Старцева А.А. Алексей Мишарин повесьтъясын шӧр герой
методическая разработка на тему

Старцева А.А.,

учитель коми языка и литературы

ГОШИ «Гимназия искусств

при Главе Республики Коми»

имени Ю.А.Спиридонова

Алексей Мишарин повесьтъясын шöр герой

«Войвыв кодзув» журналын бöръя воясас тшöкыда пондiсны петны челядьлы гижöдъяс. 2012 воын кö вöлi йöзöдöма сöмын Алексей Мишаринлысь да Иван Ногиевлысь висьт-повесьтсö, 2013 воö петöны нöшта Алексей Поповлöн, Андрей Власовлöн, Гений Горчаковлöн да Зарни Люсялöн челядьлы гижöдъяс. Öнiя кадö найö зэв ёна колöны, медым водзö сöвмöдны челядьлы коми литература.

Тайö докладлöн могыс — тöдмöдны «Войвыв кодзув» журналын медся тшöкыда йöзöдчысь гижысь — Алексей Мишаринлöн творчествоöн. Сылöн нимыс коми литератураын абу выль. Гижысьлöн медводдза небöгыс петавлiс 30 во сайын — «Зеп тыр коль» (1984 воын), мöдыс — «Шоныд зэр» — 1987 воын. Дыр кад чöж Алексей Мишарин нинöм эз йöзöдлы. И со — 2012 воын «Войвыв кодзувын» öти бöрся мöд заводитöны петны выль гижöдъясыс. И регыд мысти автор лэдзö «Ид тусь» небöг (2012).

Алексей Васильевич Мишарин чужлöма 1949 вося апрель 5 лунö Кöрткерöс районса Шойнаты сиктын. Öкмысöд классöдз велöдчöма Шойнатыса шöр школаын, сэсся 1965 воын мунöма велöдчыны Сыктывкарса сельскохозяйственнöй техникумö. 1969 воын, техник-механик дипломöн, пырöма уджавны механикöн «Вишерскöй» совхозö. Армияын служитöм бöрын сiйö жö совхозас уджалöма бригадир-механикöн, центральнöй отделениеса веськöдлысьöн, инженерöн. Сизим во Висерса шöр школаын нуöдöма производственнöй обучение. Школаас уджалiгöн, 1980 воын помалöма Ленинградса лесотехническöй академия. 1983 восянь Алексей Васильевич дас воысь дырджык веськöдлöма «Имени 50-летия СССР» совхозöн, вöлöма директорöн «Нившерскöй» совхозын да ГУП РК «Зеленецын». 2002 восянь пенсия вылас петтöдз уджалöма Сыктывдiнса видз-му овмöс да сёян-юан управлениеын. Алексей Васильевич — уджвывса ветеран, Коми Республикаса заслуженнöй уджалысь, Почёт ордена кавалер.

2013 воын Алексей Мишаринлöн петiсны «Войвыв кодзув» журналын «Чепелышъяс», «Кор лэбзьö коляоз» да «Вильыд ордым» повесьтъяс. На йылысь и лоö сёрниыс тайö гижöдас.

«Чепелышъяс» повесьтын медшöр геройясыс — Васьö Петров да Миша Габов — нёльöд классын велöдчысьяс. Автор петкöдлö налысь ёртасьöмсö, эрдöдö пакöститчöмсö, восьтö налöн олöмысь бурсö и лёксö.

Повесьтын босьтöма дженьыд кадколаст — öти во. Но тайö воыс лоö тырмымöн, мед геройяс вужвыйöн вежсясны. Медъёна кык ёрт пакöститчöны школаас. Миша мыччö урок вылын Васьöлы ас вöчöм пугач, и велöдысьыс — Марья Ивановна — мырддьö дуранторсö. Миша дöзмö таысь Васьö вылö да корö вöчны выль пугач. А сiйöс лöсьöдöм вылö колö ыргöн трубка. Но кытысь сiйöс босьтан? Дум вылас зонкалы усьö колхозса гаражын ыджыдöн уджалысь Иван чожыс. Васьö дыр оз думайт да мунö сы дорö, пугач вылö пö колö ыргöн трубка. Но чожыс сöмын скöрмö сылöн корöмысь.

Тайöс тöдмалöм бöрын Миша нуöдö Васьööс рытнас гаражö да ножовкаöн пилитö трактор мотор помысь трубкасö. Налöн мыжыс, дерт, воссьö. Иван чожыс янöдö найöс таысь класс водзаныс. И Васьö вель ёна лöгасьö ёртыс вылö: «Кöть эськö думысь ачымöс мыждi жö, но некыдз сьöлöмöй эз кöсйы бурмыны. Быттьö кык морт ме пытшкын тышкасисны. Öтиыс менö мыждiс, мöдыс Мишаöс. И мöдыс вермискодь».1 

___________

1 А.Мишарин. Чепелышъяс // Войвыв кодзув.— 2013.— №2.— Л.б. 12.

