотски. Сембось тя лезды писательти эпическяй произведениятнень сёрмадомста няфтемс сяда кърхкаста и келиста перьфпяльдень эряфть.

Формань коряс эпическяй произведениятнень можнат явомс колма группава; оцю, средняй и ёмла. Оцю жанракс лувовихть эпопеясь и романць, средняйкс – повестсь, ёмлакс – азкссь, очерксь, баснясь, новеллась.

Средняй классонь программатнень эса сембода няевикс васта макссеви азксти и повести, оцю класса – романти.

Азксть и повесть тонафнемста учениксь аф васьфти пяк оцю сталмот. Азкснень эса аф лама валса, кърхкаста няфтеви кодамовок фкя события, ломанень эряф; эсонза эрьси мяльс туф сюжет, геройхть, конат сембе ширде малат шабатненди. Сяс ня жанрань произведениятнень иттне лувондсазь пара мяльса. Штоба сяда кърхкаста шарьхкодемс произведениять, тонафнити эряви тиемс план (простой, сложнай, цитатный) и азондомс содержаниянц. Азондомань видта лама: подробнай (малавикс текстти), нюрьхкяня, выборочнай и творческяй. Эрь урокса учительсь кочкасы ся видть, кона лезды сяда цебярьста шарьхкодемс произвдениять смузенц. Анализонь тиемста эряви старандамс путнемс иттненди стама кизефкст, конат кошардыхть арьсема и эсь мяльснон азома; геройхненди характеристикань максомста цитатань тевс нолдама, персонашнень тевснон-валснон вельде обуцятнень башка ширеснон панжема.

Сяда стака школаса роматтнень тонафнемасна. Романть лангса работать ушедомста тонафтыхненди эряви лац арьсемс, кона пялькснень сявомс, конатнень лувомс класса, конатнень кудса, конатненди тиемс кърхка анализ, конатнень ваномс курокста и нюрьхкяняста, ваномс, кона пялькснень вешихть художественнай азондома, конатнень азондсазь ученикне, а кой-коста и сонць учительсь.

Эрь родонь и жанрань произведениять тонафнемац ушедови сонь лувоманц эзда. Романтьке васендакиге эряви лувомс. Мзярда шабатне туйхть кизонда ваймама. Тейст макссеви задания: лувомс программати сувафтф оцю произведениятнень, кода рузонь, станя жа родной литературать коряс.

Къда тонафнихне ваймама пингть ашезь лува эрявикс произведениятнень, то тяка жа заданиясь макссеви тонафнема пингста, тонафнема материалть ушедомда инголе.

Эрь монографическяй темать тонафнемац панжеви ушедомань заданияста. Вейхксоце – кефкиеце класснень эса ушедомань занятиясь сяви целай урок, лияста и сяда лама. Ушедомань урокненди сявондеви эрь кодама материал. Кепотьксонди: произведениять сермадомань историяц, документт, конат лездыхть сяда цебярьста шарьхкодемс произведенияса няфтьф пингть, прототипнень колга (къда синь улихть) корхтама, писательть биографияста сявф пакшт, конат лездыхть произведениять шарьхкодемс и стак тов.

Ушедомань заданиять ётафтомда меле уставави произведенияти анализонь тиемась. Школань анализс аф фкя лацонь литературоведениянь анализть мархта, кода задачатнень, станя жа приемтнень коряс.

Традиционнай рузонь методикаса улихть эрь кодама анализонь тиема кит. Синь етксост оцю васта заняйхть тяфтапне: проблемнай, сюжетно-композиционнай, эпизодонь лангса, геройхнень образснон лангса работась, произведенияса авторть позициянц шарьхкодемац.

Кодама ба анализонь ки афоль кочка тонафтысь, сон фалу старандай шарьхкодемс произведенияса путф проблематнень, ванцы ученикнень мархта сюжетть, тии анализ башка пяльксненди.

Лувись (кода ёмлась, станя жа оцю ломанцьке) книгань морафтомста васендакиге шарьхкодсы сюжетть: событиятнень, конат максовихть

произведенияса фкя-фкянь мельге, геройхнень тевснон-валснон, сяс и анализське школаса сидеста ушедови сянь эзда, кода шарьхкодезь шабатне произведениять смузенц. Эряви путнемс стама кизефкст, конат кошардсазь тонафнихнень арьсема. Къда иттне шарьхкодезь произведенияса аф сембе няфтьф событиятнень, эста лезды кодамовок пяльксненди планонь тиемась.

Вейхксоце – кефкиеце класснень эса, коса родной литературась тонафневи историко-литературнай планца, урокть структуранц нежеди репродуктивнай и эврестическяй метоттнень лангс и максы тонафнихненди разнай самостоятельнай работань витт: цебярьста урокти аноклама, произведенияти самостоятельна анализонь тиема, докладонь аноклама. Оцю класснень эса ванондови сембе материалсь, тонафнихненди толкавави ся, кода писательсь сявондьсыне типическяй факттнень, явлениятнень, штоба няфтемс произведенияса типическяй обстоятельстватнень. Сяс оцю класснень эса макссевихть сяда стака кизефкст: Мес писательсь сявозень ня эряфонь факттнень и явлениятнень? Мезе од азонды писательсь синь няфтемсост? Мезьса няфтьф эряфть кърхкашиц?

Кемонце-кефкиеце класснень эса корхтамась эряви вятемс кяльть мазышинц колга, толкавамс шабатненди сянь, мес произведенияса эрь геройть сонцень кяль-валоц, конань вельде шарьхкодеви сонь потмоёжец, культурац. Станя жа эряви азомс, кялень кодама изобразительнай средстват нолдай тевс писательсь эрь образть сермадомста.

Художественнай произведениянь анализсь аф ётафневи темань апак панчт. Темать азондсы сонць эряфсь, писательть опытоц. Произведениять васенцеда лувомдонза меле можна максомс тяфтама кизефкст: Мес писательсь сявозе тя материалть? Содайхть ли тонафнихне лия писателень произведеният, конатнень эса азондовихть тяка жа проблематне? Мезе одсь тя или тона произведенияса? Произведенияса няфтьф кодама эрямань ширнетне сяда мялень салайхть? Кодама сембода оцю кизефкст и прябалат вановихть тя или тона произведенияса?

Шабатне эрявихть тонафтомс произведениять шарьхкодема, няемс эсонза пара ширетнень и афсатыкснень.

Школаса литературнай произведениять лангса работась шумордави мекольце занятияса. Тя урокса арьсеви произведениять идеяц, кърхкашиц, литератураса вастоц. Тянкса ётафтовихть разнай работань витт: произведенияста выразительнайста отрывкань лувомась, иллюстрациянь лангса работась, ролень-роль лувомась, башка темас аноклаф докладонь кулхцондомась и стак тов.

Лирическяй произведениятнень тонафнемасна

Лирикаса няфтевихть ломанть арьсеманза и ёжмаряманза кенярдемста и ризнамста, кельгомста и кяжиямста, пичедемста и оцю тевонкса тюремста. Стихотворенияса фалу ули ёжмарямань образ, сембода пяк марявихть сонцень поэтть пичефксонза и ёжмаряманза. Поэтсь корхтай эсь пяльденза и тяконь мархта марса пачфни лия ломатнень ёжмарямат, сяс поэтть мяленза-арьсеманза шарьхкодевихть ламонди. Лирическяй стихотворениятнень эса аф эрси сюжет, аш эсонза действиянь няфтемавок. Лирикань произведениятне сембода сидеста сёрматкшневихть стихотворениянь формаса. Валхневок стихса кандыхть сяда оцю смузь. Тя сембе эряви кирдемс мяльса учительхненди.

Инголи азонтф лирикать башка ширензон мархта сотфт сембе методическяй приёмтне, конатнень нолдасыне тевс тонафтысь произведениятнень лувомдост инголе, лувомста и анализонь тиемста. Стихотворениятнень тонафнемста оцю лезкс канды учительть ушетксонь нюрьхкяня валоц. Лияста сон эсь валонза азонды писательть биографияста мяльс туф эпизод, кона лезды сяда цебярьста шарьхкодемс произведениять, лияста жа корхтай произведениять эвондамань туфталонзон колга. Тяда башка, пейзажнай лирикать тонафнемста эряви ётафтомс работа художниконь картинаста репродукциятнень и музыкань произведениятнень коряс. Ушетксонь валхнень

азомста аф эрявихть юкснемс шабатнень эряфонь опытснон и эсь пачка книгань лувомаснон. Тя урокса тя или тона материалть сявомста

учительсь кирдьсыне мяльсонза произведениять башка ширенц и урокть целензон.

Ушетксонь валда меле лувови мяльс туф лирическяй произведениясь. Сяда сидеста тянь тиендсы сонць учительсь. Лияста сон кулхцондови фонохрестоматиянь или жа магнитофонц сёрматф артистонь лувомать коряс. Шабатнень эрявихть тонафтомс, штоба лувомась туль мялезост. Тянди эряви пяк лама пинге: шарьхкотьфтемс стихнень содержанияснон (путнемс эрь валса звукнень, мушендомс сембода кайги валхнень, няфнемс валхнень, коса вайгяльсь кеподеви, коса жа парай, тяштемс нюрьхкяня и кувака ваймонь тарксема васттнень и стак тов), аф весть кулхцондомс стихнень.

