Лингвистическяй илядь: «Инжикс валкснень пяли».
план-конспект

Класса озсефт ванындыхне,  кочкаф учительхнень и тонафнихнень ёткова. Сяськихне озсефт класть ёткса пяле ковкс. Ня илядсь ётафтови урокта меле мокшень кялень класса. Тя мероприятиять участниконза кочкафт лия класста.

Классь: 7

Мероприять целенза: Формировандамс сяда лац шабатнень содамошиснон лингвистическяй валкснень коряс; козякофтомс шабатнень корхтама маштомашиснон.

1-це вятись: - Шубратада, шабанят и ваныхне! Тячи минь мархтонт ётафттама лингвистическяй илядь: «Инжикс валкснень пяли».

2-це вятись: - Инголи аф лама азонттама валкснень колга.

  Мокшэрзянь валкст васьфневсть нинге кемгафксувоце векста. Виде, нят ульсть аф валкст, кодамот минь васьфнетяма тяниень пингть, а валонь спискат. Тяфта Екатерина II азорондаманц пингста тифоль валкс, коса лия кялень валхнень ёткс сувафтфтольхть кафта сядода лама мокшень и зрзянь вал.

1-це вятись: - Башка мокшэрзянь валхт васьфневихть рузонь академикть И.И.Лепёхинонь (1771-1805 кк.) работасонга. Кемгафксувоце векста сембода оцю лексикографическяй памятникокс ащи Нижегородскяй епископть Дамаскинонь веете кялень валксоц (1785 к.). Тя валксть тяниень пингонь петьф вариантоц ладяфоль-тифоль А.П.Феоктистовонь кядяла (1971 к.). Сяда вишкомсь и ладявсь валксонь нолдамась 1917 кизода меле. И валксне ульсть сяда малат тяниень пингоннетненди.

2-це вятись: - 1933 кизоня лиссь И.Г.Черапкинонь «Мокша-мордовско-русский словарь с нрамматическим справочником». Пяк оцю эрявиксшиц финскяй учёнайть Х.Паасоненонь валксонц, кона ащи ниле томста. Лемоц «Мордовский словарь». Васенце томсь лиссь 1990 кизоня Хельсинки ошса.

1-це вятись: - Мокшень валлувксть козякодомста оцю васта занци «Мокшень-рузонь валкссь», кона лиссь 1998 кизоня Моску ошса, эсонза 41000 вал. Тя валксть лангса работась лама содаф учёнай-лингвист (Б.А.Серебренников, А.П.Феоктивстов, О.Е. Поляков и лият). 2002 кизоня Саранск ошса васенцеда нолдаф «Башка, марса, китькскя вельде» валкссь, кона сёрматф-тиф О.Е.Поляковонь и Н.С.Алямкинонь кядяла. Тя валксса кочкафт сложнай и парнай валхне и няфтевихть синь сёрмадомасна. Содаф французскяй писательсь А. Франс (1844-1924 кк.) мзярда-бди мяргсь: «Валкссь- тя целай мир, кона ащи алфавитнай порядкаса».

2-це вятись: - Мон мярьголень, што тя мирсь пяк мялень салай. И штоба повомс эзонза, минь серьгяттядязь инжикс валксонь мастору.

1-це вятись: -  Коннесть сельмонтень, лувода…

2-це вятись: - Вага сась васенце ялгазе. Няйса, тя валкс. Но кодама? Кода лемоц?

(Лиси фразеологиянь валкссь).

Фразеологиянь валкссь: - Кульса корхтатада колган. Вай, мъзяра тяса инжида! Шамбратада, шабат! Тинь аф содасамасть, киян мон? Мон эрь шиня стяшендан атёкшнень мархта. Пильгонь-прянь синдезь ласькан ляи штама. Корхтамста ломаттнень шалхкста аф вятнесайне.

1-це вятись: -  Саты, саты, кельгома валкс. Мон няйса, шабатне тонь шарьхкодедязь и содадязь пяк кунара. Кода мярьгихть тя валксти? (Кизефкссь максови сяськихненди).