Кор Марья Ивановна корö гижны медбур ёрт йылысь сочинение, Васьö бöрйö мöд зонкаöс, кодкöд весиг оз ёртась — Витя Моторинöс. А Миша, мöдарö, гижö Васьö йылысь: «Менам друг Васьö Петров. Ми сыкöд öти парта сайын пукалам. Васьöыс öнi ме вылö дузъялö, пугачсьыс да мый оз сюр карö ветлыны. Ачым нин гöгöрвои, мый мыжа, Васьöсö пакöститчынысö кыски да. Но зэв ёна кöсъя сыкöд воддза моз ёртасьны. Медым öдйöджык мекöд бурасяс, сета ассьым меддона маркаöс, кытчö рисуйтöма Т-34 танк.2

Та бöрын Васьö пырысьтöм-пыр бурасьö Мишакöд, быттьö нинöм эз и вöвлы. Но тулысладорыс Миша бара на кыскö Васьööс аслас мыжö: вомас няклялö ёкмыль да лыйö трубка пыр öти классын велöдчысь Ниналы, но веськалö выль велöдысьлы плешкö. Сералöмсьыс Васьö тшöтш веськалö Мишакöд директор кабинетö. Участкöвöйöн повзьöдöм бöрын ёртъяс раммыштöны да корöны велöдысьныслысь прöща. Галина Петровна, гашкö, и прöститö найöс, но Пушкиныс — оз. Мыйлакö öд стенмас öшалысь портретыс усьö юр вылас Мишалы, кодi буретш оз велöд Пушкинлысь кывбурсö да босьтö таысь «кык».

Та бöрын Миша кык вежон куйлö больничаын. А бурдöм бöрас дзикöдз вежсьö: кутö бура велöдчыны, дугдö дурны, весиг Васьööс öлöдлö дурöмсьыс. Но Васьöлы татшöмторйыс сьöлöм вылас оз во: «Кутшöм друг вöлi! А ставсьыс мыжа Пушкин! Эз кö усь портретыс Мишалöн юр вылö, öнi на эськö важ моз другасим да олiм! Эз весьшöрö пöчöй шулы, кассяна воыд пö бурсö оз вай. Со тай, кымынысь нин сконйыштлiс»3.

Татшöм вежсьöмыс первойсö чайтсьö чуймöданаöн. Но косавлыны кö бöр, аддзам, мый Миша эз на вывтi лёка и велöдчы, да Васьöлы на отсалiс бурмöдны физкультураысь оценка. А Васьö, первойсö кöть и петкöдчö дурысьöн да Мишалöн дом йылын мунысьöн, бöрыннас велалö кывкутны чой-вок да ас вöснаыс и весиг отсалö ставсьыс гусьöн корсьны Мишалöн батьлы удж.

Но век жö «Чепелышъяс» повесьтын абу на тырвыйö восьтöма геройяслысь характерсö. Кöть гижöдыс мунö Васьö нимсянь, ми ог аддзöй сылысь пытшкöсса олöмсö, сьöлöмтö вöрзьöдысь мöвпъяссö. Васьö сöмын юксьö аслас быдлунъя олöмöн да тешкодь лоöмторъясöн, кодъяс петкöдöны нюмтö, но оз уджöдны вежöртö.

Тöдчымöн торъялö «Чепелышъясысь» «Кор лэбзьö коляоз» повесьт. Гижысьлöн озырмö кывйыс, заводитöны паныдасьлыны вöр-ва серпасъяс, вежсьö геройясöс петкöдланногыс. Та пöрйö сёрниыс мунö коймöд морт нимсянь нин. Шöр геройясыс — Данила Марков да Васьö Моторин — велöдчöны сизимöд классын. Ортсынас найö ёна торъялöны öта-мöдсьыныс. Данила — латшкöсiник тушаа, русыд юрсиа, гöгрöс чужöма, чангыль ныра, рудовлöз синма. Васьö — кузиник тушаа, сьöд юрсиа, косньöд чужöма. Кыкнанныс зiльöсь, уджачöсь. Кужöны дзоньтавны розя пыж да нимтöны сiйöс «Бригантинаöн». Тайö нимыс нин тöдчöдö ёртъяслысь романтическöй русö, и виччысян кутшöмкö шензьöдана лоöмтор. Но ёртъяслöн некыдз оз артмы катлыны пыжнас чери кыйны. То пыжыс бöр розясьö, то Данила мунö батьыскöд кар бердö лэптыны керка.