Стихотворениять кулхцондомда меле шабатне кафтошка минута ваймяйхть, аньцек сяда меле ушедови анализсь. Лирическяй произведениятненди эряви тиемс стама анализ, конац кеподелезень шабатнень ёжеснон. Сяс стихнень ваномста аф эряви путнемс тяфтама кизефкст: Мезень колга моли корхтамась произведенияса? Аф эрявихть азондомс стихнень содержанияснон (виде въдь, поэта лац аф азови). Учительсь арьси сянь лангса, кода сувафтомс марс ёжмаряматнень мяльхнень-арьсематнень мархта.

Лирическяй произведениятнень коряс работамста учительти шарфтома мяль аф аньцек цебярьста лувомать, но и наизусть стихонь азондомать лангс.

Драматическяй произведениятнень тонафнемасна.

Драмась, кода содаф, фалу серматкшневи сцена лангса путоманди. Драматическяй произведениятнень эса аш авторть пяльде событиятнень колга корхтама, аш кувака серматфкст (аньцек ремаркаса азондови нюрьхкяняста, коса моли действиясь). Драмаса сембода няевись – тя действиясь, геройхнень ёткса корхтамась и синь тевсна. Штоба действиясь еталь сяда эрязста, писательсь сувафты произведенияти тюрема, конфликт. Драматическяй произведениятне аф фкат лиятнень эзда эсь композицияснон коряска. Синь ушеткшнихть геройхнень лемсоно тяштемаста, явовихть башка действиява, явлениява, сценава. Драматическяй произведениятнень тонафнемста ня башка ширетне эрявихть кирдемс мяльса.

Драматическяй произведениятне эпическяйхнень коряс лувовихть сяда стакаста, сяс, улема, ученикнень лувондомань формулярсост драматне васьфневихть пяк шуроста. Лияста шабатнень эвондакшни мяльсна лувомс тя или тона драматическяй произведениять сцена лангса ваномдонза меле, мъзярда туй мялезост сюжетсь и артисттнень налкомасна.

Школань программаса литературань лия роттнень коряс драмась занци оцю васта. Класса драматическяй произведениять тонафтомдонза инголе учительсь максы тев: лувомс драмать и арьсемс, кепотьксонди, месс тяфта сонь лемдезь, мезсь сембода тусь мялезост, кона геройть можна лувомс главнайкс и стак тов. Ушедомань урокса тогнафтысь сяда лама азонды произведенияса няфтьф пингть, сцена лангса драмать историянц колга. Урокса жа ушедови пьесать лувомац. Сяда сидеста васенце явлениять лувондсы сонць тонафтысь. Азондсы, кода эряви работамс драматическяй произведениять лангса. Можна ётафтомс комментированнай лувомавок. Тяда меле тиеви анализ. Пьесатнень анализсна фалу тиендевихть эрь явлениять и действиять лувомдонза меле, аньцек лядыкс урокса драмать лангса арьсематне-мяльхне пуроптовихть марс и арьсевихть марнек путф проблематне, геройхнень обуцясна, эряфонь конфликтнее и идейнай смузсь. Драматическяй произведениятнень эса пяк стака шабатненди содамс авторть ванфонц, мяленза-арьсеманза, сяс месс синь видеста апак аст. Тонафнихненди

урокта урокс геройхнень обуцяснон афсатыксснон панжемста эряви корхтамс сянь колга, мезсь тушенды авторть мяльс. Мекольце занятияса савихть ня арьсематне пуроптомс марс и тиемс тяфтама вывод: кодама ванфоц писательть эряфть лангс. Пьесатнень тонафнемста эряви станя жа шарфтомс мяль шабатнень арьсемаснон касомаснонды. Тянкса можна максомс эрь кодама тефт. Кепотьксонди, кода ба тинь латцелесть артисттнень сцена лангса васенце актса, кодама вайгяльса азолесть репликатнень, кодама декорацият рисовандаледе омбоце действияти и стак тов. Сембось тя пяк лезды шарьхкодемс драматическяй произведениятнень.

Теоретико-литературнай шарьхкодематнень тонафнемасна.

Литературань теориясь ащи литературоведениянь няеви пяльксокс. Сон кемоста сотнеф литературать историянц и критиканц мархта. Литературань теориясь панчсесы литературать касомань-вииямань смузенц, няфнесыне художественнай метоттнень касомаснон и полафтомаснон, явфнесыне произведениятнень родга и башка жанрава, азондсыне литературнай произведениятнень башка ширеснон: формать, сюжетть, композициять, темать, идеять, кяльть, толкавасыне прозать и поэзиять ёткса аф фкаксшить стихосложениять юронзон эса.

Литературать теориянц коряс содамошитне пяк лездыхть тонафнихненди произведениятнееенди анализонь тиемста. Теориять юронзон апак содак можна аньцек азондомс произведениять содержаниянц, сембе жа сонь башка ширенза: стакашиц, эсонза путф проблематне, кяльть мазышиц, идейнай смузец – лядыхть апак шарьхкотть. Сяс учительхненди эрь урокса эряви шарфнемс мяль литературать теориянц коряс содамошитнень кочкамаснон лангс и старандамс ня шарьхкодематнень тиемс анализонь инструментокс.

Родной литературань программати сувафтф лама теоретико-литературнай шарьхкодемат. Синь тонафневихть ветеце класса сявомок кефкиеце классти молемс. Средняй класснень эса вановихть сяда теждя шарьхкодематне. Кепотьксонди, тяфтапне, кода изобразительно-выразительнай средстватне (эпитеттне, сравнениятне, метафоратне, гиперболатне); прозань и стихань кяльсь, кафта и колма слогонь стихонь размерхне, рифмась, ритмась, темась, идеясь, сюжетсь, композициясь.

Сяда оцю класснень эса тонафневихть тяфтама теориянь шарьхкодематне, кода: художественнай методсь, литературнай направлениясь, стильсь, произведениять содержаниянц и форманц ёткса сотксне, литературань художественнай критерийхне. Сембе ня шарьхкодематне вешихть тонафнихнень эзда кърхка содамошит, лама произведениянь лувома и содама.

Родной литературань тонафтысь теориянь шарьхкодематнень тонафнемаста нежетькшни принципнень лангс:

• произведениятнень лувомснон и теоретико-литературнай шарьхкодематнень ёткса соткссь;
• тя или тона шарьхкодемать лангса наблюдениянь вятемась, обобщениясь (определениянь азондомась) и произведенияти анализонь тиемста теориянь шарьхкодематнень тевс нолдамасна;
• теориять тонафнемста шабатнень кялень культураснон касфтомасна;
• теоретико-литературнай шарьхкодематнень фалу мяльса кирдемасна и системас кочкамасна (эрь класса содамошитнень пуроптомсна, тянкса башка урокнень явомасна).

Тяда башка, кирдьсыне мяльса теоретико-литературнай содамошинь критерийхнень:

• литературань теориянь шарьхкодематнень определенияснон содамасна;
• художественнай произведенияста изобразительнай средстватнень мумасна и синь функцияснон азондомасна;
• произведенияти анализонь тиемста теоретическяй содамошитнень маштозь тевс нолдамасна;

• теоретическяй работань сёрмадомста теоретико-литературнай шарьхкодематнень мяльс сявомасна.

Литературань теориянь кизефкснень цебярьста содамасна максы шабатненди оцю лезкс, тонафтсыне видеста и кърхкаста шарьхкодемс произведениятнень и азомс синь корязост мяльснон.

Родной литературать тонафнемста шабатнень кялень культураснон касфтомасна.

Родной литературань программаса эрь класса максовихть башка част кялень культурать касфтоманцты. Ня урокнень эса сембода сидеста сёрматкшневихть изложеният и сочиненият.

Учительсь старандай эрь урокса тонафтомс шабатнень мазы и шарьхкодеви валса эсь мялень азома, беседань вятема, лиянь корхтамань кулхцондома, эсь кялезост валмуворкснень и цитатань сувафнема. Ветеце класста сявомок эрявихть тонафтомс шабатнень лувф произведениятнень содержанияснон азондома. Синь азондовихть нюрьхкяняста, кочкаф (кодамовок башка эпизодонь или сюжетонь пялькс) произведениятнень художественнай ширеснон апак юкстак. Художественнай азондомась сембода стака, сяс школаса сон васьфневи пяк шуроста. Кяльть культуранц касфтоманцты лезды произведениятненди анализонь и комментариень тиемась, станя жа мяльс туф лувомась, произведениять рузонь кяльс ётафтомац и стак тов. Сембе ня приемтне лездыхть шабатненди тонадомс цебярьста корхтама.

