ягез әле, кызлар!
методическая разработка по теме

“Ягез  әле, кызлар!”

1нче  алып  баручы. 

Язлар  җитте  исә  бар табигать

                       Кояш  нурларына  күмелә

   Яфраклардан  таңда  чыклар  тама,

    Сиреньнәрдән  хуш  ис  сибелә.

Хәерле  көн, хөрмәтле  укытучылар,  әниләр,  әбиләр,  укучылар!

2нче  алып баручы. Кем сокланмас  шушы  гүзәллеккә!

                       Кем  сөенмәс күреп  яз  ямен!

                       Иң  зур  бәхет – дуслык,  тынычлыкта

                       Каршы  алу  язлар  бәйрәмен!

1нче  алып  баручы. Көннең  яктылыгы – кояшта,  күкнең  матурлыгы – йолдызларда,  җирнең  гүзәллеге – хатын – кызларда.  Сезне бөтен  җир  йөзен  бизәгән  яз  бәйрәме – Халыкара  хатын – кызлар  көне  белән  тәбриклибез!

Бәйрәмнең  кайсы да  тәнгә  җиңеллек,  рәхәтлек,  җанга  ял  алып  килә.  Шушы  бәйрәм  көне,  елмаеп  балкыган  кояш  матурлыгын,  табигатьнең  самимилеген  өстәп,  күңелләрегезгә  шатлык,  тәнегезгә  сихәтлек,  өегезгә  иминлек  алып  килсен.

Без  бүген  “Ягез  әле,  кызлар!”  дигән  кичәгә  җыелдык.

2нче  алып  баручы.  Бәйрәм  белән,  хөрмәтле  кызларыбыз! 7 класс  кызлары уңганнары  да,  булганнары да,  бүгенге  конкурста  катнаша.

Менә  алар  безнең  конкурсантларыбыз.

Абдуллина Г., Гәрәева Г., Фәйзуллина Ф., Хәеретдинова Л., Хамидуллина А.

7 класс  малайлары  кызларга  җыр  бүләк  итәләр  “Эх,  сез  матур  кызлар”

1нче  алып  баручы. Һай  кызлары,  кызлары

                        Янып  тора  күзләре

                        Кызларына  сүз  әйтмәгез

                        Алдынгылар  үзләре.

1нче  конкурс Шигырьләр,  котлаулар  конкурсы. Һәр  конкурсант  бүгенге  бәйрәмгә  багышлап  шигырь һәм  котлау  сөйли.

1нче,  2нче…

Хатын: Исәнмесез,  балалар!  Исәнме,  Шәмсинур  апа.  Синең  кызың  бик  булышадыр  үзеңә?

Әби: Айгөлнеме?  Монда  гына  уйнап  йөри  иде. Синең  кызын  бик  булышадыр  үзеңә?

Хатын:  Әйе,  апа, кызым  бик  уңган  шул.  Менә  ул  үзе  дә  килә.

Айгөл:  Мин  дә  керләр  юдым,  әни  сабынлап  юдым,  әни.

Әнисе: Ай,  кызым,  үскәнсең  бигрәк  чиста  иткәнсең!

Айгөл: Бәрәнге  юдым,  әни,  сабынлап  юдым  әни.

Әнисе:Ай,  кызым,  үскәнсен,  нишләден?

        И, кызым,  болай  булгач  өйгә  кайтам  да

        Яңадан  бәрәңге  пешерим.

        (хатын  китә)

Әби:  Кызлар,  ә  кем  тагын  әнисенә  булыша?

1нче  алып  баручы. 2нче  конкурсыбыз  бәрәңге  чистарту.

Кызлар  чистартканда  музыкаль  тәнәфес.

2нче алып  баручы. Әниемнең  күзләре

                       Диңгез  кебек  тирән.

                        Ул күзләргә  карасам,

                        Мин  үземне  күрәм.

                      Әниемнең  карашы

                      Дулкын  кебек  назлы

                       Чәчләремнән  иркәли,

                       Иңнәремнән  назлый.

3нче  конкурсыбыз  Әниләр  турында  мәкальләр.  Кем  күберәк әни  турында мәкальләр  белә.