И повесьт шöрын нин сöмын ёртъяслöн артмö катны Нёбъю кузя. Найö казялöны берег вылысь киссьöм баракъяс да пыжсö домыштöм бöрын мöдöдчöны видзöдлыны найöс. Татысянь сюрöсыс пондö тэрыба тюрны, и видзöдласыд öдйöджык котöртö лист бокъясöд, а мый водзö лоас?

Автор пыртö тайö юкöнас аслас гижöдъясын кыпöдлытöм на тема — спецпереселенечьяслöн олöм. Сiйöс майшöдлö, мый йöзыс öдйö вунöдöны важсö: «Кадыс мöрччöма коркöя овмöдчанiнлы. Öд сылы, кадыслы, абу некутшöм делö важ дорас. Сiйö тупкö аснас ставсö, мый му вылын артмö да чужö. Гашкö, уна ва визувтас Нёбъюöд, кодыр воысь зонкаяс гöгöрвоасны, мый ройкмунöм стрöйбаяс улын кулöма дзонь эпоха. Кутшöмöн вöлöма сiйö?»4.

 ____________

2 Сэн жö. Л.б. 14.

3 Сэн жö. Л.б. 41.

4 А.Мишарин. Кор лэбзьö коляоз // Войвыв кодзув.— 2013.— №6.— Л.б. 35.

Зонкаясöс киссьöм баракъясысь босьтö шуштöм. Торйöн нин шойна аддзöм бöрын. Муын туплясьысь пöв помын «Шудöг» пасйöд серти найö гöгöрвоöны, мый тадзи шусьылöма татчöс грездыс. Данилалы окота мунны татысь, но Васьöлöн Бим понйыс аддзö öти барак стен бердысь тубрас. Сэнi вöлöма «Робинзон Крузо» небöг. Небöгсö листайтiгöн Данила аддзö нёль пельö кусыньтöм письмö. Сiйöс гижлöма 1944 воö Ваня ёртыслы танi олысь Даниел Шмидт. Письмöсьыс тыдовтчö, мый Даниелöс мырдöн вайöдöмаöсь тайö спецпоселениеас мамыскöд да бабыскöд.

Данила да Васьö шемöсмöны тайö гижöдсьыс да шуöны туявны, кодi сэтшöм Даниелыс. Корсьысьöмыс вайöдö Данилаöс Даниеллöн вöвлöм велöдысьлöн пиыс дорö, кодi мамыс кулöм бöрын сетöма карса музейö лöз коркаа тетрадь, ачыс коминас оз гöгöрво да. Тайö тетрадьсьыс ёртъяс тöдмалöны Анна Ивановналысь казьтылöмсö. И Шудöгын олöм йылысь висьтасьöмсö гижöны мöд тетрадьö.

Тайö казьтылöмсö лыддигöн тöдмалан, кутшöм сьöкыда овсьöма да уджавсьöма кулачитöм йöзлы. Но та вылö видзöдтöг найö абу чорзьöмаöсь сьöлöмнаныс да отсасьöмаöсь öта-мöдныслы. Торйöн нин нормöдö Даниеллöн мам вöсна тöждысьöмыс да повтöмлуныс.

Кык ёрт тöдмöдöны асланыс аддзöмторйöн öти классын велöдчысьяссö да вöзйöны сувтöдны Шудöгса шойна вылö кöрт крест. И некымын тöлысь мысти май дас витöд лунö Шудöгö мöдöдчö школьнöй автобус да потш-сюръя тыра телагаа трактор. Велöдчысьяс весалöны шойнасö лöп-ёгысь, вöчöны йöр. А Данилалöн Ёгор чожыс сувтöдö ас вöчöм кöрт крест.

Накöд шойна вылö ветлö и Алексей Данилович — Даниел Шмидтлöн пиыс, кодöс шöр телевидение отсöгöн корсьöны Данила да Васьö. Зонкаяс козьналöны сылы Анна Ивановналысь казьтылöмсö, кодöс вуджöдöмаöсь роч кыв вылö да гижöмаöсь тетрадьö. Найö весиг оз на гöгöрвоны, кутшöм ыджыд буртор вöчисны. «Зонкаяс яндысьöмöн вашъялiсны. Найö эз виччысьны некодсянь ошкöмсö. Весиг дум вылас некоднанныслы тайö эз усьлы. Прöстö налы письмö аддзöм бöрын окота лои тöдмавны, мый лои ичöтик Даниелыскöд. А бöрыннас став уджсö лои вöчöма öтвылысь, ёртъясыскöд, Ёгор чожкöд, Марья Ивановнакöд. Таын налы унаöн отсасисны. Сiдзкö, бур сьöлöма мортыс на гöгöрын унаöн»5.

