Внеклассное мероприятие: Я М. Пинясов казезе эряфонц иттненди.
план-конспект на тему

                Мероприятие: Я.М.Пинясов казезе эряфонц иттненди.

Ведущий: «Васенце васта монь лувиень ёткса – нят шабатне. Шабатне, конат пингонь ётазь касыхть-кеподихть. А кодамот синь улихть, кода кармайхть кельгома эряфть, кода кармайхть ванома сембонь лангс, мезе тиендеви перьфкаст – тянь колга эряви арьсемс тейнек, писательхненди.» ня валхнень эсь пингстонза азозень Яков Максимович Пинясов.

Ведущий: Кодама пара, што тя содаф ломанць, тя кельговикс писательсь, кона сембе эряфонц сёрмадсь аньцек иттненди, аньцек иттнень колга, шачсь и кассь минь районцонк, Кужа велесонк, коса маштыхть мокшень моронь морсема и кштима.

            Мора: «Але Раман Аксясь».

Ведущий: Кельговсь ня веленясь Яшанди. Куцят Мксмар пандть пряс и тонь инголет келеми пиже лугась, коса кизонда Яшась эсь ялганзон мархта ласьконькшнесь и юпафнесь панчфу тишенять потмос, Лундан ляйсь, коста шинь-шишка сон кунцекшнесь калхт. А розень кели паксясь кона, кода Мокша ляйсь кеворди золотань волнат! Тяса Я.М.Пинясов эсь ялганзон мархта посаблякшнесь колхозти.

          Мора: «Вай луга, луга», «Кафта цёрат тише лядихть».

Ведущий: 100 киза. Целай век. Но лемоц тяштенякс палы седисонк. Минь марятама оцю гордость, што мокшень васенце писательхнень, кода Захар Дорофеевонь, Михаил Безбородовонь, Василий Виардонь, Пётр Лефчаевонь, Максим Бебанонь ёткса и Яков Максимович Пинясов.

Ведущий: Тя ульсь 1928 кизоня. «Од веле», тяфта лемневсь мокшень газетаньке, редакцияв сувась кеветиешка кизоса акша пря цёраня и эняльдсь печатламс «Шавф Алёшанясь» стихотворениянц. Сон лемтьфоль пионер ялганцты Алёша Шараевонди, конань музь вирьбулоняста шавфста. Сяда меле сёрмады нинге азкс Алёшка ялганц колга.

                               Кели паксяса

                               Кассы рощанясь,

                               Рощать потмоса

                               Шавф Алёшканясь.

                               Козят изь кельге,

                               Ляксей ашуволь.

                                Сходста лихтезе

                                Кулакть Яшувонь.

Стихотворениясь лафчель, но сон токазе редакторть мяленц эсь видешинц, эрявиксшинц, седиста молеманц мархта, и курокста сон эвондась газетать страницаса. Аф лама пингта меле «Шавф Алёшканясь» стихотворенияти тяштьфоль музыка и сон кайгозевсь Мордовиять келес.

Ведущий: Кизоста кизос касондсь касондсь тяштемань эрьгац, арась ряцок мокшэрзянь литературать ушедыензон мархта. Сонь перан алда лиссть стихт. Поэмат, азкст, баснят. И ламотне эздост – панжада ваймотнень, тевонь тиема маштыхнень, Родинань кельгихнень. Кальдявть каршес тюрихнень колга.

Ведущий: Яков Максимович Пинясов шачсь 29 декабрьста 1913 кизоня  Зубово – Полянскяй районца Кужа Велеса. Тяса аделазе начальнай школать и тяста ушедсь содаф ломанень оцю киц.

          Мокшень мора: «Кужа веле».

                                                                         -1-

                                                                  -2-

Ведущий: Яков Максимович Пинясов тонафнесь Саранск ошень педагогическяй техникумса. Работась «Од веле» мокшень газетаса, а сяда меле Москуса ошень «Молодая гвардия» издательствать национальнай литературань секторса. Но шачема масторсь фалу тердсь эсонза. И сон мърдась меки Саранскяи. Кота кизот тонафнесь школаса итть.

Ведущий: 1931 кизоня Яков Максимович Пинясов нолдазе «Эряфсь панжи» стихонь васенце сборникоц. А сембоц сон нолдась сизьгимоньшка книга.

Стихотвореният.

Кукусь.