1нче  алып  баручы.  Дуслар,  карагыз  әле,  безгә  кунак  кызлар  килә!

/Залга  малайлар  кызлар  киемен  киеп  керәләр  һәм  бию  бииләр.\

Кызлар,  карагыз  әле,  бу  безнең  малайлар  түгелме  соң?  Ах,  сез  шаяннар.

2нче  алып  баручы. Хатын – кызлар  нинди  була?

                        Ай  янамы,  йолдыз  калкамы –

                        Ул  кулларда  язын – чәчәк  исе,

                         Җәен – икмәк,  кышын – кар  тәме.

1нче  алып  баручы.Дүртенче  конкурсыбызны  башлыйбыз.  Кичәдә  катнашучыларга  өйдә  татлы  милли  ашлар  пешереп  килергә  кушылган  иде.  Хәзер  безнең  кызларыбыз  аларны  ничек  пешүләре  турында  сөйләп,  жюрига  тапшыралар.

2нче  алып  баручы. Әйдә,  әйдә  катырак  бас

                         Биегәнне  күрсеннәр

                         Баскан  җирдән  ут  чыгара

                         Безнең  кызлар  дисеннәр.

Бишенче  кокурста  кызлар үзләрнең  бию  сәләтләрен  күрсәтерләр.

1нче  алып  баручы.  Әй,  курчагым,  елак – мылак,

                         Тик  кенә  тормый  карап.

                          Бастырсам,  торып  китә.

                          Яткырсам,  торып  китә.

                          Көн  дә  шулай  тилмерәм,  

                          Әммә  өйрәтә  беләм:

                          -Сүзем  тыңла,  тыйнак  бул,

                          Башкаларга  үрнәк  бул.

Алтынчы  конкурсыбыз  курчак  төрү.

Музыкаль  тәнәфес.

2нче  алып  баручы.  Коймагы  да  коймагы,

                         Агып  тора  каймагы!

                         Табада  пешеп  тора,

                          Табынга  төшеп тора.

                          Кайнар! – ялан  кул  тотма.

                          Тәмле! – телеңне  йотма.

                           Син  телең  йотсаң,  Нәбирә,

                           Кем  рәхмәт  әйтер  әбигә?

Ә  хәзер  безнең  кызлар  пилмән  ясыячаклар.  Моның  өчен  5минут  вакыт  бирелә.  Шушы  вакыт  эчендә  кем  күбрәк  пилмән  ясый – шул  җиңүче.

Безнең  кызлар  пилмән  ясаганда  музыкаль  тәнәфес.

1нче алып  баручы.  Чәй  эчәбез  бал  белән

                         Балачагалар  белән

                         Балачага  алты  җан

                         Әхмәт,  Нәҗип,Закирҗан,

                         Зәйнәп  белән  Галия,

                         Иң  кечкенә  Асия.

Ә  хәзер  кызларга тулы  исемнәрне  язып  бетерер  өчен  бу  битләрне  бирәбез.

2нче алып  баручы. Ләйсән  инде  зур  булган,

                       Әгәр  килсә  көенә,

                        Үзе  торып  юына,

                        Хәтта  үзе  киенә

                        Әллә  менә  бүген дә

                        Тик  күз  генә  тимәсен

                       Үзе  кигән  күлмәгенең

                        Төймәләгән  төймәсен.

Ә  хәзер  безнең  кызларыбыз  үзләрнең  тегү  осталыкларын  күрсәтерләр.

Музыкаль  тәнәфес.

1нче алып  баручы.  Кичәбез  бик  күңелле  узды.  Кызларыбыз  уңганнар  да,  тапкырлар  да,  тырышлар да  икән.  Алар  арасыннан  җиңүчеләрне  ачыклау  җиңел  булмас,  дип  уйлыйм.  Сезне  тагын  бер  тапкыр  яз  бәйрәме – Халык – ара  хатын – кызлар  көне  белән  тәбрик  итәбез.  Ә  хәзер  конкурсны  йомгаклау  өчен  сүз  жюрига  бирелә.

Жюри…

Җиңүчеләргә  бүләк  тапшырыла.

Класстан  тыш чара

“Ягез әле, кызлар!”