Но тайö повесьтас эм и лёк оласнога персонаж — Коля Майбуров. Сiйö öтырышъя пакöститö Данилалы да Васьöлы. Пыжсö налысь розьöдö и пышйöдö, Бим понсö пагöдны видлö. Но став мыжыс воссьö. И участкöвöй волöм бöрын Коля пышйö накажитöмысь юрсиктö тьöтка дорас, а сы бöрся и мамыс вуджö сэтчö овны.

 «Вильыд ордым» повесьтын ми бара на паныдалам сiйöс (кыдзи и Данилаöс да Васьööс), но танi зонлöн этшыс нöшта на лёкмö. Карас Коля олö мамыслöн ичöт чой, Марья тьöт, дорын. «Этшыс сылöн бöръя вояснас нинöмöн эз вежсьы. Гашкö, ёнджыка на мутиясыс ас дорас кыскыштiсны. Школаын велöдчис шöркодя. Но компьютерöн вермис ноксьыны суткиясöн. Öнi сiйö сяммис сы вылын быдсямасö вöчны. Öтчыд видлiс ветымын шайта сьöмлысь копия вöчны. Весиг киоскысь сы вылö папирос пачка ньöбис»6.

Коля пырö уджавны карса автобусö кондукторöн да веськалö лёк йöз шöрö. Андрей Сосновский да Артём Дерягин пукавлöмаöсь нин дзескыдiнын. И абу велалöмаöсь овны ичöт удждон вылö. Кор Коля вöзйö налы грабитны юрсиктса банк, найö оз бöрыньтны сылысь вöзйöмсö. Бура дасьтысьöм бöрын куимöн уськöдчöны юрсиктса банк дорын инкассаторъяс вылö да мырддьöны сьöмсö. Вит миллион шайтöн гусясьысьяс дзебсьöны вöр керкаö.

_________________

5 Сэн жö. Л.б. 59.

6 А.Мишарин. Вильыд ордым // Войвыв кодзув.— 2013.— №11.— Л.б. 14.

Найöс участкöвöйлы отсалöны корсьны Васьö да Данила. Первой найö казялöны вотчиганыс вöрын дзебöм турунвиж «Жигули». Сэсся аддзöны Микол вöр керка дорысь кок туй да вöйталöм подольникъяс. Налы жö сюрö сиктсьыныс вошлöм кöза. И лоö гöгöрвоана, мый гусясьысьяс дзебсясьöны Микол вöр керкаын.

Участкöвöй Петровичкöд ёртъяс вöтöдöны пышйысьöс, кодöн вöлöма Коля Майбуров. Артмö кыйны и Сосновскийöс. А Дерягин пышйигас пырö нюрö да сэтчö и вöйö.

Данила да Васьö петкöдлöны асьнысö повтöмöн да ыджыд сьöлöмаöн. Кöть и регыд на помалiсны öкмысöд класс, найö кутöны асьнысö верстьöяс моз. Васьö кöсйö велöдчыны полицейскöйö, мед вежны коркö Петровичöс, кодi важöн нин кöсйö петны шойччыны. Сылöн повтöмлун вылö видзöдöмöн збыльысь эскан: тадзи и лоö. Весигтö Бим понсö нин велöдöма уськöдчыны лёк йöз вылö öружьесö мырддьöм могысь.

Но век жö повесьтсö быттьö абу на помалöма: «Сiйö (Данила — ред.) котöртiс батьыслöн «Жигули» дорö. Бöръяысь другыслы öвтыштiс кинас да пырис кабинаö. Васьö колльöдiс найöс синнас, кытчöдз эз саявны»7.

Чайтсьö, ёртъяс регыд бара на паныдасясны, мед лэбны асланыс «Бригантинаöн» выль корсьöмлы воча. Но автор кö водзö кутас гижны тайö геройяс йывсьыс, окота адддзыны налысь тыр-бура сöвмöмсö, кывны налысь мöвпъяссö, сьöлöмкылöмъяссö, пытшкöсса олöмсö, а не сöмын öта-мöдсö вежысь лоöмторъяс.

__________________

7 А.Мишарин. Вильыд ордым // Войвыв кодзув.— 2013.— №12.— Л.б. 55.