Устнай корхтамать мархта сотнеф сермадомань культураське. Тянди лездыхть тяфтама приёмтне, кода цитатань сёрмадомась, планонь, тезисонь, конспектонь тиемась, рецензиянь анокламась, кизефкснень лангс отвечамась, изложениянь и сочинениянь сёрмадомась.

Сёрмадомань работатне, конат ётафтовихть ученикнень мархта, ащихть литературать тонафнеманцты и анализонцты пяльксокс. Старшай класснень эса сёрмадомань работань основной видкс лувови сочинениясь. Сон касфтсыне ученикнень сёрмадомань кяльснон и тонафтсыне синь арьсема. Сочинениятнень можна явомс тяфта: сочиненият, конатнень эса тонафнись азондсыне эсь арьсеманзон васенцеда лувомда меле; сочиненият, конат сермадовихть самостоятельнай анализонь тиемда меле; сочиненият, конат сермадовихть оцю темань шумордамда меле.

Учительсь оцю мяль шарфни сочинениятненди, конатне сёрмадовихть произведениять васенцеда лувомдонза меле, мъзярда тейнза апак тиколь анализ. Тя тонафтсыне ученикнень арьсема произведенияса кепсефи тематнень, проблематнень, геройхнень, композициять и сюжетть колга. Тяфтама сочинениять можна сермадомс кода кудса, станя и класса.

Шарьхкодеви, произведениять тонафнеманц васенце этапса ученикнень аш нинге мяльсна арьсемс лац-ряц. Сяс и учительсь лемдьсыне сочинениятнень тяфта, штоба синь арьсезевольхть: «Мезень колга мон арьсян тя книгать лувомдонза меле?» «Мес тусь мялезон тя книгась?» «Сембода мялень салайсь книгаса» и стак тов. Ня сочинениятне аф оцюфт.

Анализонь тиемста и меле шабатненди макссевихть сочинениянь темат, конат панчсесазь произведенияса путф проблемать, башка пяльксть смузенц, геройхнень потмоёжеснон, валснон-тевснон. Тяфтама сочинениятне тонафтсазь ученикнень анализонь тиема.

Оцю темать аделамдонза меле шабатне сермадыхть сочиненият, конат кармайхть улема обобщениякс сембе ётаф материалти. Аньцек ётаф материалть можна сотнемс инголи ётафть мархта, мумс марстонь ширет, проблемат, кепотьксонди: «Литератураса или башка произведенияса Великай Отечественнай войнать няфтемац» и лият.

Тяфтама сочинениятнень сёрмадомста ученикненди лезды учительсь. Сермадомда инголе тонафтысь ётафты работань эрь кодама витт, нъльня марстонь планонь сермадомавок. Ули сёрмадомань аф фкя ки-ян. Тяса эрь учительсь няфтьсы эсь маштомошинц и сонць кочкасы сочинениянь сёрмадома методть.

Тяниень пингонь школаса сёрмадомань способонь коряс сочинениятне явовихть колма группава: художественнай, научнай и традиционнай. Къда учительсь кочкасы художественнай методть, эста сочинениясь эряви сермадомс литературань кодамовок жанраса: стихотворенияса, азксса, басня ладса, дневник вельде и стак тов.

Научнай кить кочкамста тонафнись сёрмады информация, отчёт, аннотация, лувф книгань коряс ингольдень вал.

Тя кида-янда башка учительсь фалу нежетькшни традиционнай жанратнень лангс – описаниять, повествованиять, характеристикать, арьсемать. Кепотьксонди: «Видеста ли шарьхкодезе эряфть Тихон Черемшин?», «Кода панжеви Лавгиновонь обуцяц прянь вятеманц вельде?» и стак тов.

Мъзярда шабатне кармайхть лац сёрмадома сочиненият тя жанратнень коряс, эряви нажядемс художественнай и научнай жанратненди.

Аф класса лувомась и аф класса работась.

Родной литературать коряс аф класса работась, сембода пяк аф класса лувомась, лезды шабатнень содамошиснон кеподемснонды и касфтомаснонды. Родной литературань коряс аф класса лувомань занятиятне лездыхть кърхкалгофтомс и кемокстамс урокса ётаф материалть, кеподемс теориянь содамошитнень, получамс од содамошит литературать и исскуствать коряс, келептемс эряфть лангс ванфть, сяда лацкас кельгомс эсь кяльцень и литературацень.

Аф класса лувомань коряс урокне ащихть фкя пяльде, кода урокса, станя жа аф класса работать эзда. Ня урокненди лияста мярьгихть переходнайхть, промежуточнайхть, сяс мес произведениятне лувондовихть кудса, библиотекаса или самостоятельна, корхтамась жа лувфть коряс моли урокса.

Произведениятне, конат макссевихть аф класса лувомать коряс, сувафтфт родной литературань школань программати. Тя спискась азондови шабатненди эрь кизоня тонафнемать ушедомста. Аф класса лувомать коряс программати сувафтф лама произведения. Сембе ня произведениятне аф класса лувомань урокса аф вановихть, аф сатни пингсь, да тя и аф эряви. Сяс учительсь кочкай тя спискати мяльс сяда туф произведеният и тии кизонь план. Средняй и старшай класснень эса аф класса лувомати максови 7-10 част. Сявомок тянь мяльс, учительсь ётафты эрь класса ковти аф класса лувомань коряс, конат аф сувайхть тя планти, ётафтови аф класса работа, кепотьксонди, лувомань конференция,викторина, конкурс и стак тов.

Ветеце класста сявомок, учительсь тонафтсыне шабатнеь лувомань коряс дневниконь вятема. Ня дневникненди синь сёрматкшнесазь эсь мяльснон-арьсемаснон лувфть колга. Тяда башка, литературань кабинетса эряви тиемс эчке кагодста уомань экран, конань лангс клевиь зепонят тонафнихнень фамилиясон и лемснон мархта.эрь книгать лувомдонза меле учениксь путы зепоняти каготкя, коза сёрматф авторть и произведеиять лемсна.

Аф класса лувомать цебярьста ладямац ламода ащи школань библиотекать эзда. Сяс тонафтыхненди эряви сидеста сувсемс библиотекав, марса тиендемс книгань выставкат, ванондомс шабатнень лувомань формулярснон, кой-коста ётафнемс библиотекаса литературань

конкурст. Кепотькснди, «Лувомань формулярса тяшнефнень араламасна».

Аф класса лувомань урокть анокламста кафта-колма неделяда инголе учительсь максы шабатненди тев: лувомс произведениять и арьсемс тя или тона кизефкснень лангса. Тя пингста тонафтысь ётафты эрявикс работа сянкса, штоба шабатнень эвондаль мяльсна лувомс произведениять: кой-коста азонды или лувонды книгаста мяльс туф вастт, лияста путни тонафнихненди кодамовок кизефкст, мярьгонди панжемс тяштьфть смузенц.

Аф класса лувомань урокнень эрявихть ётафнемс станя, штоба синь сувальхть шабатнень седизост и ламос афольхть юкстав, лиякс мярьгомс, аральхть афкуксонь праздникокс. А тянкса сидеста тиендемат книгань выставкат, нолнемат литературань газетат. Аф класса лувомань урокса тонафнихнень сяда лама корхтайхть синць, учителшьсь жа аньцек вяти корхтама лувфть колга, азсы эсь мяленц, кинди мезе сатовсь и мезень лангса сави нинге покодемс тя или тона ученикти. Приёмда, конатнень нолдасыне тевс тонафтысь аф класса лувомань уроконь вятемста, пяк лама. Кепотьксонди: фкя-фкянь мельге лувфть азондомац; жрь тонафнись лувфть коряс получай ответонь вариант и муссы эрявиксть; кизефксенень лангс сёрмадома ответ; налксемкат: кулхцондость тя или тона пяльксть и азость, кодама произведенияста сон сявф; азость, кодама произведениятненди ладяйхть ня иллюстрациятне; содасть, кона литературнай геройсь тись тяфта…; ваность крассвордть и лият.

Оцю класснень эса заданиятне сяда стакалгофтовихть. Лувф книгатнень коряс ётафтовихть семинархт, конфиренцият, обсужденият, сёрмадовихть аннотацият и рецензият.

Аф класса лувомань урокне эрьсихть разнай видонь: библиографиянь урок. Урок-концерт, урок-ёфкс, урок-конференция, урок-литературнай композиция, урок азкс, урок-инсценировка, заочнай экскурсиянь урок, урок-конкурс.

Литературань материалть коряс тяфтама мероприятиятне, конатнень ётафтсыне тогнафтысь тонафнихнень мархта урокта меле, лувовихть аф классонь работакс. Родной литературать коряс аф класса работань видта пяк лама. Ученикне ётафтыхть урокта меле разнай кружокса (кепотьксонди, литературань творчествань, драматическяй, краеведениянь) мероприятият. Аноклайхть лувомань илятть, конференцият, писательхнень мархта васьфтемат, конкурст, олимпиадат, родной кялень и литературань недялят, презентацият. Тяка пингоня якайхть театрав, выставкас и музеи, нолнихть стенгазетат, ётафнихть ванф спектакльхнень коряс корхнемат,  кочксихть эсь велестост фольклоронь произведеният и стак тов. Сембе тя покодемась лезды шабактненди сяда цебярьста шарьхкодемс эсь кяльса сёрматф литературать, содамс и кельгомс шачема масторть.