- Вай, кукуня, кукуня,

 Тарад лангса люкуня,

 Азк, мъзяра кизоце,

 Коса лямбе пизоце?

-  Аф лувовихть кизоне,

Кажнай вирса пизоне.

Цёфкскя

Морак, морак,

Цёфкскязе,

Морак,

Мазы ёфкскязе,

Гайняк, Кода пайгоня,

Велень келес кайгозне.

Ёран монга

Идень садса

Морамс,

Морамс цёфкскя лаца.

Салайня.

Келаське – ворня,

Лангсот тюжя орня.

Аф работат – нолат, Аньцек арнят – колат.

Кальхць  капкану поват,

Эста нолдат улоцень,

Сязьсазь мушка пулоцень.

Пухонь ацам.

Аяш нармотть

Тячи садса, Пухонь айам

Тялось ацась.

Кяшезень сон

Летьке шяйхнень.

Лоткасть горнямода

Ляйхне.

Аньцек

Пиже пиченясь

Кизокс

Панда пряти стясь.

Сон аф ёрдасы

Руцянц,

Сон аф кельмофтсы

Эсь прянц.

Тяла

Рана шобдава мон стянь,

Ловнясь ушеса – сиянь.

Лии алганя туцясь,

Соргокс акшеня ульцясь.

Нюди

Пере песонк ляйня

Аруняста шуди.

Крайсонза сонь кассы

Виде ронга нюди.

Керыне мон нюдить,

Тиине турамакс,

И сон тяни морай

Мороняда лама.

Нолдак унжанять

-Нолдак, Оляня, унжанять –

Сонга учсезе тунданять,

Учсезе сон кизонять.

Пади, ули пизоняц,

Учи эсонза идняц,

Учи – курок тядяц сай,

Ярхцамс мезевок кундай.

Олясь нолдазе унжанять.

- Архт идняцти, къда станя.

Тяла

Тячи, тага тяла

Марнек вельхтявсь модась

Порфкясь вальмять ала

Акша котфкя кодась

Кельгса тялоть, кельгса,

Кожфкац шама архты

Катк туцятне вельхксстон

Лама ловда прафтыхть.

Ведущий: 1941 – 1945 кизотнень Яков Пинясов, Кода и ламоц мокшень и эрзянь писательхне, ульсь Отечественнай войнаса. Мърдась куду солдатокс, кона ётазень войнань стака китнень. Од вийса кярьмодсь сон сембе ётафть и няйфть колга сёрмадома.

Ведущий: Лиссть писательть од книганза: «Золотань цятконят», «Азкст и ёфкст», «Пацят». Пачкодсть Яков Пинясовонь сёрматфонза и Москуву. Тоса, «Детская литература» издательстваса сон арась учсеф писателькс. Азксонзон ётафнезь и нолязь рузкс. «Обыкновенные варежки» книгац лисендсь Москуса сисемксть. Тусь сембонь мяльс «Живые фанарики» книгац. Сон колмоксть лисендсь Саранскяйса, аф весть нолневсь Москуса и лия странава.

Сценка: «Атякш».

Мокшень мора.

Ведущий: Тяфтама морот кайгондсть, мъзярда Яков Максимович Пинясов эрясь эсь велесонза, конань колга сёрмадсь «Идькс пинге» повестьсонза.

                                                                   -3-

Ведущий: Книгась лиссь Саранскяйса мокшекс, а Москуса – рузкс. «Детская литература» издательствась Мусь Яков Максимовичень книганзонды машты ётафни. Тя ульсь Москувонь писательсь Николай Владимирович Богданов, кона сонцьке сёрмадсь иттнень колга. Лац содафтольхть «Когда я был вожатым» повестец и лия книганза.

Ведущий: Республикань Верховнай Советсь 1983 кизоня макссь Яков Пинясовонти «Мордовиянь народнай писатель» почётнай лем. Тя ульсь минь васенце народнай писателеньке. Яков Максимовичень лиссь сизьгемонда лама книгац. И пъцтай сембе ётафневсть рузкс и лия народонь кяльс. Кода лувфоль нинге 1972 кизоня, рузкс нолдаф книганзон лувкссна пачкодсть сисем миллиотт экземплярти. Эсь странадонк башка, синь нолдафтольхть Болгарияса, Венгрияса, Чехословакияса, Югославияса, Германияса. А идень фкя азксоц лиссь Англияса.