1-це тонафнись: - Фразеологиянь (кевонзаф валзюлмонь) валкс. Тя валксса пяк лама кеврнзаф валзюлмода. Стяшендан атякшнень мархта – стяшендан рана. Пильгонь-прянь синдезь ласькан (курокста, вишкста). Шалхта аф вятнесайне – аф васькафнесайне.

Фразеологиянь валкссь: - Да. Монь лемозе Фразеологиянь валкс. Монь эсон пяк лама кевонзаф валзюлмода. А кие эздонт содай стихотворения, коса улельхть кевонзаф валзюлмот? (Кепотьксонди сявовихть стихотвореният).

1-це вятись: -  Лувость стихотворениятнень, мусть кевонзаф валзюлмотнень, азость фкя валса.

Катозе

Равжа пиле катозе

Ваймозень ни сатозе

Коленди и киськоряй,

Сельмосонза чипоряй.

Лофцкять марясы мргаста,

Пори пакарнят лияста,

Лямбоняти мады сон,

Кельгса катонязень мон.

Эряйхть пинекс-катокс

Ули пиненязе монь!

Катозевок ули!

Аньцек вов аф сявса ёньц,

Месс синь наголь тюрихть?

Мес синь якайхть стяда понат?

Мувору синь ётксост

Конац?

Мезе мархтост мон тиян?

Кода мумс тейст

                                  Ялгань ян?          (А.Громыхин).

2-це тонафнись: - Тя стихотворенияса улихть фразеологизмат: Ваймозень ни сатозе. Сатомс вайме – кулофтомс; аф сявса ёньц – аф шарьхкодьса; якайхть стядонь понат – якайхть кяжиста.

Фразеологиянь валкссь: - Виде. Молодецат. Ёнюват.

(Тя конкурсса сяськихне казевихть тяштеняса.)

 Вятихне лувсазь, кие мзяа тяштеня сявсь. Можна сявомс рузонь кяльста кевонзаф валзюлмот или работамс картинань коряс, ков рисовандафт кевонзаф валзюлмот. Тяфта жа можна сявомс кевонзаф валзюлма мархта валрисьмот.

  Заданиясь: мусть кевонзаф валзюлмотнень, ётафтость мокшекс.

Попасть пальцем в небо; палец о палец не ударить;пальцем не тронуть; знать свои пять пальцев; ни в зуб ногой; одна нога здесь, другая там; уносить ноги; держать язык за зубами; клевать носом; зарубить на носу; держать камень за пазухой; решетом воду носить; не лыком шит.

2-це тонафнись: - Спасибо, кельгома валкс. Няйсак, конашкава цебярьста иттне тонь содатядязь. Ётак, озак. Кармат тонга мархтонк тичиень иласа.

(Лиси синонимонь валкссь).

Синонимонь валкссь: - Шумбратада, кельгома инжихть, кельгома конакт! Мон кулине, тяса ётафтови ила. А кодама праздникс тинь пуромоде? Мон маряйне, тяза пуромсть инь ёнюфне, инь усулофне, инь содайхне.

1-це вятись: - Пара, кельгома валкс. Минь содадязь тонь. Шабат, кода мярьгизть тя валксти?

1-це тонафнись: - Мон арьсян, тя синонимонь валкссь. Тя валксть корхтамаса улихть синонипт: инжи-конак; праздник-ила; кулемс-марямс; инь ёнюфне; инь усолуфне; инь содайхне.

Синонимонь валкссь: - Пяк пара. А мон максолень тейнт тяфтама заданият.

1) Кочкамс валхт-синонипт или арьсемс валзюлмот максф валхнень мархта:

а) Кулемс, марямс, содамс;

б) Акша, лофтана;

в) Сянгяря, пиже;

г) Пичедемс, ризнамс;

д) Шра, моркш;

е) Куватьс, ламос;

ё) Ёмла, анцяйня, пакшкя;

ж) Шумбра, таза, вии;

з) Тяштемс, сёрмадомс.

2) Кие сяда курок лезды нумолняти ворьгодемс келазть эзда? Эряви клетканятненди сёрмадомс синонипт.  Кепоьксонди: вий  валсь.

3) Лувомс ёфксть. Лия шрифтса максф валхненди арьсемс синонипт.

                                            Келазсь и каргсь. 