5)Основной контролень форматне тонафнхнень маштомаса и содамаса:

• Сочинениясь (отзывсь, кизефкснень лангс отвечамась рассуждениянь формаса, рисунка лангс ванозь).
• Тестт.
• Устнай монологическяй высказываният темать коряс.
• Выразительнайста текстонь лувомась (дикторсь, наизусть).
• Лирическяй произведенияти письменнай анализ.
• Письменнай анализ эпизодти.
• Техника чтениянь проверямась.

6)Меттотне и приёмтне родной литературать тонафнемста

Котоце класса тонафнемань метоттне и приёмтне стамот же, кодамот и ветеце класса, аньцек ётафтовихть сяда крхкаста, сяс месс котоце классонь тонафнихнень содамошисна и эряфонь опытсна аф ламода сяда оцю ветеце классонь ученикнень коряс.

Тяфтамма методкс и приёмкс арайхть:

Художественнай текстть разнай видонь морафтомац: эсь пачка, кайгиста, толкавазь, комментированнай, индивидуальнай, ролень коряс, выборочнай.

Эрь видонь азондомась: наизусть, художественнай текстти маласта, аньцек инь важнай эпизоттнень азондомасна, устнай ответ путф кизефксть лангс, цитированиясь, азондомась лицань полафтозь.

Письменнай работатне: аф содаф валхнень мархта работась, планонь арьсемась, изложениянь и сочинениянь сёрмадомась, путф кизефкс лангс отвечамась.

Тяда башка котоце класса ётафневи устнай рисовандама, мзярда эпизодическяй геройхне азондомста аф лятфневихть. Тонафнемань од приёмкс арай устнай сценарийнь тиемась. Сон ётафневи эста, кда произведениять эса няфневи оржа, вишкста моли действия.

Произведениянь анализсь

Произведениянь анализсь котоце классонь ученикненди стака тев.

Художественнай произведениять тонафнемац ётафневи колма этапса: вводнай валонь азомста, морафтомста и текстть тонафнемста. Ванцаськ ня пялькснень башка сявозь.

Вводнай валса, кодама формаса сон афоль ётафтов, эряви анокламс шабатнень художественнай текстть шарьхкодеманцты. Тянь апак тик, ученикненди сидеста аф шарьхкодевихть тя или тона явлениятне и факттне. Сяс учительти синь колгаст сави азомс башка вал.

Формас коре вводнай валсь сидеста ётафневи беседань формаса. Учительти эсь корхтаманц пингста эряви нежетькшнемс котоце классонь тонафнихнень эряфонь опытснон лангс. Кда тяфтама условият аш, беседась аф ётафтови. Кепотьксонди, мзярда ушедови М. Безбородовонь «Вирь» стихотворениять тонафнемац, учительсь шарфтсыне шабатнень мяльснон тялоть колга содамошиснон лангс, ётафты тянь колга аф оцю беседа.

Сидеста вводнай валть пингста учительсь работай картина мархта, конань содержаниянц малатфневи произведенияти. Кепотьксонди, М. Безбородовонь азф стихотворениянц тонафнемста цебярь сявомс И.И. Левитанонь «Березовая роща» картинаста репродукциять.

Сембода сидеста картина мархта работась ётафтови снярда, мзярда шабатнень эряфонь опытсост кржа нинге содамошида сянь колга, мезе синь морафтыхть тя или тона произведенияса.

Сембода сидеста вводнай занятиянь формакс эряй историко-литературнай справкань максомась, писательть или поэтть биографиянц колга азондомась. Сембось тя максови учительть азондомаса, шарьхкодеви кяль-валса. Улель пяк цебярь тя пингть урокти кандомс кодамовок нагляднай пособият: писательть колга альбом, фотографият, портрет, лия ломанень лятфнемат. Сидеста макссевихть историческяй справкат тонафневи пингти, кепотьксонди, гражданскяй войнать, отечественнай или лия важнай и оцю событиятнень колга.

Ваномок вводнай занятиятнень формаснон, минь няеськ, што цельсна синь фкя: максомс ученикненди сембе ширдень содамоши тонафневи произведениять колга.

Морафтомань форматне тожа аф фкат. Учительть морафтомац – тя ученикненди пример сембе ширде, сяс месс морафтомада инголе тии партитура, конань вяльде кошярясыне шабатнень выразительна лувома. Лятфтасаськ, што нюрьхкяня лоткамась няфневи фкя вертикальнай цёртамаса, кувакась – кафтса, а вайгяльть кеподемац и нолдамац – вяри и алу стрелкаса. Партитурать эса тяштевихть аф аньцек логическяй ударениясь и вайгялень лоткамась, но и эрь валонь ударениясь. Штоба тонафтомс ученикнень выразительнайста морафтома, партитурань тиема эрявихть кошардомс синьге.

Минь тевсонк – морафтомать графическяйста няфтемац: коза путомс ударения – ударениянь знаксь, кона путови ударнай слогть вельхксс, а кда ударениясь логическяй, то ударнай валть алга таргави виде китькс /, пауза // - нюрьхкяня паузань знаксь, //- кувака паузать няфтемац/, кона путневи лоткамать вастс.

Вайгяльть вяри кеподемац няфневи стрелкаса (→), кода и алу нолдамац (↓). Стрелкась путневи ся вастти ,коса кеподеви  или нолдави вайгяльсь.

Лувомс выразительна – тя няфтемс морафтомаса сянь, мезе азсь авторсь эсь произведениясонза, кенярдема, ризнама, эводема и стак тов. Сембось, мезе ули тя или тона художественнай текстса, аш кода няфтемс, кда  учительсь аф пачфтьсыне ученикненди выразительнай левомань правилатнень. Тяфта, мзярда морафтомаса эряви няфтемс кенярдема, вайгяльсь кеподи вяри, лувомань темпсь арай сяда сиде; эводемась – вайгяльсь прай алу, морафтомась шура; азондомась няфневи корхтамань темпса, средняй валонь азомаса. Лотксема знакне – тожа пяк важнай тев произведениять шарьхкодемаса. Выразительнайста морафтомась няфнесыне ученикненди произведениять художественнай ширензон, касфтсыне мяльснон сяда лац тонафнемс сонь.

Произведениять выразительнайста морафтомдонза меле ушеды инь важнай и стака тевсь – анализсь, лиякс мярьгомс, произведениянь анализсь: планонь тиемась ( ваномс, мзяра и кодама пяльксста ащи текстсь), учительть заданиянц коряс морафтомась ( произведениять структуранц няфтемац и шарьхкодемац) . Художественнай обраснень ваномасна ( проблематне, конат няфтьфт произведенияса) , характеристикань анокламась, литературань тетраттненди сёрмадомась.

Героень характеристикатне латцевихть снярда, мзярда сембе синь действияснон и поступкаснон ученикне лац ни содасазь. Характеристикась – тя обобщения тя или тона геройть колга.

Лиякс мярьгомс, произведениять анализонц эса кафта этапт: васенцесь – впечатлениянь и содамошинь кочкамась, омбоцесь – обобщениянь синтезонь тиемась.

Анализонь принципне.

Историческяй принципсь. Литературась, кода тонафнемань предмет, сотф общественно – историческяй наукатнень и тя или тона пингть, и народть эряфонц мархта. Эрь произведениять эса няевихть эряфть кафта ширенза: событиятне, явлениятне, ломанень типне, а омбоце ширде писательть ванфоц тя событиятнень и явлениятнень лангс.

Литературанай произведениясь эвондай кода художественнай ванф тя или тона пингть эряфонь событиятнень или  явлениятнень лангс, кода колгаст авторскяй арьсема. Сяс учительсь произведениять колга азондомста путни эстейнза цель – пачфтемс ученикненди тя или тона историческяй пингть эсь лацонь ширензон художественнайста няфтемаснон.

Содержаниять и формать фкя-фкянь мархта соткссна. Литературнай произведениясь ащи содержанияста и формаста, синь аш кода явфнемс фкя-фкянь эзда. Формать содержаниять эзда явфтомац вяти формализмати. Формань шарьхкодемать аф эряви тиендемс аньцек эпититонь, сравнениянь и метафорань вешендемати. Эряви фалу путомс кизефкс: мезенди синь? Кодама смузьса? Кда аф няеви, мезенди синь эрявихть, произведениять форманц шарьхкодемац аф сатови.

Анализонь тиемста фалу эряви ваномс произведениять идейно-художественнай ширензон и педогогическяй условиянзон. Тя тевса школаса улихть афсатыкст – вкаксшись тонафнемаса, мзярда аф сявондевихть мяльс морафтф повестть или стихотворениять особенностенза. Содаф, што эрь родсь или жанрась фкаксшида башка кирди аньцек тейнза характернай признакт и качестват.