Стихотвореният.

      Вашеня.

Акша пильге вашеня,

Равжа щётка гриваня.

Мон тейть каян пинемнят,

А тон касат – венемат.

Ардат, кода нал лият,

ведьге, кода кал уят;

стаян ляпе ноктаня,

кяжиста аф нотфтатя.

Мазоптса кърганяцень,

Вяри кандат пряняцень.

Озан – сяван пандоснень,

Кода ардан – ваносте.

     Куцють валоц.

Шра лангса ащи куцюсь,

И сон Машать эса сюци:

«Кадомайть мес апак штак?-

Вайнясь эсон, бъта шта.

Вов и каруфне сей сайхть,

И Тонь куцювозт кундайхть».

Эста машась ведьс сърхкась,

Куцють ару ведьса штась.

    Лугань панчфкат.

«Лугань панчфкат – мазынят,

Медень таньфкянь казинят,

Саворня минь сястядязь

И аптекав сяфтядязь.

Сярядихнень васьфттяда,

Шумбраши тейс кастяда.

                                                                       -4-

          Ната.  (Корхтай ракать лемста)

«Якань тона вели,

Кару кумцень пяли

Парста эряй карусь

Азороц аф ару.

Ули сонь стирняц,

Апак сеенть пряц.

Нола, кода ката,

Лемоц шабать Ната.

Ната ламос уды,

 Стяц и сембонь сюды;

Тапочканзон канфты,

Медняда пря анфты.

Кальдявть сон аф няйсы,

Кудснон весть аф тяйсы:

Кода Натать лемдемс?-

Азость, шабат, сембе.

Каркт.

Таргафт,

Кода оцю карькст,

Туцять вакска

Лиихть каркт.

Панжи масторозонк

Лиихть,

Катк синь тяза

Пизот тиихть.

Карга ялганяне,

Сада,

Тяса павазуфт

Ульхтяда!

Сёксень вирьса.

Кукунятне аф кукайхть,

Нармоттне аф морайхть,

Шуфта прянятне люкайхть,

Лопаняснон ёряйхть.

Шякшатанясь – вирень врачсь-

Пиченятнень чакай,

Тума кинзон арьси грацсь –

Вирь кинява якай.

                                                                             -5-

Тяла.

Вальмять ала

Тага тяла,

Вармась мърнеси

Трубава.

Но тя кельмось

Ёфси зря

Няфни

Мишаняти пря.

Лямбе орнянц

Цёрась щазе,

Нумол кедень

Музе вазннц.

Пирьфста сявсь

Сонвадяв сокст

И лиссь тага

Ялга ёткс.

Ведущий: Поэтсь ёмла лувихненди казсь стихотворения «Ульхть ёжуня», конань эса макси ёмла героенцты совет.

        Рана ёжуняста стяк,

Ару сапонняса штак,

Шамацень и кяднятнень,

Тяк ужяля веднять.

Тёждя кожфкясь-манинясь,

Сафтыхть вийцень,Ваняня!

Сценка «Эряфонь пялькст».

Ведущий: Яков Пинясов, васенце народнай писателеньке, стихонзон и азксонзон эса макссезе эрьганц одс касыхненди, содазе: сай пинге – синь поладсазь оцюфнень тевснон. 1983 кизоня, фкя кизода куломдонза инголе, Яков Максимович васетькшнесь ёмла лувиензон мархта Республикань идень библиотекаса. Азондозе эсь эряфонц, мезе сёрмадсь, лувозень од стихонзон. А меле мярьгсь: «Кельгома ялгат, тонафнеда и касода, уледа тевонь содайхть, а штоба кадомс эсь колгант пара лятфнембяль, озафнеда велезонт и ошезонт шуфтонят!»

Ведущий: А Кужа велеса, коса сире школась и коса идькс пингста тонафнесь Яков Максимович, тянивок шиса шуфтсь, конань сон озафтозе ялганзон мархта. Мъзярда сърхкси варманя, увназеви-тошказеви шуфтсь и,мярьгат, азонды ётаф пингть колга и сянь, кит эрясть, эряйхть и кармайхть тяса эряма.

Ведущий: Сон аш, но мархтонк сонь книганза, героенза, конат тонафтыхть эсонк улемс настоящай ломанькс, Родинань кельгикс и ванфтыкс семботь, мезе минь перьфканк.

                                                                         -6-