Арьсесть Келазсь и Каргсь марса касфтомс-трямс идьснон. Каргсь эрь шобдаваня тушендсь ярхцамбяленкса, иляденди мртцесь сизефста, каннесь иттненди ярхцамбяль. А келазсь эрь шиня сивондсь тифтень карга лефкскя. Илять сон васьфтезе Каргть и ризнай вайгяльса корхнесь тейнза:

- Конашкава ужяль, но минь юмась нинге фкя лефкскяньке.

- Кона лефкскяньке юмась: тоннесь или моннесь? – эвотьф вайгяльса кизефнесь Каргсь.

- Да кодама явондомат: тоннесь или моннесь. Юмась лефкскяньке, кувака сялдасканьке.

2-це тонафнись: - Мон сёрмадолень тяфтама синонипт: якась, порендсь, пичеди, мярьгондсь.

Синонимонь валкссь: - Конашкава ёнюфтада. Пяк мялезон, што тинь машттада синонипнень тевс нолямост.

 Тя конкурсса сяськихне казевихть тяштеняса. Вятихне лувсазь, кие мзяра тяштеня сявсь. Можна сявомс рузонь кяльста синонипт и ётафтомс мокшекс.

2-це вятись: - Ширезонк сась нинге фкя ялгазе. Няйса, тя валкс. Но кодама? Кода лемоц?

(Лиси антонимонь валкссь).

Ялгат, колендемс валхнень мархта аф эряви. Валсь – аф налхкш. Валсь и тол, и эй, кона пидетянза, и кельмофттянза; валсь уленди и калгода, и ляпе. Сон и сялканза, и эрьхттянза; сон и ляпоптьсы седицень и петьсы ваймоцень. Валсь тя стама вий, кона срхкафтсы эряф и машфты эряф и, мезсь главнайсь, тя вийсь мезьсовок аф унксневи.

 1-це тонафнись: - Мон арьсян, тя Антонимонь валкссь. Тя валксть корхтамаса улихть антонипт: калгода-ляпе; то-эй, срхкафты эряф и машфты эряф.

Антонимонь валкссь: - Тейнть ули тяфтама заданиязе. Максан тиемс лото «Антонипне». Эрявихть эрь валти арьсемс антонипт. Кие сяда курок.

 Акша-равжа, ляпе-калгода, фтала-инголе, алува-вяре, виде-кичкор, ичкозе-маласа, ламбама-шапама;

 Акша-равжа, зиян-паваз, уцез-питни, кяжи-пара вайме, авардемс-пеедемс;

2-це вятись: - Спасибо, кельгома валкс. Няйсак, конашкава цебярьста иттне тонь содатядязь. Ётак, озак. Кармат тонга мархтонк тячиень иласа.

1-це вятись: - Ширезонк сась нинге фкя ялгазе. Няйса, тя валкс. Но кодама? Кода лемоц?

(Лиси эпитетонь валкссь).

Эпитетонь валкссь: - Шумбратада, кельгома инжихть! Мон кунара ни учсян кенкшть вакса и кулине, кода отвечайхть шабатне. Мон шарьхкодине, што тяза састь тевонь кельги, книгань ванфты итть. Мон ёралень максомс тейнть тяфтама задания. Сяфтяма аф оцю стихотворения келуть колга.

Веле песон пиче вирсь

Тоса акша келу касы,

Мазы, кода мокшень стирь,

Од нарядонц коста щасы.

Ляпе сянгяря руцяц,

Щамоц акша ловонь лаца,

Мярьгат, шобда вень кучкать,

Палы штатол оцю садса.    (А.Самошкин).

Ванцаськ, кода корхтатама тя шуфтть колга.

3-це тонафнись: - Тя стихотворенияса няфтеви келуть мазышиц. А келуть мазышиц няфтеви эпитеттнень вельде. Эпитеттне нолявихть тевс сяс, штоба сяда лац няфтемс предметть, сонь признаконц, качестванц, свойстванц. Эпитеттне: акша келу, ляпе сянгяря руцяц, од щамонц. Тя валхне няфтьсазь келуть мазышинц.

4-це тонафнись: - Мон содаса, што эпитеттне ванондовихть эмоционально-экспрессивнай ширдевок: цебярь геройхненди, персонашненди характеристикань максомста сявондевихть ляпе, лиричнай эпитетт; кальдяв персонашнень колга азондомста эпитеттне улендихть казямот.