Кепотьксонди, лирическяй произведениятне лият драматическяйхнень и эпическяйхнень эзда. Синь эсост няфтевихть ломанень мяльхне, арьсематне. Кда эсост оцю васта заняйхть эряфонь картинатне и обрасне, анализсь ушедови синь характеристикастост; кда тяса улихть аллегорическяй или символическяй обраст, учительсь шарфты мяль синь содержанияснон лангс, а сяльде панчсы переноснай смысласнон.

Нльне фкя родонь произведениятне сидеста кирдихть индивидуальнай признакт, и тя аф эряви юкснемс синь ваномстост.

Анализонь ётафтомста сави мяляфтомс шабатнень аноклафшиснон, а стане жа произведениять вастонц литературнай курса, пингть, кона максови темать тонафнемста, улихть ли учебникт, нагляднай пособият.

Ня вешфксне кирдемат мяльса национальнай школаса, синь аф ваномасна вятихть формализмати, литературать аф кельгоманцты.

Кепотьксонди, кда учительсь сяви методическяй разработка и апак арьсек ня кизяфкснень ётафты урок, сон сидеста аф туй мялезонза, сяс мес тяфтама уроксь ученикнень арьсема аф кошардсыне.

Учительти сави мяляфтомс и сянь колга, што тонафнихне класса аноклафт аф фкакс. Фалу макссевихть заданият средняй школьникть лангс нежедезь. Аф юкстамс инголе молихнень – тя тожа пяк оцю тев учительть работасонза. Цебярьста тонафнихненди эряви сяда сидеста макссемс творческяй работа: азондомс текстть лицань полафтозь, тиемс кой-кона тонафневи произведениятненди слайдат, арьсемс, кодама произведениянь действиясь, - динамическяй, вии или статистическяй,  фкя вастса ащи (кепотьксонди, лятфнематнень эса), сёрмадомс характеристика персонажти или рисовамс устна портретонц, тиемс сценарий, максомс письменнай ответ кизефкс лангс и стак тов.

Слабай тонафнихнень сиденяста кошарямс эсь пачка морафтома и азондома. Мяляфтомс, што тя урокса тяфтама-тяфтама ученикт кармайхть лувома и азондома класть инголе. Путомс цель и топафтомс сонь: сембе ученикне маштольхть выразительнайста валонь-валонь морафтома и логически последовательна азондома, планонь сёрмадома.

Учительть целенза – касфтомс литературать вельде ученикнень содамошиснон и воспитандамс шабатнень идейнай и эстетическяй ширде грамотнай ломанькс – сатовихть аньцек эста, мзярда сембе ня принципне уроконь ётафтомста аф явфневихть фкя-фкянь эзда.

2.Учебнай курсть « Родной литература 6-це класса» основной содержанияц.

I –II УШЕТКСОНЬ ВАЛ И УСТНАЙ НАРОДНАЙ ТВОРЧЕСТВАСЬ

(1 част)

Ушетксонь вал

Кельгома авторхне и кельгома произведениятне. Каникулатнень пингста лувф произведениятнень коряс корхтамась.

Народнай ёфкст: «Юртай», «Цёра-богатырь»

Ёфкснень колга шабатнень содамошиснон кемокстамасна. Синь башка ширеснон лятфтамасна. Ломанть эряфса ёфкснень вастсна. «Юртай» ёфксса тонафнемать эрявиксшинц шнамац. Скупой шить сялдомац. Магическяй числатнень смузьсна.

«Цёра-богатырь» ёфксть содержанияц и смузец. Геройхнень обуцясна, видешить инкса тюремасна. Перьфпяльть виензон сяськомасна,  трудть тёждялгофтоманц и ялгань кельгомать колга арьсематне. Гиперболать ролец богатырть обуцянзон няфтемасна. Ёфксса лия изобразительно-выразительнай средстватне.

«Пяштень тараткя» ёфксса ломанть и перьфпяльть ёткса соткссь. Ляпе вайме ломаттнень шнамасна. Валда вийть сяськомац.

Литературань теориясь. Чудань ёфкснень башка ширесна.

Литературань творчествась. Арьсемс аф оцю ёфкс, коса васетькшнихть равжа и валда вийхне.

Литературань теориясь. Гиперболать колга шарьхкодемась.

Валмуворксне  

Валмуворкссь кода устнай народнай творчествань жанра. Сонь эсонза народть ёнюшинц и смузенц няфтемац. Валмуворкснень лездомасна тонафтомань тевса, афсатыкснень сялдомасна- пеедемасна. Валмуворкснень тиевомасна, виде и ётафтф смузьса молемасна.

Художественнай литератураса валмуворкснень вастсна.

К.Т. Самородов – мокшень и эрзянь валмуворкснень кочкайсна и тонафнисна.

Литературань теорись. Валмуворкснень шарьхкодемасна.

Литературань творчествась. Валмувоксонь и содама ёфксонь арьсемась.

Легендатне и преданиятне

Легендатне – устнай народнай творчествань жанра. Тя жанрать эсь лацонь ширец. Сидеста васьфневи главнай геройхне легендаса – библейскяй и языческяй божестватне. Ломанть и божестватнень ёткса сотксне. Кунардонь пингонь эряфть няфтемац.

Легендатне эряйхть аф аньцек фольклорнайхть, но и литературнайхть (содафт Ф. Атянинонь, Радин-Аловскяень и лиятнень).

«Кода тиевсь модась» легендаса божестватне.

«Тяшттнень тиевомасна» легендаса Каргонь Кить тиевомац.

Преданиятнень юрс афкуксоннеть путомац. Преданиятнень маладомасна историческяй моротненди.

«Мамолаева велеть историяц» преданияса путф событиятне.

«Вару» преданияса ляйть лемдеманц туфталоц.

Литературань теориясь. Легендатнень и преданиятнень колга шарьхкодемась.

Литературань творчествась. Эсь велеряйхнень азондомаснон коряс сёрмадомс легенда или предания.

III

ФОЛЬКЛОРОНЬ МОТИФНЕНЬ КОРЯС

СЁРМАТФ ПРОИЗВЕДЕНИЯТНЕ

Василий Иванович Радаев (Радин-Аловский)

«Варда», легенда (2 частт)

Фольклоронь мотивонь коряс мокшень и эрзянь кяльса  сёрматф литературань произведениятне. Синь эсост фольклорть вастоц.

В.И. Радаевонь эряфонь и творческяй киц. Пцтфксоц мокш-эрзянь фольклорть кочкамаса.

«Варда» легендаса кунардонь пингть няфтемац, ногайхнень каршес тюремась. Нижняй Новгородса Кремлять идемац. Вардань образоц. Сонь подвигонзон и родной масторть инкса педа-пес ащеманц няфтемста художественнай средстватнень вастсна. Витовань и Вежалянь образсна. Вельдест покодемати видешити мокшэрзянь народть кельгоманц няфтемац. Кяжи и седифтома ногаецнень образсна. Легендаса перьфпяльть вастоц. Произведениять кялень козяшиц.

Дмитрий Степанович Куляскин

«Пичай», ёфкс (3 частт)

Д.С. Куляскинонь  эряфонь и творческяй киц. «Пичай» стихса сёрматф ёфксть содержанияц и темац. Пичаень родной масторть и народть воляшинц инкса ащемац. Геройть пара ваймоц и аф пелезь тюремац. Произведенияса сельмонь каяй и жаднай ломатнень сялдомасна. Геройхнень обуцяснон панжемста пейзажть вастоц. Ёфксть кяль-валонь козяшиц.

Григорий Ильич Ельмеев

«Ёжка», ёфкс (3 частт)

Г.И. Ельмеев – мокшень талантливай поэт. Великай Отечественнай войнаса улемац. «Ёжка» ёфксть сотксоц народнай поэзиять мархта. Произведенияса фантастическяй обраснень вельде патриотическяй темать панжемац.

Ёжка цёранять образоц. Сонь образонц вельде цебярть и кальдявть няфтемац.

Литературань творчествась. Легендатнень и ёфкснень ёткса марстоннесь и аф фкаксшись.

Предметтнень ёткса сотксне. Рузонь фольклорсь (былинатне). Финно-угорскяй нароттнень ёфкссна, валмуворкссна, содама ёфкссна.

Дополнительнай лувоманди:

А.В. Дуняшин. «Эфигения».

Ф.С.Атянин. «Постуфонь стирь».

Народнай ёфкст: «Пинесь, атякшсь и келазсь», «Ведьава», «Кода стирсь келукс тиевсь», «Яраска».

IV

МОКШЕТНЕНЬ И ЭРЗЯТНЕНЬ СЯДЫНГОЛЬДЕНЬ ЭРЯФСНА

Кузьма Григорьевич Абрамов

«Сараклыч», поэма (2 частт)

К.Г. Абрамовонь творчестваса историческяй темась. «Сараклыч» поэмаса мокшэрзятнень кунардонь пингонь эряфснон няфтемац. Канявань и сонь цёранц Тиньгаень образснон вельде родной масторть ванфтоманц няфтемац.

Ногайхнень равжа ваймоснон няфтемасна.

Произведенияса мокшэрзятнень и руснень ёткса ялгаксшись. Устнай народнай творчествань мотифне.

Николай Иванович Учватов

«Маркуз и Лундан», повесть (1 частт)

Н.И. Учватовонь эряфонь и творческяй киц.

М.Е. Евсевьевонь лемса педагогическяй институтса тонафнемац. Национальнай газетатнень редакцияса покодемац. Васенце стихонзон «Мокша» журналса печатламасна.

Прозань жанраса сатфксонза. Мокшень и рузонь кяльса нолдаф повестень книганза: «Павазонь тяште», «Алят», «Съргозема», «Маркуз и Лундан». Н.И. Учватов мокшэрзянь литератураса васенцетнень ёткста фкясь, кие ушедозе фантастикань жанрать. Лувихненди кельговсть « Сюра мархта шяйтан», «Взорванный остров» произведениянза.

«Маркуз и Лундан»  повестьса мокшэрзятнень кунардонь пингонь эряфснон колга азондомась. Койхне и обычайхне. Кяль-валонь козяшись.

Литературань творчествась. Кунардонь пингонь мокшэрзятнень лемсна.

Пётр Семенович Глухов

«Кедровай пяштть», азкс (1 частт)

Писательть эряфонь и творческяй киц. Тонафнемань тевса эрзянь просветительть, учёнайть, фольклористть М.Е. Евсевьевонь лезксоц. Москуста, «Якстере тяште» газетаса покодемац.

«Кедровай пяштть» васенце азксонц «Васень сяткт» мокш-эрзянь прозань и стихонь сборникса печатламац.

Палькань образоц. Ломанть и перьфпяльть ёткса сотксне. Пейзажнай картинатнень смузьсна. Кялень художественно-изобразительнай средстватне.

Литературань теорись. Конфликтть колга шарьхкодемась.

Василий Иванович Ардеев (Виард)

«Кешань приключениянза», повесть (5 частт)

Произведениять сотксоц писательть эряфонь кинц мархта. «Кешань приключениянза» повестьса тайгань пефтома вирьхнень, Сибирень ляйхнень мазышиснон няфтемасна. Тайгаса эряй ломаттнень эряфсна. Сталмотнень, сяськоматнень колга корхтамась тячиень пингонь полафткснень мяльс сявозь.

Кешаньь и Гришань тевсна-валсна, мяльсна-арьсемасна, обуцясна и эрь кодама прябалас повомасна. Перьфпяльть закононзон цебярьста содамасна.

Литературань теорись. Приключениянь литературать колга шарьхкодемась.

Литературань творчествась.  « Монь ули ялгазе, конань мархта молелень разведкас» темать коряс сочинениянь сёрмадомась.

V

МОКШЕТНЕНЬ И ЭРЗЯТНЕНЬ ВЕЛИКАЙ ОТЕЧЕСТВЕННАЙ ВОЙНАТЬ ПИНГСТА

И ВОЙНАДА МЕЛЕ ЭРЯМАСНОН НЯФТЕМАСНА

Роман Романович Федькин

«Ёмла партизан», поэма (2 частт)

Р.Р. Федькинонь эряфонь и творческяй киц. Литератураса васенце аськолксонза. Великай Отечественнай войнаса улемац. Рузонь и мокэрзянь литератураса Великай Отечественнай войнань темась.

Р.Р. Федькинонь путфксоц мокшэрзянь литератураса войнань темать виияфтомаса. «Ёмла партизан» поэмаса советскяй ломатнень эряфонь апак ужяльтть тюремасна. Вася цёранять образонц вельде войнань пингонь иттнень тевснон, прянь вятемаснон няфтемасна. Поэмаса кялень художественно- выразительнай средстватне. Пейзажть смузец геройхнень ваймоёжеснон няфтемаса.

Литературань теорись. Поэмать колга шарьхкодемась.

Литературань творчествась. Нюрьхкяня сочинения поэмаса няфтьф мяльс геройть обуцянц колга.

Надежда Степановна Живайкина

«Тядязень пильксонза», азкс (1частт)

Н.С. Живайкинать  эряфонь и творческяй киц. Стака идькс пингоц. Путфксоц мокшэрзянь литературав. «Тядязень пильксонза» азксса войнань стака кизотнень колга азондомась. Ломаттнень фкя-фкянди стака пингть лездомасна. Семьяса фкя-фкянь ёткса ладяматне. Мокшэрзятнень койснон-обуцяснон няфтемасна.

Литературань теориясь. Азксть колга шарьхкодемась.

Литературань творчествась. Минь семьясонк ладяф койхне…

Николай Лазаревич Иркаев (Никул Эркай)

«Алешка», повесть (5 частт)

Н.Л. Иркаев (Никул Эркай)- иттненди сёрмады содаф писатель. Лама жанраса покодемац.

«Алешка» повестьса войнада мельдень мокшэрзянь велеть эряфонц няфтемац. Оцюфнень и иттнень ёткса ладяматне. Алёшкань  и Андрейкань обуцясна, прянь вятемасна, ялгаксшисна. Митричень и Федькань аф фкакс прянь вятемасна. Алёшкань пигта инголе оцювонь тефненди кярьмодемац.

«Алешка» повесть художественнай ширенза, кизонь, сёксень картинатнень няфтемасна, кялень козяшись. Повестть лама народонь кяльс ётафтомац, « Костёр» центральнай журналса печатламац.

Литературань теорись. Прозань виттнень колга шарьхкодемась.

Литературань творчествась. Кода тяни шарьхкодеви подвигсь?..

Пётр Уварович Поздяев (Гайни)

«Шачема край», стихотворения (2 част)

П.У. Гайнинь эряфонь и творческяй киц. «Шачема край»  стихотворенияса поэтонь лямбе арьсематне шачема ширть колга.

Стихотворенияса кялень козяшись, выразительнай средстватне.

Литературань теорись. Сравнениять колга шарьхкодемась.

Литературань творчествась. Шачема ширезень мазышиц…

Пётр Иванович Левчаев

«Бродяжка», азкс, «Ласькань седи»,  новелла (2 частт)

П.И. Левчаевонь эряфонь и творческяй киц. Идень кудса улемац. Литератураса васенце аськолксонза. «Пилев» псевдонимонц эвондаманцты туфталхне. Ссылкаса ётафтф кизотне. Шабатненди лемтьф произведениятне.

«Бродяжка» азксса пинеть образонц вельде ломаньца ломаненнеть няфтемац. Перьфпяльдень ванфтомань темась. Сибирень ломаттнень эрямаснон, койснон-обуцяснон колга азондомась. Произведенияса кяль-валонь козяшись.

«Ласкань седи» новелласа тядянь кельгомать виец.

Литературань теорись. Новеллать колга васенце шарьхкодемась.

Фёдор Семёнович Атянин

«Надя», азкс (2 частт)

Ф.С. Атянинонь эряфонь и творческяй киц. Великай Отечественнай войнаса улемац. Национальнай газетатнень редакцияса покодемац. Васенце книганц «Сембе минь ломаттяма» сёрмадомань историяц. Мокшень кяльса инь содаф книганза: «Шуваронь кельгихть», «Ичкоздень инжи», «Пъзьгатань сама пинге», «Минь-мирнеряйхтяма», «Ялгань ликт», «Мокшетнень раднясна».

Василий Никанорович Радин.

«Шуваронь кельгихть», «Мекольце аськолкссь» азксне ( 1част)

«Шуваронь кельгихть» азксса шачема масторти пефтома кельгомась. Мокшэрзятнень кунардонь эряфснон няфтемац. Произведенияса кяль-валонь козяшись.

«Мекольце аськолкссь» азксса учительть и ученикнень ёткса аф ладяматне. Тонафтыть образоц.

Литературань творчествась. Монь кельгома учителезе.

Шабатненди лемтьф произведениянзон эса морально-нравственнай проблематнень кеподемасна, перьфпяльть ванфтоманц, трудть кельгоманц, ялгаксшить колга корхтамась. Сонь «Шуваронь кельгихть», «Фронтовой - мастеровой» сборниконза.

Иван Алексеевич Калинкин

«Катф куд», «Валть виец» стихотворениятне (1 частт)

И.А.Калинкинонь  эряфонь и творческяй киц. Васенце аськолксонза литератураса. Поэзиянь жанраса сатфксонза.

«Катф куд» стихотворенияса велетнень срадомасна-каладомасна. Художественно-изобразительнай средстватне.

«Валть виец» стихотворенияса ломанень обуцять няфтемац. Шавос корхни ломаттнень сялдомасна.

Александр Макарович Доронин

«Сёрмань канни», «Апак нардак сельмоведь», «Краезень тядяц-Россиясь» стихотворениятне

 Раиса Констатиновна Орлова (Рая Орлова)

«Мордовиязе, гайняк!», «Мокшень кяль» стихотворениятне 

(1 част)

А.М. Доронинонь эряфонь и творческяй киц. Рана тядяфтома лядомась. Ичалкань педучилищаса тонафнемань кизотне. Москуса А.М. Горькаень лемса литературнай институтса тонафнемась. Васенце аськолксне литератураса кода поэтонь. Сяда меле прозати кярьдемась.

«Сёрмань канни»  стихотворенияса идень сельмоса войнать сталмонц няфтемац.

«Краезень тядяц – Россиясь» произведенияса патриотическяй мяльхне- арьсематне. Шачема крайти кельгомась.

«Апак нардак сельмоведь»  стихотворенияса перьфпяльть ванфтоманц эрявиксшиц. Произведенияса кялень художественнай средстватнень смузьсна.

Р.К. Орловать эряфонь и творческяй киц. Тонафнема кизотне. Велень школаса покодемась. Васенце аськолксонза литератураса. «Мокша» журналса покодемац. Инь содаф стихонь сборниконза «Аран тяштенякс», «Пизелонь каштаз», «Цёнгат». Стихонзон лангс музыкань ладямась, дисконь нолдамась.

«Мордовиязе, гайняк!» стихотворенияса шачема ширть образоц. Сравнениятнень смузьсна.

«Мокшень кяль» стихотворенияса шачема кяльть ванфтоманц эрявиксшиц.

Литературань творчествась. Сёрмадомс сочинения темать коряс: «Шачема кяльсь – тядянь кяльсь».

Аф класса лувоманди:

В.Н. Радин. «Пъзьгатань сама пинге»

И.М. Девин. «Иван лейтенантсь»

А.И. Инчин. «Павлуха – партизан»

А.С. Щеглов. «Чака и Кулина»

Никул Эркай. «Шураган»

С.С.Ларионов. «Паваз»

Л.Ф. Маркулов. «Волчонок»

А.М. Доронин. «Стака отт»

Наизусть тонафнемс:

П.У. Гайни. «Шачема край»

Г.И. Ельмеев. «Ёжка» ёфксста пакш

Р.К. Орлова.  «Мокшень кяль»

А.М. Доронин. «Краезень тядяц – Россиясь»

С е м б о ц :

Художественнай текстонь тонафнемати - 54 част

Корхтама касфтомань занятиятненди – 8 частт

Аф класса лувомань урокненди - 8 частт

Мокшень кяльть коряс содамошинь и маштомошинь и навыконь оценкать норманза.

Иттенень  тонафнемаса оцю воспитательнай ролец синь содамошиснонды и маштомошиснонды и навыкснонды видексонь, лац и эсь пингстонза оценкать максомать. Сон лезды касфтомс тонафнеманкса школьникнень ответственностьснон, ванфтомс тонафнемань дисциплинать, касфтомс тонафнихнень эстейст вешфкснень, ваномс эсь лангозост видексонь сельмоса, улемс лестнайкс, ащемс видешить инкса, тяка пингть ученикнень содамошиснонды касфтф и кирьфтаф оценкань путомась колсесы синь мяльснон, кошярясыне эсь колгаст вельф цебярьста арьсема,прянь шнама, аф вийс и содамошис коря эстейст оценкань максома.

Формализмать и оцю процентонкса панемать каршес молемать инкса содамошитненди оценкань максомаста эрявихть кирдемс мяльса синь кърхкалмосна и кемошисна, проверямс школьникнень маштомошиснон, лац и арьсефста учебнай и практическяй задачань тиемста, кемоста ванфтомс ладяф норматтнень.

Оценкань норматнень коряс мярьгондеви ладямс мокшень кяльса сембе тонафнихнеь содамошиснонды, маштомошиснонды и навыкснонды фкя лацонь вешфкст. Синь эсост ладяфт: 1) мокшень кяльть устнай и письменнай форманзон эрь кодама ширеснон содама оценкань фкя лацонь критерийхть (сёрмадомань грамотностти, сотф корхтамать кялень ширде ладяманцты, корхтамать содержаниянцты оценкань критерийхть); 2) содамошитненди, моштомошитненди и навыкненди оценкань фкя лацонь нормат; 3) эрь кодама видонь контрольнай работань оцюлма; 4) эрь кодама видонь контрольнай работанкса отметкань лувкс.

 Тонафнихненди путневихть вешфкст аньцек тяфтама маштомошинкса и навыконкса, конатнень лангса работасть или работайхть проверямань пингста. Мокшень кялень урокса проверявихть: 1) кяльть колга получаф сведениятнень содамасна; 2) сёрмадмань навыкне; 3) корхтамань маштомошитне.

1.Тонафнихненди устнай ответонь оценкасна.

Устнай кизефнемась – васенце способсь, конань вельде содавихть мокшень кяльть коряс тонафнихнень содамошисна, маштомошисна и навыксна. Ученикть ответонцты оценкань максомста эрявикть кирдемс мяльса тяфтама критерийхть: 1) ответть целайшиц и видешиц; 2) тонафнефть шарьхкодемац; 3) ответть кялень-валонь ширец.

Тонафнить ответоц лувондови сатомшкакс и кърхкакс, къда сон сотф азф темать мархта, лигикань ширде сон ащи мельцек моли корхтамакс, конань эса няеви  определениятнень, правилатнень тевс нолдамаса маштомась.

«5» оценкась путови, къда учениксь: 1) сатомшка марнек азондсы тонафнеф материалть, максы кялень понятиятненди виде определеният;   2) педа пес шарьхкодьсы материалть, машты содамошинзон тевс нолдама; сявонди эрявикс примерхт аф аньцек учебникста, но и арьси соньцьке; 3) азондсы материалть мельцек-мельцек, эсонза логическяй сотксонь кирдезь и литературнай кялень норматнень ванфтозь.

«4» оенкась путови, къда ученикть ответоц ладяй няка вешфксненди, конат эрявихть «5» оценкань путомста, но тяка пингть ноляй 1-2 эльбятькс, ня эльбятькснень петнесыне сонць, мзярда учительсь шарфтсы лангозост тонафнить мяленц; азондомаса кялень-валонь ширде и эсонза эрявикс сотксонь кирдемасонга эльбятькста 1-2.

«3» оценкась путови, къда тонафнись содасыне и шарьхкодьсыне азф темать основной ширензон,но: 1) азондсы материалть аф марнек и ноляй афсатыкст правилатнень азомста или понятиятненди определениянь максомста; 2) аф машты кърхкаста и цебярьста эсь мялензон-арьсеманзон ладяма, эсь примерсонзп синь кемокстамост; 3) азондсы материалть аф мельцек-мельцек и азондомасонза ноляй кялень-валонь эльбятькст.

«2» оценкась путови, къда тонафнись аф содасы ётаф материалонь максф разделть оцюшканц, определениянь и правилань азомста тиенди стама эльбятькст, конат ёфси колсесазь ня определениятнень и правилатнень смузьснон, азондсы кодамовок сотфксфтома, аф кемазь. «2» оценкать мархта няфтевихть тонафнить анокламаса стама афсатыкст, конат шоряйхть тейнза сай пингонь материалть тонафнемста, шарьхкодемаста.

«1» оценкась путови, къда тонафнись ёфси аф содасы или аф шарьхкодьсы материалть.

Оценкась («5», «4», «3») путневи аф аньцек фкя ответонкса (мзярда тонафнить анокшинц проверяманкса ноляви башка пинге), но и мзярошка ответонкса, конатнень максозень учениксь уроконь пингста (лихневи марнек уроконкса балл), къда урокть пингста аф аньцек кулхцонкшневсть тонафнить ответонза, но и практическяй ширде ванондовсть содамошинзон тевс нолямасна.

2. Сочинениянь и изложениянь оценкась

Сочинениятне и изложениятне – лац и мельцек-мельцек мялень азондома тонафнихнень маштомошиснон, синь корхтама маштоммаснон проверямс эрявикс формат.

5-11 класснень эса сочинениятне и изложениятне ётафневихть программаса «Корхтама маштомать касфтомац» разделть вешфксонзон мяльс сявозь.

Подробнай изложениянди текстть примернай оцюлмац тяфтама: 5 класса – 100-150 вал, 6 класса – 150-200 вал, 7 класса – 200-250 вал, 8 класса – 250-300 вал, 9 класса – 350-450 вал, 10 класса  - 450-500 вал, 11 класса 500-550 вал.

8-11 класснень эса итоговай конторльнай подробнай изложениянди текстть оцюлмоц мжна касфтомс 50 валда, сяс мес тяфтама урокса аф уленди инголькиге аноклама.

Оценкань максомста класса сёрмадови сочинениятнень оцюлмосна тяфтама: 5 класса – 0,5- 1 страница, 6 класса – 1-1,5 страница, 7 класса – 1,5-2 страница, 8 класса – 2-3 страница, 9 класса – 3-4 страница, 10 класса – 4-4,5 страница, 11 класса –4,5 -5 страница.

Тя оцюлмась примернай, сяс мес тонафнить текстонц оцюлмоц ащи сочинениять стиленц и жанранц, темать характеронц и арьсефшинц, онафнихнень вишкста или валом сёрмадомаснон, сембе ширде содамошиснон, почеркснон эзда.

Сочинениянь и изложениянь вельде  проверявихть: кода тонафнись машты темань панжема; темать панжеманкса кялень эрявикс средстватнень ноляма; кялень норматнень и орфографиянь правилатнень ванфтома.

Эрь кодама сочинениять и изложениять инкса путовихть кафта оценкат: васенцесь – содержаниянь и кялень-валонь коряс; омбоцесь – орфографиянь и пунктуациянь норматнень ванфтоманкса.

Кафцьке оценкатне лувондовихть мокшень кялень коряс оценкакс, ся случайда башка, мъзярда проверяви литературать содамац. Эста васенце оценкась лувондови литературань коряс оценкакс.

Работати содержаниянь и кялень-валонь ширде оценкань максомста тяфтапт:

• Тонафнить работанц темати и основной мяльти-арьсемати ладямац;
• Темать марнек панжемац;
• Сёрматф материалть видексшиц;
• Сёрматфть мельцек-мельцек лац молемац.

Сочинениятнень и изложениятнень кялень-валонь ширде ладямаснонды оценкань максомста сявондевихть мяльс: корхтамать валонь ширде козяшиц; корхтамать стилень ширде фкаксшиц и мазышиц; кялень и стилень эльбятькснень лувкссна.

Орфографиянь и пунктуациянь коряс содамошитнень инкса оценкась путневи нолдаф эльбятькснень лувксснон мяльс сявозь.

Содержаниянь и кялень-валонь ширеть инкса путневихть тяфтама оценкат:

«5» оценкась путови, къда : рабатать содержаниянц марнек темать коряс; эльбятькст аш; содержанияц моли эрявикс последовательностьса; работась козя валонь ламошинь и синтаксисонь конструкциятнень нолямаснон коряс, валхнень лац тевс нолямаснон коряс; текстса няеви стилень фкаксши и выразительность.

Работаса ноляви содержаниянь коряс 1 афсатыкс, кялень-валонь коряс – 1-2 афсатыкс, грамматикань – 1эдьбятькс.

«4» оценкась путови, къда: работать содержанияц пъцтай марнек темать коряс; содержаниясь видексонь, но ули аф лама афсатыкс; аф ламода колсеви мяльхнень мельцек азондомасна; лексикань и грамматикань ширде сёрматфсь сатомшка козя; текстса ванфневи стилень эрявикс фкаксшись и сатомшка выразительностсь.

Работаса ноляви содержаниянь коряс аф 2-да лама афсатыкс, кялень-валонь коряс аф – 3-4-да лама афсатыкс, грамматикань эльбятькста аф 2-да лама.

«3» оценкась путови, къда: работать содержанияса улихть темать эзда аердомат; работась видексонь сембоса, но эсонза улихть башка эльбятькст; васток-васток колсеви мельцек азондомась; аф козя валонь ширде, фкат синтаксисонь конструкциятне, васьфневихть афсатыкст валхнень аф эсь вастсост тевс нолямасна; стилень ширде аш фкаксши, кяльсь-валсь аф выразительнай.

Работаса ноляви содержаниянь коряс аф 4-да лама афсатыкс, кялень-валонь коряс аф 5-да лама афсатыкс, грамматикань эдьбятькста аф 4-да лама.

«2» оценкась путови, къда: работась аф темань коряс; нолдаф лама афсатыкс; работать сембе пяльксонзон ёткса аш эряикс соткс, синь эсост аш мельцек молема, работпсь аф отвечай темати; пяк ашу валонь ширде, работась сёрматф фкя типонь нюрьхкяня валрисьмоса, ётксост сотксне лафчт, сидеста васьфневихть валхт, конат нолдафт тевс аф лац; текстса колаф стилень фкаксшись.

Работаса нолдаф содержаниянь коряс 6 афсатыкст, кялень-валонь коряс – 7-шка афсатыкс, грамматическяй эльбятькста 7-шка.

«1» оценкась путови, къда работаса нолдаф содержаниянь коряс 6-да лама афсатыкс, кялень-валонь коряс – 7-да лама афсатыкс, грамматикань коряс – 7-да лама эльбятькс.

Примечаният.

1. Сочиненияти оценкань максомста эрявихть сявондемс мяльс работать самостоятельностец, эсонза мяльхнень-арьсематнень оригинальностьснон, композициянь и кялень-валонь ширде лац-ряц ладяманц. Арьсефть оригинальностенц и сонь тевс нолдаманц инкса васенце оценкась касфневи фкя баллда.
2. Къда сочиненить оцюлмоц тяса азфть коряс фкя пяле мархтонь – кафтонь-кърдада сяда оцю, эста норматифне касфтовихть «4» оценкати – фкя единицада, «3» оценкати – кафта единицада. Кепотькс, грамотностть инкса «4» оценкась путови работати, конань эса орфографиянь коряс 3, пунктуациянь коряс 2, грамматикань коряс 2 эльбятькст, или 2-3-2, 2-2-3 соотношениятнень пингста; «4» оценкась путови 6-4-4, 4-6-4, 4-4-6 соотношениятнень пингста. «5» оценкань путомста сочинениять оцюлмац мяльс аф сявондеви.
3. Васенце оценкась аф положительнай, къда темась илядсь апак панчт, хъть сочинениянь лия ширетне аф кальдяфт.
4. Сочиненияти и изложенияти оценкань масомста эльбятькснень лувомста эряви кирдемс мяльса ся, мезе азф 11 разделса фкя типонь и аф оцюэльбятькснень и тонафнить кядьса тиф петькснень колга.

3.Итоговай оценкань путомась

Тонафнема четвертть и тонафнема кизоть инкса путови итоговай оценка. Сон фкя, и вельденза няфтеви мокшень кяльть коряс тонафнить  сембе ширде аноклафшиц: теоретическяй материалть сламаса, маштомошиса, кялень-валонь коряс касомаса, орфографиянь и пунктуациянь грамотностьса.

Итоговай оценкась путови аф аньцек цифратнень лангс ванозь. Васендакиге эряви ваномс сянь лангс, кодама содамошит няфти тонафнись сембе параметратнень коряс оценкань путома пингста. Сембе сяка, штоба учениксь лац аноклакшнель сембе занятиятненди марнек тонафнема кизоть пингста, мяльс сявондеви оценкать путомста ся, кода тонафнесь сон марнек тя пингть.

 Итоговай оценкань путомаста сяда оцю мяль шарфневи оценкатненди, конатнень вельде няфневихть тонафнить сембе ширде маштомошинза, навыконза. Сяс итоговай оценкась аф уленди положительнайкс, къда четвептть, кизоть ётамда меле контрольнай работатнень пяледа ламоснон тонафнись сёрмадозень «2» и «1» оценка мархта.

Старшай класснень эса сочинениять инкса кафцьке оценкатне, конат няфнесазь тонафнить литератураса содамошинзон и сонь грамотностенц, сёрматкшневихть дробьса класснай журналса литературать коряс страницаса.

3. Инголи моли сатфксне

  Личностнайхне:

• шарьхкодемс мокшень кяльть вастонц эряфса, фкя-фкянь ёткса корхтамста, перьфпялень ванфтомста
• маштомс кочкаф содамошитнень и сатфкснень нолямс школань и эрь шинь эряфса;
• касфтомс маштомашитнень ялга и оцю мархта прянь вятема; шабрань ломаттнень мархта сотксонь     кирдема;
•  содамс иттненди народоньконь эряфста мокшетнень эряма койснон, унксснон.

Метапредметнайхне:

• шарьхкодевиста марямс кайги мокшень кяльть ;
• маштомс  кизекфксонь лангс максома кувака и нюрьхкяня каршек вал;
• маштома эльбятьксфтома, выразительнайста и эрявикс интонациянь вятема лувомста,
• кувакаста и нюрьхкяняста азксонь азондома;
• максомс  анализ и оценка тиф заданиятненди;
•  маштомс корхтама мокшень литературнай  кяльса.

Предметнайхне:

• морафтома валть марнек,
• валть эса ударениять путома;
• валрисьмоть потмоса арьсемань канды инь эрявикс валхнень вайгяльса няфтема;
• валрисьмоть песа интонациять вятема;
• маштомс учительть морафтоманц и азондоманц, а станя жа эсь ялгаснон морафтомаснон и азондомаснон кулхцондома;
•  устна  ответонь максома фкя темань коряс путф кизефксонь лангс;
• художественно-выразительнай средствань мушендома;
•  аф оцю морафтф статьянь пяльксонди лемонь максома;
•  эсь тевонь колга азксонь арьсема.

                                   Календарно – тематическяй планць.        

                                   Тематическяй  планированясь