Кепотьксонди, можна сявомс Ф.Атянинонь ёфксста «Сельведь-богатырь» Леса геройсь и Инекуйсь. Фкя командаста налхкись азы эсь героенц эзда черта, а омбоцесь антоним вельде эсь героенц эзда.

5-це тонафнись: - Эпитетсь – образнай выражения, художественнай определения, кона максы предметтненди и явлениятненди образность, эмоциональность и кона сяда мазолгофтсы корхтамать.

Эпитетонь валкссь: - Молодецтада! Конашкава цебярьста содасамасть. Но монь нинге улихть кизефксоне.

1) Кода явондовихть эпитеттне составонь коряс?

1-це тонафнись: - Эсь составснон коряс эпитеттне явондовихть колма группава: простойхть (туста вирь), сложнайхть (вии и кайги вайгяль), составнойхть (цють трнатозня моли вайгяль).

2) Кодама корхтама пяльксса няфтевихть эпитеттне?

2-це тонафнись: - Прилагательнайса: лямбе кядь, равжа кулома, сянгяря тунда, кели пакся, сенем сельмот, оржа ванф, валда лихтибрят, виде ронга, пиже путьконя и стак тов.

3-це тонафнись: - Глаголса: сокаф мода, озафтфт панчф, мяльс туф ломань, шувонтф паксят, ётаф кит, курмоштаф кядькоморхт, шинь пицеф шама, кельмонь тапаф пизем и стак тов.

4-це тонафнись: - Существительнайса: иляназ шяярьхть, одар шама, келу шиненя, цюкорня щёка, инези тюс, ямся пяште ула, парьхци ве, мушка сакал, лаймарь сельмот и ста тов.

2-це вятись: - Спасибо, кельгома валкс. Няйсак, конашкава цебярьста иттне тоньге содатядязь. Оцю сюкпря тйеть заданиятнень инкса.

1-це вятись: - Тейнек сась нинге фкя инжи. Серьгядьсаськ сонь. Сувак, сувак, кельгома инжи. Содафт мархтонк.

(Лиси Топонимическяй валкссь).

Топонимическяй валкссь: - Шумбратада, шумбратада, кельгома шабат! Моньге мялезе мархтонк содафтомс. Тинь инголент Мордовия Республикать картац. Азость Мордовия Республикань ошнень лемснон.

1-це тонафнись: - Саранск, Ковылкино, Темников, Краснослободск, Инсар, Ардатов, Рузаевка.

Топонимическяй валкссь: - Виде. Содасасть ошнень. А тяни омбоце кизефксозе. Кодама оцю ляйхть шудихть Мордовиять эзга?

2-це тонафнись: - Инь оцю ляйхне: Мокшесь, Сурась, Вадсь.

Топонимическяй валкссь: - Виде. Молодецтада! А монь лемозе кода?

4-це тонафнись: - Топонимическяй валкс.  Топонимика валсь – греческяй вал, ащи кафта валста: топос – место (васта), онома – имя (лем).

Тя конкурсса сяськихне казевихть тяштеняса. Вятихне лувсазь, кие мзяра тяштеня сявсь.

1-це вятись: - Минь лама пингта ётафтоме валксонь масторса. Инжикс тейнек сашендсть аф фкя лацонь валкст. Монь койсон, минь цебярьста васьфтеськ синь. Парста тиеськ синь заданияснон. Астама оцю сюкпря тейст заданияснон инкса.

2-це вятись: - Арьсетяма, што минь сидеста карматама якама  инжикс валкснень шири.

1-це вятись: - Содамс эсь шачема масторцень, эсь кяльцень – тя пяк интереснай и эрявикс тев.

2-це вятись: - Ванфомс кяльть козяшинц тейнек лездыхть валксне. Семботи тейст астама оцю сюкпря.

1-це вятись: - Спасибо астама нинге ваныхненди, што синь лац васьфтезь налхкихень. Спасибо, тейнт!

2-це вятись: - Минь лингвистическяй иляденьке аделавсь! Сембонди, няемозонк!

                                                                            Тиезе: